Roma
15 Joperu jucha engachi uinhapiti jaka, jatsiskachi para tekaakuantani imeechani engaksï no xáni uinhapiti jaka, jimboka jarhaska máru ambe engaksï imeecha no káni sési exejka ka nóchi jatsiska para imani ambe úni ambe engachi juchajku tsitijka. 2 Eska mándani arhini jánguarhintaaka imani ambe úni enga sési pʼikuastaaka máteru kʼuiripuni* para jarhuatani ka uinhaperantani. 3 Jimboka Kristujtu no úska ambe enga imajkumindu tsitienga, sánderu sési, ísï úkuarhisti eska na karakata jaka: “Jíndentujtsïni ísï no sési arhisïndi, ísï eskaksïni tʼungini na no sési arhijka”. 4 Jimboka ambe enga ióntki karanhaka, karakata jarhasti parajtsïni jorhendani, jimboka engachi tekaantajka ka jurajkutakuarhenchi parajtsïni sési pʼikuastantani ambe enga karakata jaka Karakateecharhu, juchachi úsïnga ambakiti ambe erokuarhini. 5 Eskaksïni Tata Diosï jarhuataaka parajtsï chá tekaantani ka parajtsï sési pʼikuarherantani, jíksïni kómarhijpichesïnga iámindu chánksïni parajtsï chá májkueni eratseni eska Kristu Jesúsi, 6 parajtsï chá iáminduecha kʼéri ambe arhini Tata Diosïni, imani enga juchaari Tata Jesukristueri Taati jémbeeka.
7 Ísï eskaksïni Kristu na sési jiókaka* chánksïni, chájtu sési jiókaa je máteruechani paraka Tata Diosï kʼéri ambe arhinhaaka. 8 Jimboka jíksïni arhisïnga eska Kristu niáraspka jántspikuani judiuechani* para xarhatani eska Tata Diosï jurhimbitiiska ka para xarhatani eska ísïiska ambe enga Tata Diosï aiakuapka imeecheeri ióntki anapu parientiichani 9 ka ístu parakaksï imeecha engaksï no judiueka kʼéri ambe arhipiringa Tata Diosïni indeni jimbo enga ima xáni pʼamojpejka. Ísï eska na karakata jaka: “Ísï jimbokenisï kʼéri ambe arhiaka no judiuechani japarini ka pireaka parani kʼéri ambe arhini chiiti nombrini”. 10 Ka ístu Tata Diosï uandasïndi: “Chá engajtsï no judiueka, kánikua tsípi je imeeri ireta jingoni”. 11 Ka máteru karakata arhisïndi: “Iámindu chá engajtsï no judiueka, kʼéri ambe arhi je Tata Diosï Jeobani. Eskaksï iámindu ireteecha kʼéri ambe arhiaka”. 12 Ístu, Isaíasi uandasïndi: “Xarhantaati Jeséeri sïrangua, ima jurhaxati para juramukuani no judiuechani; no judiuechaksï tsípikua jingoni erokuarhini jauati eska ima ambakiti ambe uaaka”. 13 Eska Tata Diosï, ima engaksïni jarhuatajka parajtsï chá erokuarhini jarhani ambe enga ima aiatspeka, eskaksïni ima jarhuataaka para chá tsípikua jingoni irekani ka parajtsï no uandanhiani jimbokajtsï chá mintsikasïnga, ka parakajtsï espiritu santueri uinhapikua jimbo méntku jauenani jauaka sánderu ambakiti ambe erokuarhini.
14 Juchiiti erachiicha,* ji sési mítetixaka eskajtsï chá kánikua jánguarhintasïnga ambakiti ambe úni ka eskajtsï uánikua ambe míteska ka eskajtsï iáminduecha úsïnga arhistatsperani. 15 Ka ji no sáni pʼíngukuarhiska paraksïni karachini ka paraksïni miátantani máru ambe. Ka ísï úsïnga jimbokarini Tata Diosï kánikua kóndentaska, 16 imarini kánikua kóndentasti jimbokarini erakuska parani Kristu Jesúsini jántspikuni ka aianguani no judiuechani ambakiti aianhperakuani, ka i pímbinhasï ánchikuarhita máesti. Ji ísï úxaka paraksï no judiuecha úni pímbinhaxentani espiritu santuni jimbo, paraksï ísïini komueska kéjtsïtakua ma enga Tata Diosï jaiapanhintajka.
17 Ísï jimbo, ji kánikua tsípisïnga jimbokani Kristu Jesúsiiri chúxapatiiska ka jimbokani Tata Diosïiri ambe úxaka. 18 Jíksïni no aianguaka ambe engani ji úka, sánderu sési, imani ambejkusïni uandantaaka ambe enga Kristu uandaka ka ambe enga xáni úka jíndeni úraparini para jarhuataani no judiuechani paraksï ima niárani kurhajchani. 19 Imaksï kurhajchasti kʼérati milagruecha jimbo ka ístu uánikua máteru ambe* jimbo enga Tata Diosïiri espiritu santu úka. Ísï jimbo, ji iápurisï jámaska aianhpini ambakiti aianhperakuani Kristueri ambe, Jerusaléni uératini asta Ilírikisï. 20 Ísï jimbo, ji uandaska eskani no jámaaka ambakiti aianhperakuani aianhpini Kristueri ambe jimeesïsï enga aianhpinhakia, parani no inchaakukuni jarhani imani enga ueenakia jima aianhpini. 21 Ísï eska na karakata jaka: “Imeecha engaksï no aiangunhaka imeeri ambe, exeatiksï; ka imeecha engaksï no kurhaani jaka imeeri ambe, kurhanguatiksï”.
22 Ka jimboksïnisï no úni jaka nirani pʼorhembini. 23 Joperuni kʼamaraxakaia aianhpini ixúesïsï ka uánikua* uéxurhiniistia engaksïni uékani jaka nirani exeni. 24 Ísï jimbo, aberi engaksïni uaaka exeni engani Espania nirani jauaka, ka engani na sáni chánksïni jingoni jauakia, aberi engajtsïni uaaka pámbetani sáni xanharu jimbo. 25 Joperuni iáiasï Jerusaléni niraxamka parani erachiichani* jarhuataani. 26 Jimbokaksï Masedonia ka Akaia anapuecha, tsípikua jingonksï íntspiska ambe ma paraksï jarhuataani Jerusaléni anapu erachiichani engaksï no ma ambe jatsikuarheka. 27 Ísïisti, indeechaksï tsípikua jingoni ísï ústi, jimbokaksï inde erachiicha kánguaxapka Jerusaléni anapu erachiichani jimbokaksï indeecha jimbosï niáraka míteni Tata Diosïiri ambe, jimboksïsï inde erachiicha jatsiti para jarhuataani Jerusaléni anapu erachiichani indeecheeri jatsikuarhekua ambe jingoni. 28 Ísï jimbo, engani na íntsaantauakia ambe enga xáni tánakuarhika, Espania niuaka ka jimeesïsï niuaka nani engajtsï chá jaka. 29 Ístu, sési mítetixaka eskaksïni Kristu kánikua kóndentaaka engani na chánksïni jingoni jauakia.
30 Erachiicha, Tata Jesukristuni jimbo ka jimbokajtsïni espiritu santu jarhuatasïnga parachi xénchperani, jíksïni kurhachexaka eskajtsïni méntku úndaaka kómarhijpicheni jarhani, 31 kómarhijpichejtsïni je parakajtsïni no ma ambe úchiaka Judea anapuecha engaksï no jakajkutiika ka parakaksï Jerusaléni anapu erachiicha sési jiókuarhiaka ambe engani pákuani jaka. 32 Ísï jimbo, enga Tata Diosï ísï uékaska, jíksïni tsípikua jingoni niuaka pʼorhembini ka májku kʼérichi uinhaperperantaaka. 33 Eska Tata Diosï enga pínandikua íntspijka chánksïni jingoni jauaka. Eska ísï úkuarhiaka.