Roma

9 Ji jurhimbikua jingoni uandasïnga komueska Kristueri chúxapati, no chkuanderasïnga ka juchiiti mintsita* mítesti ka uandantasïndi 2 eskani kánikua kómu pʼikuarherasïnga ka eskani méntkuni no sési pʼikuarhinheni jarhasïnga mintsitarhu. 3 Engani ji úpiringa ísï jarhuataani, sánderu sési japirindi eskani ji kastigarhinhapiringa ka no juchiiti erachiicha,* judiuecha engaksï no Kristueri chúxapatiika. 4 Tata Diosï israeliteechanisï erakuapti para ísï pʼíkuantani komueska imeeri uájpeechani, indeechanisï kʼéri ambe uaapti, indeechani jingonisï pakatperapti, ka íntsaaspti Lei ka sésikua paraksï kómarhini ka uánikua ambe aiakuaspti. 5 Indeechaksïsï jindeeti juchaari ióntki anapu parientiicheeri uájpeecha ka indeecha jimbosï juti Kristu. Eska Tata Diosï kʼéri ambe arhinhaaka para méntkisï, ima enga juramutiika iámindu ambeeri. Eska ísï úkuarhiaka.

6 Joperu no jimboka no niáraska úkuarhini ambe enga Tata Diosï aiatspipka. Jimbokaksï no iámindu Israeli uájpeechasï jindeeti “Israeli”. 7 Ístu nájkirukaksï Abraáni uájpeeka, nóksï iámindu uájpeesti Tata Diosïni japarini, sánderu sési, ísïisti eska na karakata jaka: “Isaakini jimboksïsï juuati imeecha engaksï arhinhaaka eskaksï chiiti uájpeeska”.* 8 Jiájkani i ambe arhikuekasïndi eskaksï Abraáni uájpeecha no Tata Diosïiri uájpeeska, imaksïsï Abraáni uájpeeti engaksï andajpenuka indeni jimbo enga Tata Diosï aiatspeka. 9 Jimboka Tata Diosï ísï aiatspespka: “Ma uéxurhini jimboisï junguaka ka Sara sapini ma kánguarhiati”. 10 Tata Diosï májkueni aiatspespti jiáni enga Rebeka jemeluechani kánguarhiapka Isaakini jimbo, juchaari ióntki anapu parienti. 11 Tata Diosï tʼuini uandarixaptia na enga erakupiringa kʼuiripuni ma, joperu no erakusïndi imani ambe jimbo enga újka, sánderu sési, imanisï erakujti enga ima uéjka. Ísï jimbo, engaksï i jemeluecha nótki andajpenuni japka ka ante deksï ambakiti ambe úni o no sési ambe niátani, 12 Rebeka arhinhaspti: “Ima enga sánderu kʼériika, jántspikuati imani enga sánderu sapichueka”. 13 Ísï eska na karakata jaka: “Jakobuni xénchaska, joperuni ikiakuska Esaúni”.

14 Jiájkani, ¿ambechi uandaa? ¿Tata Diosï no sési ambe úxaki? ¡Nómbe! 15 Jimboka arhiska Moisésini: “Ji xénchaaka imani engani ji uékaaka xénchani ka pʼamojkuaka imani engani ji uékaaka pʼamojkuni”. 16 Ísï jimbo, Tata Diosïsï erakujti kʼuiripuni ma, no jimboka kʼuiripusï ísï uékaaka o jimboka xáni jánguarhintaaka,* sánderu sési, jindeesti jimboka Tata Diosï pʼamojpisïnga. 17 Jimbokaksï Karakateecha arhisïnga Ejiptu anapu juramutini:* “Jíkeni arini ambe jimbosï jurajkuni jaka parari útasï tsípiti jarhani: parani tʼungini jimbo xarhatani na engani xáni uinhapitiika ka paraka iámu parhakpinirhu uandanhantaaka juchiiti nombri”. 18 Ísï jimbo, ima pʼamojkusïndi néni enga ima uékaaka pʼamojkuni, joperu enga ima ísï uékaaka, jurajkusïndi para kʼuiripu ma no ma ambe kurhanguni.

19 Joperu tʼureni arhiaka: “¿Andichisï no újki jaiapanherantani Tata Diosïni? ¿Andi uaa nema ójkutani paraka no úkuarhiaka ambe enga ima uéjka?”. 20 Joperu, ¿neeskiri tʼu parari ísï mókukuni jarhani Tata Diosïni? ¿Andi úkata ma úsïni arhini imani enga úka “¿Andirenisï xájku?”? 21 ¿Andi ima enga kʼuerekua* jingoni ánchikuarhijka no sésikua jatsiski para imani kʼuerekua jingoni jatakua ma úni enga kʼuínchikuecharhu úranhajka ka máteru para ísku úranhani? 22 Ka májkueni ústi Tata Diosï, ima uékasïreendi xarhatani na enga xáni ikiani japka ka na enga xáni uinhapitiika, joperu kánikua tekaakuantasti imeechani engaksï ikiatapka ka imeechani engaksï jatsipka para kʼamajkunhani. 23 Ima ini ambe ústi para xarhatakuani imeechani* enga pʼamojkuaka na enga xáni kʼéri ambeeka, imeechani engaksï kóndenhantaka ísï eska ima na eratsekata jatsipkia, 24 juchantsïni engajtsïni ióarhika ka no solu judiuechani sino ístu imeechani engaksï no judiueka. 25 Ísïisti eska ima na uandapka Oseasiiri karakateecha jimbo: “Imani enga no juchiiti ireteepka, ‘juchiiti ireta’ arhiaka ka imani uarhiitini engani no xéncheenga, arhiaka eskani xénchasïnga. 26 Jima engaksï arhinhapka ‘Chájtsï no juchiiti ireteeska’, jimaminduksï arhinhaati ‘Tata Diosïiri uájpeecha, ima Tata Diosïiri enga tsípiti jaka’”.

27 Ístu, Isaíasi ari ambe uandasïndi Israeliiri ambe: “Nájkirukaksï Israeli uájpeecha xáni uánikueuaka komueska marirhu anapu kutsari, namunitkuksïsï pʼímutanhantaati. 28 Jimboka Tata Diosï Jeoba sóntku jusgariuaka iámu parhakpinini”. 29 Ka ísïisti eska Isaíasi na uandapkia: “Enga Tata Diosï Jeoba, enga jindeeka auandarhu anapu juramuti, no tsípiti jurajkuapiringa máru juchaari ióntki anapu parientiichani, jucha ísïipiringa komueska Sodoma ka sáno májkueniipiringachi eska Gomorra”.

30 Jiájkani, ¿ambechi uandapirini? Eskaksï ima kʼuiripuecha engaksï no judiueka mintsikaska Tata Diosïni ka ísïksï exenhasti komueska kʼuiripuecha engaksï sési jámajka, nájkirukaksï imeecha no eratsetini japka ísï exenhani. 31 Joperu Israeli anapuecha, nájkirukaksï jánguarhintani japka jaiapanherantani Tata Diosïni úparini ambe enga Lei uandajka, nóksï ústi ísïmindu úni eska Lei na uandajka. 32 ¿Joperu andi? Jimbokaksï eratsesïreenga eskaksï imeecheeri úkuecha jimbosï sési jámani japka ka no jimbokaksï mintsikasïreenga. Téksarhutastiksï imani “tsakapu jingoni enga téksarhutaraajka kʼuiripuechani”; 33 ísï eska na karakata jaka: “¡Exe je! Tsakapu ma peeraxaka Sioni enga téksarhutaraajka kʼuiripuechani ka enga kuáskuajka,* joperu ima enga mintsikaaka ini tsakapuni, no méni no sési pʼikuastanhaati”.*