Roma

7 ¿Andi nójtsï míteski erachiicha* —jimbokani imeechani arhiaxaka engaksï míteka leini— eska Lei jiántkusï juramukuajka kʼuiripuechani engaksï tsípiti jarhajka? 2 Jimboka Lei uandasïnga eska uarhiiti jatsiska para uámba jingoni jarhani enga ima tsípiti jauaka, joperu enga uámba uarhijkia, uarhiiti nóteru juramuminhasïndia imeeri uámba jimbo. 3 Ísï jimbo, enga uarhiiti niárapiringa máteru acheetini kúrhini ka jini uámba útasï tsípiti jarhani, uarhiiti ísku jándikua ambe niátani japirindi. Joperu enga uámba uarhipiringa ka uarhiiti niárani máteru acheeti jingoni uambuchantani, no ísku jándikua ambe niátani japirindi jimboka uarhiiti nóteru juramuminhasïngia imeeri uámba jimbo.

4 Ka májkueni juchiiti erachiicha, Kristueri kuerpuksïni ístu pʼímutantasti chánksïni paraksïni Moisésiiri Lei nóteru juramuchinia. Ka i ambe ísï úkuarhisti parakajtsï Kristueriuaka, imeeri enga tsítanhantaka,* parachi iásï únia Tata Diosïni marhuakuni. 5 Jimboka engachi ísï irekani japka eska juchaari kuerpu na tsitienga pekadu ambe niátani, Leijtsïni sési exerasïreendi ambe ka ambesï tsitieni no sési úni juchaari kuerpu* ka inde ambe uarhikuarhu pájpisïndi. 6 Joperuchi iásï pʼímutanhantaskia parajtsïni nóteru Lei juramuchinia, jimbokachi uarhiskia parachi nóteru jántspiriinia ka iásïchi ménderueni marhuakuxakaia Tata Diosïni espiritu santu jimbo ka nóteru ísïa eska ióntki, nóteru ísïa eska na karakata jaka Leirhu.

7 Jiájkani, ¿uandaxakichi eska Lei pekadueska? ¡Méntku nómbe! Jimboka enga Lei no japiringa, ji no méni mítepiringa ambeeski pekadu. Jimboka enga Lei no uandapiringa “Asï jáma tsititspeni jámani”, ji no méni mítepiringa eska no sési jarhaska tsititspeni jámani. 8 Joperu ini mandamientu jimbo, pekadu ústi eskani ji sánderuni tsititspeni jámapiringa, jimboka enga Lei no japka, pekadu no uinhapikua jatsispti. 9 Jimbokani ji tsípiti jarhaspka ante de Lei jarhani. Joperu enga Lei niárapka jarhani, pekadu tsíntaspti ka ji uarhispka. 10 Ka niáraspka míteni eska inde mandamientu engareni íntskupiringa tsípikua, masireni úxapka uarhikuarhu páni. 11 Jimboka ini mandamientu jimbo, pekadurini támisï pásti ka uándikustireni. 12 Ísï jimbo, Lei pímbinhasïisti ka ístu mandamientu pímbinhasïisti ka kánikua sési ambeesti ka ístu ambakiti ambeesti.

13 Jiájkani inde ambe enga xáni ambakitiika, ¿inde amberinisï uándiku? ¡Méntku nómbe! Pekadurinisï uándikuti. Lei ambakiti ambeesti, joperu xarhatasti eskarini pekadusï uándikuni japka. Ka mandamientu xarhatasti na enga xáni no sési jásï ambeeka pekadu. 14 Jimbokachi sési míteska eska Lei Tata Diosïiriiska ka eska imeeri espiritu santu jimboeska, joperuni ji kʼuiripu máeska engani pekadoriika ka engani ísku jurajkunhaka parani pekadueri jántspiriini. 15 Jimbokani no kurhangusïnga andisïni ísï jámajki: no úsïnga ambe engani uéjka úni, sánderu sési, imani ambe úsïnga engani no sáni jaiapanhintajka. 16 Joperuni xarhatasïnga eska Lei ambakitiiska engani újka ambe engani no uéjka úni. 17 Joperu iásï, nóteruni jísïni újkia indeni ambe, sánderu sési, pekadusï újti ini ambe enga juchiiti kuerpurhu jaka. 18 Jimbokani ji sési mítetixaka eskani ji méntkuni no úsïnga sési ambe úni, sánderu sési, juchiiti kuerpu enga pekadoriika, indesï no újti sési ambe úni. Jimbokani ji uékasïnga sési ambe úni joperu nóminduni úsïnga ísï úni. 19 Jimboka, nájkirukani uékajka sési ambe úni, no úsïnga ísï úni; sánderu sési, indeni ambesïni újka enga no sési jaka ka engani ji no uéjka úni. 20 Jimajkani, jiáni engani ji indeni ambe újka engani no uéjka, no jísïni ísï újka, sánderu sési, pekadu enga juchiiti kuerpurhu jaka, indesï újti indeni ambe.

21 Ísï jimbo, ji sési mítetixaka eska jarhaska ambe ma engareni juramuchijka, jimboka engani uéjka imani ambe úni enga sési jaka, tʼuini no sési ambe uékani jarhasïngia úni. 22 Juchiiti mintsitarhu, ji tsitisïnga ambe enga Tata Diosï juramujka, 23 joperu juchiiti kuerpurhu* jarhasti máteru juramukua enga no terukuntajka imani juramukua jingoni engareni arhijka ambe engani jatsika parani eratseni ka inde ambe úsïndi eskani ji jántspiriuaka pekadueri enga juchiiti kuerpurhu jaka. 24 ¡Xáni enga no sési ambeeka para ji! ¿Nérini pʼímutantaa ka kénditachea ini kuerpuni engareni uarhikuarhu páni jaka? 25 ¡Diosmaiamukua arhisïnga Tata Diosïni, jimbokarini pʼímutantaska Jesukristuni jimbo enga jindeeka juchaari Tata! Jimboka juchiiti eratsekua Tata Diosïiri juramukueri jántspiriiska, joperu juchiiti kuerpu pekadueri juramukueri jántspiriisti.