Mateu

25 ”Jiájkani, auandarhu anapu Reinu ísïisti komueskaksï 10 uátsïicha engaksï pʼíkuapka kandeleechani* ka engaksï uérapka paraksï nobiuni jingoni exejperantani. 2 Sinko uátsïichaksï jánhaskasïreendi ka máteru sinko uátsïichaksï no jánhaskasïreendi. 3 Imeecha engaksï no jánhaskeenga, pʼíkuasptiksï kandeleechani joperuksï no páspti aseiti, 4 ka imeecha engaksï jánhaskeenga pʼíkuasptiksï kandeleechani ka ístuksï páspti aseiti. 5 Ka jimboka nobiu ióndaxapkia, iáminduechaksï kʼuíiraspti jimbokaksï uarhixapka kʼuínchani. 6 Joperu terujkani chúrisï, nema uinhachaspti: ‘¡Janostia nobiu! ¡Ní je kúntani!’. 7 Jimajkani, iámindu uátsïichaksï jauaraspti ka tixataasptiksï* kandeleechani. 8 Ka imeecha engaksï no jánhaskeenga, arhiasptiksï imeechani engaksï jánhaskeenga: ‘Íntskujtsïni je sáni aseiti jimbokaksï juchaari kandeleecha pátakuarhixakaia’. 9 Ka imeecha engaksï jánhaskeenga, arhiasptiksï: ‘Jamberi aseiti no andanguati paraksïni íntskuni ka parachi jucha pakatani. Mejori ní je piákuani imeechani engaksï atarantajka’. 10 Joperu engaksï jamberi nípka piáni, janospti nobiu. Ka uátsïicha engaksï listu japka, imani jingonksï inchaspti tembuchakuarhu ka puerta míkuarhespti. 11 Tátsekuaksï junguaspti máteru uátsïicha ka arhisptiksï: ‘¡Tata, tata, mítachejtsïni!’. 12 Joperu nobiu arhiaspti: ‘Jíksïni sési jimbo arhisïnga eskaksïni no míteska’.

13 ”Ísï jimbo, méntkisï jingontku ja je, jimbokajtsï no míteska ambe jurhiatikua o na jandora úkuarhia i ambe.

14 ”Ístu, auandarhu anapu Reinu ísïisti komueska achamasï ma enga ióarhiapka imeeri jántspiriichani para imeeri jatsikuarhekua ambe jurajkukuani ante de iauanisï nirani. 15 Ka máechakuani sinko talentu* íntskuspti ka máteruni tsimani ka máteruni máechakua. Mándani arini, xánhachani íntsaaspti na engaksï xáni úpiringa ánchitani ka tátsekua iauanisï niraspti. 16 Ima enga sinko talentu intsïnhapka, jirejiresï niraspti ánchitani imani sentabuni ka máteru sinko talentu andaspti. 17 Ka imajtu enga tsimani talentu intsïnhapka máteru tsimani talentu andaspti. 18 Joperu ima enga máechakua intsïnhapka, niraspti jarhakuni ka jima jískaspti achamasïiri sentabuni.*

19 ”Ísï ióni jimbo, achamasï junguaspti ka kuenta pʼikuntaspti imeeri jántspiriicha jingoni. 20 Ima enga sinko talentu intsïnhapka, íntskuntaspti máteru sinko talentu ka arhispti: ‘Juchiiti tata, tʼureni sinko talentu íntskuspka ka exe, ji máteru sinko talentu andaska’. 21 Achamasï arhispti: ‘¡Sésiri úska, tʼuri ambakiti jántspiriiska ka mintsinharhikueskari! Jimbokari sési ánchikuarhiska ini namunitu ambe jingoni, jíkeni uánikua ambe jurajkuchiaka. Ju ka tsípikuarhi chiiti tata jingoni’. 22 Tátsekua niáraspti ima enga tsimani talentu intsïnhapka ka arhispti: ‘Juchiiti tata, tʼureni tsimani talentu íntskuspka ka exe, ji máteru tsimani talentu andaska’. 23 Achamasï arhispti: ‘¡Sésiri úska, tʼuri ambakiti jántspiriiska ka mintsinharhikueskari! Jimbokari sési ánchikuarhiska ini namunitu ambe jingoni, jíkeni uánikua ambe jurajkuchiaka. Ju ka tsípikuarhi chiiti tata jingoni’.

24 ”Ka últimu, jurhaspti ima enga ma talentu intsïnhapka ka arhispti: ‘Juchiiti tata, ji míteska eskari uinhamarhitspesïnga, eskari pʼikuntasïnga jima engari no jatsintaka ka eskari uarhotasïnga jima engari no kʼuájpaka.* 25 Jimbosïni chépka ka niraspka inchaskuni chiiti sentabuni. Exe, ariia ambe engareni íntskupka’. 26 Achamasï arhispti: ‘Jántspiri engari xáni no ambakeka ka xépitiini. Jiájkani, ¿tʼu mítespi eskani pʼikuntasïnga jima engani no jatsintajka ka eskani uarhotasïnga jima engani no kʼuájpaka? 27 Jiájkani jatsipiringari para juchiiti sentabuni jima páni nani enga sentabu patsanhajka ka engani na junguapiringia ji andakua jingoni euajpintapiringa’.

28 ”Tátsekua uandaspti: ‘Euanta je talentuni ka imani íntsku je enga 10 talentu kámani jaka. 29 Jimboka ima enga jatsika, niáraati sánderu intsïnhani ka sánderu uánikua ambe jatsini, joperu ima enga no jatsika, asta imani ambe euanhantaati enga jatsika. 30 Ka imani jántspirini enga no mintsinharhikueka uérakua peta je, jima enga pápkʼandeka. Jimasï pʼíaraati uerani ka kirisïmiantauati sïniichani’.*

31 ”Jiáni enga Achamasïiri Uájpa uinhapikua jingoni juuaka iámindu imeeri ánjeliicha jingoni, uaxakaati imeeri kʼéri uaxantskuarhu* para juramuni. 32 Iámindu ireteechaksï tánguarhintaati imani japarini ka ima arhukuantauati kʼuiripuechani ísï eska karichi eranguti na arhukuantajka karichiichani ka chibuechani. 33 Karichiichani jurhijkandani jimbo peerauati ka chibuechani uikixkandani jimbo.

34 ”Jimajkani Juramuti arhiauati imeechani engaksï jurhijkandani jimbo jaka: ‘Ju je chá engaksïni juchiiti Taati újchakuraka, pʼí je auandarhu anapu Reinuni enga jiáni ueenaka únhani para chá desde enga ueenaka jarhani parhakpini. 35 Jimboka jiáni engani kʼarhimani japka, chájtsïni tʼireraspka. Kʼarhichaxapka ka chájtsïni itsïmataspka. Nójtsïni mítespka ka sésijtsïni erokaspka. 36 Xáskuni jámaxapka* ka chájtsïni xukutaspka. Pʼamenchaspka ka chájtsïni exespka. Ónhakuarhetixapka ka chájtsïni jurhaspka exeni’. 37 Jimajkani imeecha engaksï sési jámajka, arhiatiksï: ‘Tata, ¿na jatinksïni exeski eskari tʼu kʼarhimaxapka ka juchaksïni tʼirerani o eskari kʼarhichaxapka ka juchaksïni itsïmatani? 38 ¿Na jatinksïni sési erokaspi nájkirukaksïni no mítepka? ¿Na jatinksïni exespi eskari xásku jámaxapka ka juchaksïni xukutani? 39 ¿Na jatinksïni niraspi exeni engari pʼamenchani japka o engari ónhakuarhetini japka?’. 40 Ka Juramuti arhiauati: ‘Jíksïni sési jimbo arhisïnga eskajtsïni jíndenisï úchika ambe engajtsï xáni úka máisï juchiiti erachini* jimbo enga sánderu sapichueka’.

41 Ka imeechani engaksï uikixkandani jimbo jaka arhiauati: ‘Kéndikuchejtsïni je chá engajtsï no sési arhinhaka. Ní je jima enga méntku kurhini jaka, enga úkata jaka para Noambakiti ka para imeeri ánjeliicha. 42 Jimbokani kʼarhimaxapka ka chájtsïni no tʼireraspka. Ka kʼarhichaxapka ka chájtsïni no itsïmataspka. 43 Nójtsïni sési erokaspka jiáni engajtsïni no mítepka. Xáskuni jámaxapka ka chájtsïni no xukutaspka. Pʼamenchaspka ka ónhakuarhetixapka ka chájtsïni no niraspka exeni’. 44 Jimajkani imeechaksï arhiati: ‘Tata, ¿na jatinksïni exeski eskari kʼarhimaxapka o kʼarhichani oksïni no míteni o eskari xásku jámaxapka o pʼamenchani o eskari ónhakuarhetixapka ka nóksïni jarhuatani?’. 45 Jimajkani Juramuti arhiauati: ‘Jíksïni sési jimbo arhisïnga eskajtsïni jíndenisï no úchika ambe engajtsï no úka máisï juchiiti erachini jimbo enga sánderu sapichueka’. 46 I kʼuiripuechaksï méntku kʼamajkunhaati, joperu imeecha engaksï sési jámajka intsïnhaati tsípikua para méntkisï”.