Santiagu

2 Juchiiti erachiicha,* chájtsï no ísï jámani jaka, ¿a no je? Ixúantsï jánguarhintani jarhani mintsikani juchaari Tata Jesukristuni enga xáni k’éri ambeeka ka jinijtsï no iáminduechani májkueni kaani jarhani. 2 Engajtsï chá tánguarhintatini jarhajka ka jimajkisï niárani achamasï ma aniiu orueri jukajkuratini ka sési jásï xukuparhakua jukarini, ka ístu jimajkisï niárani kʼuiripu ma enga no ma ambe jatsikuarheka iámu jáxetini, 3 ¿chájtsï sánderu sési exesïni imani enga sési xukuparhatini nirajka ka arhintsï “Ixúani uaxaka, ixú sánderu sési jarhasti”, joperu imani enga no ma ambe jatsikuarheka arhisïntsï “Jimini pakara anhandetini”, ojtsï ísï arhisïni “Jimini máekandu uaxandeku nani engani ji péuajka jantsiriichani”? 4 Engajtsï chá ísï jámajka, chájtsï sánderu sési exeaxaka máru kʼuiripuechani ka eska máteruechani ka tʼuintsï no sési jusgariuani jarhasïngia.

5 Kurhaa je juchiiti erachiicha engaksïni ji xáni xénchajka. ¿Andi Tata Diosï no imeechani erakuaski engaksï parhakpini anapuecha ísï exeajka enajkiksï no ma ambe jatsikuarhe paraksï iásï kánikua jatsikuarhenia jimbokaksï mintsikasïnga ka ístu paraksï pʼirani imani Reinuni enga Tata Diosï imeechani aiakuaka engaksï xénchajka? 6 Joperu chájtsï ísku exeaska imeechani engaksï no ma ambe jatsikuarheka. ¿Andi no indeechaksïnisï no sési kámajki engaksï jatsikuarheriika? ¿Ka no indeechaksïnisï antsikupajki paraksïni juesiicha jingoni páni? 7 ¿Andi nóksï indeecheeski engaksï no sési ambe uandajka ambakiti nombriiri ambe engaksïni Tata Diosï íntskuka? 8 Ísï jimbo, chájtsï kánikua sési úni jauaka engajtsï ísï úska eska ambakiti lei* na uandajka, ísï eska Karakateecharhu na arhijka: “Xénchaa máteru kʼuiripuechani* ísï eskari tʼujkumindu na xénchakuarhijka”. 9 Joperu engajtsï chá seguiriini jauaka máru kʼuiripuechani sési kaani ka máteruechani nómbe, chájtsï pekariixakaia, ka lei uandasïndi eskajtsï* no sési ambe niátaxaka.

10 Jimboka enga nema úni jauaka ambe enga Lei xáni uandajka, joperu ma ambejku no úni, iámu Leinisï no kumplirini jarhajti. 11 Jimboka ima enga uandaka “Asï jáma ísku jándikua ambe niátani”,* ístu uandasti “Asï jáma uándikpini”. Ísï jimbo, na uéjkiri no ísku jándikua ambe niátani jarhani joperuri uándikpini, nóri úni jarhasïnga* ambe enga lei uandajka. 12 Seguirii je ísï uandani ka ísï jámani eskaksï imeecha engaksï indeni leini jimbo jusgarinhaaka enga újka eskaksï kʼuiripuecha* nóteru jántspiriuakia. 13 Jimboka ima enga no pʼamojpejka, no pʼamojkunhaati jiáni enga jusgarinhaaka. Joperu imani enga pʼamojpejka, sési nikuati jiáni enga jusgarinhaaka.

14 Juchiiti erachiicha, ¿ambe marhuaua enga nema uandaska eska mintsikasïnga ka jini no ma ambe úni jarhani? Ísï mintsikani no jarhuataati para pʼímutanhantani, ¿a no je? 15 Enga erachi o pirenchi ma takusï ambe uétarhinchani jauaka* ka sántku tʼirekua ambe jatsini para nitamakuarhini, 16 ka chá útasï arhini “Níia níntani ka asï uandanhiani ja, sési órhekuarhi parari no tsʼirani jarhani ka sési tʼire”. Joperu, ¿ambe marhuaua ísï arhini ka no íntskuni ambe enga ima* uétarhinchani jaka? 17 Májkueniisti, ískuesti uandani eskachi mintsikasïnga ka jinichi méntku no ma ambe úni jarhani.

18 Joperu nema uandaati: “Tʼuri mintsikasïnga ka ji uánikua ambe úsïnga. Asï ambe ma ú ka exerarini eskari mintsikasïnga, ka jíkeni exeraaka eskani mintsikasïnga juchiiti úkuecha jimbo”. 19 Tʼuri jakajkusïnga eska ma Tata Diosïjkusï jaka, ¿a no? Ka sési jarhasti engari ísï jakajkujka. Joperu demoniuechaksï jamberi jakajkusïndi ka chérakuarhesïndiksï. 20 Tʼu achamasï ísku apari, ¿andi nóri kurhangusïni eska méntku no marhuasïnga mintsikani ka jini méntku no ma ambe úni jarhani? 21 ¿Andi juchaari Taati Abraáni no niáraski ísï exenhani komueska kʼuiripu ma enga sési jámajka enga na kéjtsïtapkia altarirhu imeeri uájpa Isaakini? 22 Ka exeskaria eska ima ísï jámaspka eska na mintsikeenga ka imeeri úkuecha jimbo niáraspti sési sési mintsikani. 23 Ísï niáraspti úkuarhini ambe engaksï Karakateecharhu uandajka: “Abraáni mintsikaspti Tata Diosï Jeobani ka ima ísï exespti komueska kʼuiripu ma enga sési jámeenga”. Ka Tata Diosï Jeoba uandaspti eska Abraáni amigu jémbeespka.

24 Chájtsï míteskia eska kʼuiripu ma imeeri úkuecha jimbosï niárajka ísï exenhani komu nema enga sési jámajka ka no indeni jimbojku enga mintsikajka. 25 Májkueni, ¿andi Raabi, ima uarhiiti enga ísku jándiipka, no imeeri úkuecha jimbosï niárapi ísï exenhani komueska kʼuiripu ma enga sési jámeenga ísï tátsekua enga na sési eroapkia imeechani engaksï nípka echerini exeni ka enga ísï máteru xanhari jimbo axaantapka? 26 Ísï eska kuerpu na uarhijka enga nóteru jirejtajkia,* ísïsï no marhuajti mintsikani ka jini méntku no ma ambe úni jarhani.