Úkuecha

17 Jimajkani, Anfípolisisïksï nitamaspti ka Apoloniaisï ka tátsekuaksï Tesalónika niáraspti, jima jarhaspti kʼumanchikua ma nani engaksï judiuecha tánguarhijka para Tata Diosïni kómarhini. 2 Ka ísï eska na pʼindepkia, Pablu inchaspti nani engaksï imeecha japka, ka tanimu sábadu jarhuataaspti paraksï kurhanguni ambe engaksï Karakateecha arhijka. 3 Sési aianguasïreendi iámu ambe ka arhiasïreendi nani enga arhienga Karakateecharhu eska Kristu jatsispka para no sési nitamakuarhini ka tsíntani. Arhiasïreendi: “Jesúsi jindeesti Kristu ka jíksïni imeeri ambesï aianguni jaka”. 4 Ini ambe jimbo, máruksï ueenaspti jakajkuni ka tátsekua imeechajtu Pablu ka Silasi jingonksï jámasïreendia. Ka májkuenksï úspti uánikua kʼuiripuecha engaksï grieguepka ka engaksï Tata Diosïni kómarhienga ka ístu uánikua uarhiitiicha engaksï kʼéri ambeepka.

5 Joperu judiuechaksï enbidia jimbo tánaantaspti máru acheetiichani engaksï no sési úriipka ka engaksï ísku jámani japka merkadurhisï, ka sánderu uánikua kʼuiripuechanksï tánaantaspti ka iichaksï ueenaspti no sési jámani iretarhu. Jimajkani, nirasptiksï jirinhantani Pabluni ka Silasini Jasóniiri kʼumanchikuarhu, paraksï imani kʼuiripuechani jurajkukuani engaksï no sési jámani japka. 6 Ka jimbokaksï no exeantaspka, antsikupasptiksï Jasónini ka máru erachiichani* paraksï iretarhu anapu juramutiichani jingoni paani ka uinhachasïreendiksï: “Ixúksï jamberi janostia ima achamasïicha engaksï iápurisï jámani jaka no sési ambe úni 7 ka Jasóni jingonksï pakaraxati. Ka iámindu i achamasïichaksï no úxati ambe enga Roma anapu juramuti* uandajka, jimbokaksï uandasïnga eska jarhaska máteru juramuti: Jesúsi”. 8 Ka kʼuiripuechaksï ka iretarhu anapu juramutiichaksï kánikua chérakuarhespti engaksï ini ambe kurhaapka, 9 ísï jimbo, Jasóni ka máteru erachiichaksï maiampispti paraksï úni jurajkunhani ka tátsekuaksï jurajkunhasptia.

10 Ima chúri, erachiichaksï Berea axaspti Pabluni ka Silasini. Ka engaksï na niárapka, nirasptiksï jima engaksï judiuecha tánguarhijka para Tata Diosïni kómarhini. 11 Joperu i iretarhu anapu judiuechaksï sánderu tsitisïreendi jorhenguarhini ka eska Tesalónika anapuecha, jimbokaksï mintsita jingoni jiókuarhispka Tata Diosïiri uandakuani ka pauani pauanksï arhintasïreendi ambe enga arhijka Karakateecharhu, paraksï exekuarhini sini ísïispi ambe engaksï arhinhani japka. 12 Ísï jimbo, uánikua kʼuiripuechaksï ueenaspti jakajkuni ka májkuenksï úspti uánikua uarhiitiicha engaksï grieguepka ka engaksï kʼéri ambeepka ka ístu máru achamasïicha. 13 Joperu engaksï Tesalónika anapu judiuecha mítepka eska Pablu ístu uandantaxapka Tata Diosïiri uandakueri ambe jini Berea, jiniksï niraspti paraksï kʼuiripuechani ikiataani ka ueenanksï no sési jámani. 14 Jimboksïsï erachiicha jirejiresï nípti petaatantani Pabluni marirhisï, joperu Silasi ka Timoteu jimaksï pakaraspti. 15 Joperu imeecha engaksï nípka Pabluni pámbetani, Atenasi jamberiksï páspti ka tátsekuaksï kʼuanhatsentaspti paraksï arhini Silasini ka Timoteuni eskaksï nipiringa kókuani Pabluni jingoni.

16 Joperu jiánisï, enga Pablu Atenasi erokaani japkia, ima* no sési pʼikuarheraspti enga exepka eskaksï iretarhu iápurisï jarhaspka diosï úkateecha. 17 Ísï jimbo, jánhastaasïreendi judiuechani ka máteru kʼuiripuechani engaksï kómarhienga Tata Diosïni paraksï úni kurhanguni ambe enga arhijka Tata Diosïiri uandakua, ka ísï úsïreendi jima engaksï judiuecha tánguarhijka para Tata Diosïni kómarhini. Ka ístu pauani pauani májkueni úsïreendi imani kʼuiripuechani jingoni engaksï merkadurhisï jarheenga. 18 Joperu máru kʼuiripuecha engaksï kánikua tsitienga eratsentani ambe ma, engaksï arhikuarhienga epikúriuecha* ka máteruecha estoikuecha,* ueenasptiksï imani jingoni arhirperani. Máruksï uandasïreendi: “¿Ambe xáni uandani jaki inde ísku apari?”. Ka máteruechaksï uandasïreendi: “Enajki no ixú anapu diosïicheeri ambe aianhpini jaki”. Ka ísïksï uandasïreendi jimboka ima uandantani jámasïreenga ambakiti aianhperakuani Jesúsiiri ambe ka ístu tsíntskueri ambe. 19 Ísï jimbo, jupikasptiksï ka Areópaguksï páspti. Arhisïreendiksï: “Aiangujtsïni, ¿ambe arhikuekasïni inde jimbanhi ambe engari jorhentpini jaka? 20 Jimbokari imani ambe uandaxaka engachi jucha no méni kurhaani japka ka uékasïngachi míteni ambe arhikuekasïni”. 21 Ka engaksï no ma ambe úkua jatsienga, Atenasi anapuecha ka uérakua anapuechaksï pʼindespti méntku jimbanhi ambe uandantani jarhani o kurhandini jarhani ambe engaksï máteruecha uandanteenga. 22 Jimajkani Pablu terujkani niáraspti Areópagurhu ka uandaspti:

“Atenasi anapu achamasïicha, ji ísï exesïnga enajkijtsï chá iámindu ambe jimbo sánderu janhanharhiajki* diosïichani ka eska máteru kʼuiripuecha. 23 Jimboka engani jimeesïsï jámani japka uanarhurani sáni, iámindu imani ambe exeska engajtsï chá kómarhijka ka altarini ma exentaska enga arhijka: ‘I altari jindeesti para ima Tata Diosï engachi no míteka’. Jíksïni ima Tata Diosïiri ambesï aianguni jaka engajtsï chá kómarhijka joperujtsï no míteni. 24 Tata Diosï enga parhakpinini úka ka ambe enga xáni jaka parhakpinirhu, ima jindeesti auandarhu ka echerirhu anapu Tata, ísï jimbo, ima no irekasti templuecharhu engaksï kʼuiripuecha uaajka. 25 Ístu, ima no uétarhinchasïndi eskaksï kʼuiripuecha marhuakuni jauaka, jimboka ima no ma ambe uétarhinchasïnga, jimboka imasï tsípikua íntskuajti iámindu kʼuiripuechani ka tarhiata paraksï jirejtani ka iámindu ambe. 26 Ma achamasïni jimbojku, uánikua ireteechani kuerauasti parakaksï niárapiringa iámu parhakpinirhisï irekani, ka uaxastasti na enga jatini úpiringa ambe ma ka ambantskantasti nani engaksï jamberi irekapiringa kʼuiripuecha. 27 Ísï ústi parakaksï jirinhantapiringa Tata Diosïni ka únksï exentani nájkirukaksï pʼapʼajkurhaparini jámapiringa jirinhantani, jimboka ima no iauani jarhaska juchantsïni jingoni. 28 Jimboka imani jimbochisï tsípikua jatsika ka jámanchi jarhani ka jindeenchi. Ísï eskaksï na uandapka chaari karariicha máru: ‘Jimbokachi juchajtu imeeri uájpeeska’.

29 ”Ísï jimbo, jimbokachi Tata Diosïiri uájpeeska, nóchi jatsiska para eratseni eska Tata Diosï xáxeska komueska ambe ma enga oru, plata o tsakapu jingoni úkata jaka. Ima no xáxesti komueska ima ambe engaksï kʼuiripuecha eranhaskajka ka tátsekuaksï jájki jimbo úni. 30 Ísïisti, Tata Diosï ísï úspti enajki no ma ambe exe jiáni engaksï kʼuiripuecha no ma ambe mítepka imeeri ambe, joperu iásï iápurisï arhiaxati iáminduechani eskaksï móantaaka. 31 Jimboka ima uaxastaskia na jatini sési jusgariuaua iámu parhakpini anapu kʼuiripuechani ka achamasïni ma erakusti para ísï úni. Ka iámindu kʼuiripuechaksï uaati mintsikani eska ísï úkuarhiaka jimboka ima tsítantaska ini achamasïni”.

32 Ka enga ima ueenapka aianguani eskaksï uarhiriicha úsïnga tsíntani, máruksï ueenaspti teresmarhuni ka máteruechaksï arhispti: “Máteru jimbojtsïni aianguakia indeeri ambe”. 33 Ísï jimbo, Pablu kéndikuspti jima uératini 34 joperu máru achamasïichaksï niraspti imani jingoni ka ueenasptiksï jakajkuni. Máruksï jindeespti Dionisiu, enga kuenta úkuarhienga imani juesiichani jingoni engaksï Areópagurhu japka, ka uarhiiti ma enga Dámarisi arhinheenga ka ístu máteru kʼuiripuecha.