Juanu

12 Seisi jurhiatikua kuerataxapti para Páskua úkuarhini ka Jesúsi Betania niáraspti nani enga Lásaru irekapka, ima enga Jesúsi tsítantapka. 2 Ka jimaksï t’irekua ma úkuspti chúrikua ka Marta jámaxapti kéntpini ka Lásarujtu jima jarhaspti imeechani jingoni engaksï Jesúsini jingoni tʼireni japka.* 3 Jimajkani María pʼíkuspti ma libra* aseitiiri enga kánikua sési jájkundeenga ka kánikua jukaparhani ka enga ambakiti nardu jingoni jeuetakata japka ka Jesúsini atandukuspti. Tátsekua imeeri jauiri jingoni kutsundukuntaspti. Ka iámu kʼumanchikuarhu jájkundexapti aseiti. 4 Joperu imeeri chúxapati ma, Judasï Iskariote, ima enga no ióni jimbo traisionariipiringa Jesúsini, uandaspti: 5 “¿Andi no sánderu sési japirini eska i aseiti 300 denariu jimbo ataranhantapiringa ka sentabu imeechani íntsaani engaksï no ma ambe jatsikuarheka?”. 6 Ima ísï uandaspti no jimboka xáni uandanhiapiringa imani kʼuiripuechani jimbo engaksï no ma ambe jatsikuarhepka, sino jimboka sïpajkurhespka; sentabu sïpasïreendi jimboka ima kámasïreenga imani kajani engaksï sentabu jatsireenga. 7 Jesúsi uandaspti: “Ísku exe je; jurajku eska ísï uaaka eska na pʼindenhaka para ima jurhiatikua engani jatsinhantaaka. 8 Jimboka imeecha engaksï no ma ambe jatsikuarheka, méntkisïksï chánksïni jingoni jauati, joperuni ji no méntkisï chánksïni jingoni jauaka”.

9 Jiánisï, uánikua judiuechaksï mítespti eska Jesúsi Betania jarhaspka ka jurhasptiksï exeni, joperuksï no Jesúsintkusï jupti exeni, sino ístu Lásaruni, imani enga Jesúsi tsítantapka.* 10 Ka kʼérati saserdotiichaksï ueenaspti jirinhakuntani néna jámani paraksï Lásaruntu uándikuni. 11 Uánikua judiuechaksï nirasïreendi exeni Lásaruni ka mintsikasïreendiksï Jesúsini.

12 Ísï pauandikua, kʼuiripuecha engaksï jupka kʼuínchikuarhu mítesptiksï eska Jesúsi niáraxapkia Jerusaléni. 13 Ísï jimbo, pʼikusptiksï pímu ambe ka nirasptiksï kúmuni ka ueenasptiksï uinhachani: “¡Oh, Tata Diosï, kuájchaku! ¡Újchakuranhasti ima enga Tata Diosï Jeobaeri nombri jimbo jurhani jaka, enga jindeeka Israeli anapu Juramuti!”. 14 Ka enga Jesúsi exentapka burru sapichuni ma seguirispti jatani, ísï eska na karakata jaka: 15 “Asï jáma chéni Sioniiri uátsï. ¡Exe! Jurhaxati chiiti juramuti burru sapichuni jatarini”. 16 Ueenakuarhu, imeeri chúxapatiichaksï no kurhanguspti ini ambe. Joperu enga Jesúsi na karhanchentapkia auandarhu, miántasptiksï eska ísï karakata jarhaspka imeeri ambe ka eskaksï ísï kámaspka.

17 Ima kʼuiripuecha engaksï jima japka jiáni enga Jesúsi uandajpapka Lásaruni para uéntani tumbarhu ka enga tsítantapka, uandantaxaptiksï ambe enga xáni úkuarhipka. 18 Ísï jimbojtuksïsï kʼuiripuecha nípti kúmuni, jimbokaksï kurhaaspka eska Jesúsi indeni milagru úspka. 19 Ísï jimbo, fariseuechaksï arhijperaspti: “Ískuesti ambe engachi úni jaka. ¡Exe je, méntkuksï iámindu kʼuiripuecha imani niraxati chúxapani!”.

20 Jiánisï, imani kʼuiripuechani jingoni engaksï jupka Tata Diosïni kómarhini kʼuínchikuarhu, ístuksï jámaxapti máru grieguecha. 21 Imeechaksï Felipeni andarhieraspti enga Betsaida anapuepka, ireta ma enga Galilea jaka, ka arhisptiksï: “Tata, uékasïngachi Jesúsini exeni”. 22 Felipe niraspti aianguni Andrésini ka tátsekua Andrési ka Felipe nirasptiksï Jesúsini aianguni.

23 Joperu Jesúsi arhiaspti: “Niárastia jandora paraka Achamasïiri Uájpa kʼéri ambe arhinhaaka. 24 Jíksïni sési jimbo arhisïnga eska enga máechakua trigu no andatseerajka ka uarhini, útasï máechakua semiiesïndi. Joperu enga uarhijkia, kánikua frutu jukasïndi. 25 Ima enga xénchajka imeeri tsípikuani* masi uaati tsïtani.* Joperu ima enga uékaaka tsïtani imeeri tsípikuani ini parhakpinirhu, niáraati jatsini tsípikua para méntkisï. 26 Engareni nema uéjka marhuacheni, juuerini chúxapuni, ka jima engani ji jauaka, juchiiti jántspirijtu jima jauati. Engareni nema marhuacheaka, Taati niáraati kʼéri ambe arhini. 27 Ka iásï kánikua no sési pʼikuarheraxaka. ¿Ka ambesïni uandaaia? Taati, kuájchakureni ini jandora jimbo enga xáni úkua jukaaka. Joperuni ísï jimbosïni juka ini parhakpinirhu. 28 Taati, jarhuataa kʼuiripuechani parakaksï míteaka na enga xáni kʼéri ambeeka chiiti nombri”. Jimajkani auandarhu uératini kurhaakuarhispti nema uandani: “Ísï úskia ka kʼuiripuechajtsïni kʼéri ambe arhisti ka ménderuni ísï uaaka ka kʼuiripuechajtsïni kʼéri ambe arhiati”.

29 Kʼuiripuecha engaksï jima japka, kurhaasptiksï indeni ambe ka máruksï ueenaspti uandani eska charanchispka. Máteruechaksï uandaspti: “Ánjeli ma uandajpasti”. 30 Jimajkani Jesúsi uandaspti: “I ambe enga kurhaakuarhika, chánksïni jimbosï kurhaakuarhiti ka no jíndeni jimbo. 31 Parhakpini anapuechaksï jusgarinhaxatiia; ka iásï i parhakpini anapu juramuti petanhantaatia. 32 Joperu ji, engani na tarhatanhaakia,* uaaka eskajtsïni mámaru jásï kʼuiripuecha andarhieraaka”. 33 Ísï uandaspti paraka mítekuarhipiringa na enga uarhipiringa. 34 Jimajkani kʼuiripuechaksï arhispti: “Jucha míteska eska Kristu méntkisï jauaka, jimboka Lei ísï arhisïnga. Jiájkani, ¿andiresï tʼu uandajki eska Achamasïiri Uájpa jatsiska para tarhatanhani? ¿Neeski Achamasïiri Uájpa?”. 35 Ísï jimbo, Jesúsi arhiaspti: “Tʼíntskua sánderkusï jauatia chánksïni jingoni. Ísï jimbo, xanhara je iásï engajtsï útasï jatsika tʼíntskuani paraksïni pápkʼandekua no andani; ima enga pápkʼandu xanharajka no mítesti nanisï nirani jaki. 36 Mintsika je tʼíntskuani enga útasï chánksïni jingoni jauaka, parakajtsï tʼíntskueri uájpeuaka”.

Enga na ísï arhiapkia, Jesúsi kéndikuspti jima uératini ka jirikuarhekuaspti. 37 Nájkiruka xáni uánikua milagruechani uaapka imeechani japarini, kʼuiripuechaksï útasï no mintsikasïreendi imani, 38 paraka ísï úkuarhipiringa eska na uandapka Isaíasi, Tata Diosïiri uandakua pári:* “Tata Diosï Jeoba, ¿jarhaski nema enga mintsikajka ambe engachi jucha jámani jaka uandantani? ¿Ka né aiangunhaski na enga xáni uinhapika Tata Diosï Jeoba?”.* 39 Isaíasi ístu uandaspti andiksïsï no ueeni jakajkuni: 40 “Ima mínharhikuasti ka ústi eska imeecheeri mintsita chopeaka,* paraksï no úni exeni nijtuksï kurhanguni imeecheeri mintsita jingoni, niksï andarhientani Tata Diosïni* parani ji sési pʼikuastaantani”. 41 Isaíasi ini ambe uandaspti jimboka exespka na enga xáni kʼéri ambeepka ka imeeri ambe uandantaspti. 42 Ka uánikua judiuecheeri juramutiichaksï ueenaspti imani mintsikani; joperuksï no uandantasïreendi kʼuiripuechani japarini jimbokaksï chérhiasïreenga fariseuechani, jimbokaksï petanhantapiringa jima uératini nani engaksï judiuecha tánguarhijka para Tata Diosïni kómarhini, 43 ka ístu jimbokaksï sánderu uékasïreenga sési pakarani kʼuiripuechani japarini* ka eska Tata Diosïni japarini.

44 Ka Jesúsi uinhachaparini arhiaspti: “Ima engareni jíndeni mintsikajka, no solu jíndeni mintsikasïndi, sino ístu imani engareni axaka; 45 ka ima engareni jíndeni exejka, ístu exesïndi imani engareni axaka. 46 Ji ísï jurhaska parhakpinirhu komueska tʼíntskua ma, paraka ima engareni jíndeni mintsikaaka nóteru pápkʼandu jauakia. 47 Joperu enga nema kurhauaka ambe engani ji uandajka, ka no ísï úni, ji no jusgarisïnga; jimbokani no jurhaska parani jusgariuani parhakpini anapuechani, sánderu sési, jurhaska parani pʼímutaantani parhakpini anapuechani. 48 Ima engareni no jaiapanhentajka ka no jiókuarhiani juchiiti uandakuechani, jatsikuarhestia nésï jusgariua: juchiiti uandakuechaksïsï jusgariuati últimu jurhiatikua jimbo. 49 Jimbokani ji no ísku pʼitsïkuarhisïnga uandani, sánderu sési, Taati ima engareni axaka, imarinisï arhiti ambe engani jatsika para uandani ka ambe engani jatsika para uandantani. 50 Ka ji sési mítetixaka eska ambe engareni ima arhika jindeeska para jatsini tsípikua para méntkisï. Ísï jimbo, ambe engani uandajka, ísïminduni uandasïnga eskarini Taati na arhika”.