Apokalipsisi
12 Jimajkani auandarhu kʼéri mínda ma xarharaspti: uarhiiti ma enga takusï ma jukarini japka enga ísï meremerexeenga eska jurhiata, luna imeeri jantsiriicharhu kétsekua jarhaspti ka korona ma jukajtsïspti enga 12 jóskuechani jukaapka. 2 Embarasada jarhaspti, ka uinhachaxapti xáni no sési pʼikuarherani jimboka ambakentapiringia.
3 Ka auandarhu xarharaspti máteru mínda: kʼéri dragoni ma xarharaspti enga xásï koloriipka komueska chpiri ka enga siete éjpuechani jukaapka ka 10 sïuanguechani, ka éjpuecharhu siete koroneechani* jukajtsïaspti; 4 chʼéti jingoni antsikuaxapti tersera parti jóskuechani engaksï auandarhu japka, ka echerirhu kʼuanijpaaspti. Ka dragoni jima anhandetini pakaraspti nani enga ima uarhiiti japka enga ambakentapiringia, para jimajku ántani uájpani enga na andajpenupiringa.
5 Uarhiiti, tataka sapichuni ma kánguarhispti enga iámindu kʼérati ireteechani eranguauaka komueska karichi eranguti ma, tiámueri pirimu ma jingoni. Tátsekuaksï euaspti tataka sapichuni ka Tata Diosïnksï pákuspti enga imeeri kʼéri uaxantskuarhu* jaka. 6 Ka uarhiiti desierturhisï niraspti sïpakuarhini, nani enga Tata Diosï ambantskakuka para ima jima pakarani ka nani enga 1,260 jurhiatikua tʼireranhapiringa.
7 Ka ueenaspti uarhiperanhani auandarhu. Migueli* ka imeeri ánjeliichaksï uarhiperaspti dragoni jingoni. Ka dragonijtu ka imeeri ánjeliichajtuksï uarhipespti, 8 joperuksï no úspti andani,* ka nóteruksï jurajkunhasptia paraksï auandarhu pakarani. 9 Jimajkani kétsekua kʼuanijpanhasti kʼéri dragoni, ióntki anapu akuitsi, enga ísï arhinhajka Noambakiti ka Satanási ka enga támisï jánhastaani* jaka iámindu imeechani engaksï echerirhu irekani jaka. Echerirhu kʼuanijpanhasti ka imeeri ánjeliichajtuksï imani jingoni kʼuanijpanhasti. 10 Ka kurhachakuspka nemani enga auandarhu uératini uandeenga:
“¡Juchaari Tata Diosï pʼímutantastia imeeri iretani, xarhatastia na enga xáni uinhapika ka imeeri Reinu uaxastakata jarhastia, ka imeeri Erakukata* ueenastia juramuni! Jimboka kétsekua kʼuanijpanhaska ima enga chkuanderakua ambe jauatakuajka juchaari erachiichani,* enga chúrikua ka jurhiakua chkuanderakua ambe jauatakuajka juchaari Tata Diosïni japarini. 11 Imeechaksï ústi andani Karichi sapichueri iurhirini jimbo ka imani ambe jimbo engaksï jámapka uandantani,* nóksï sánderu xénchakuarhisti* ka nóksï chésïreendi uarhini. 12 Ísï jimbo, ¡eska kánikua tsípiaka auanda ka iámindu imeecha engaksï auandarhu irekani jaka! Joperu, ¡lástima echerini jimbo ka marini jimbo! Jimboka Noambakiti kétseska jima engajtsï chá jaka ka kánikua ikiaxati jimboka mítetixaka eska nóteru ióni pakarakuxakaia”.
13 Jimajkani, enga dragoni exepka eska echerirhu kʼuanijpanhaspkia, niraspti andanguni imani uarhiitini enga tataka sapichuni kánguarhipka. 14 Joperu uarhiiti tsimani kʼésïichani* intsïnhaaspti kʼéri águileeri ma paraka desierturhu nipiringa kárani jima enga ambantskaminhapka, iauanisï nani enga akuitsi no úpiringa exeni ka jima tʼireranhapirindi tanimu tiempu ka terujkani.*
15 Ka akuitsi itsï uéchaspti komueska iurhekua ma, paraka iurhekua pápiringa uarhiitini ka jima uarhimeni. 16 Joperu echeri jurhaspti jarhuatani uarhiitini. Echeri arhataspti ka arhaspti iámu iurhekuani enga dragoni uéchapka. 17 Ísï jimbo, dragoni kánikua ikiakuspti uarhiitini ka niraspti uarhipeni imeeri uájpeecha jingoni engaksï útasï pakarani jaka. Íksï imeecheesti engaksï újka ambe enga Tata Diosï juramujka ka engaksï arhinhaka paraksï uandantani jámani Jesúsiiri ambe.