Apokalipsisi
11 Ka íntskusptijtsïni pʼatamu ma enga xáxepka eska pirimu ma enga jindeeka para tsʼéritani,* ka imarini arhixapti: “Jauara ka tsʼérita santuariuni enga Tata Diosïiri templurhu jaka, ístu altarini ka imeechani engaksï jima kómarhijka imani. 2 Joperu asï tsʼérita santuariurhu ekuaru enga templurhu jaka, jimbokaksï kʼérati ireteecha jurajkuminhaska, ka iichaksï 42 kutsï tʼauanduntaati pímbinhasï iretani. 3 Uaaka eskaksï juchiiti tsimani testiguecha 1,260 jurhiatikua jámaaka uandantani ambe enga úkuarhiaka chʼechʼerasï takusïksï jukarini”. 4 Tsimani olibusïicha ka tsimani kandela jatakuecha, ini tsimani testiguechanksï arhikuekaasïndi, ka iichaksï echerirhu anapu Tatani japarini anhandetixati.
5 Enga nema jámajka no sési úkuani, imeechaksï chpiri uéchasïndi enga kʼamajkuajka imeechani engaksï ikiakuajka. Ísïksï uarhiati iámindu imeecha engaksï uékaaka no sési ambe úkuani. 6 Imeechaksï jatsisti juramukua paraksï míkani auandani ka nóksï jurajkuni eska janiaka jiánisï engaksï jámaaka uandantani ambe enga úkuarhiaka. Ístuksï jatsisti juramukua paraksï iurhiri úntani itsïni ka paraksï mámaru jásï kastigu jingoni no sési úkuni echerini na engaksï jatini uékaaka.
7 Engaksï na kʼamaraakia uandantani, no sési jásï animali enga jima uérajka nani enga xáni jauanhika,* imeecha jingoni uarhipeati, andauati ka uándikuauati. 8 Uarhiriichaksï ísku jándentaati xanharisï kʼéri iretarhu, —Sodoma ka Ejiptu indeni iretanksï arhikuekasïndi—, ka ístu indeni kʼéri ireta jimbo, cháparhatasptiksï chkarirhu ma indeecheeri Tatani. 9 Táchanisï iretarhu anapuecha, mámaru kʼumanchikuarhu anapuecha, imeecha engaksï táchani jásï idioma uandajka ka kʼérati iretarhu anapuecha, tanimu jurhiatikua ka terujkani exeauatiksï indeni uarhiriichani ka nóksï jurajkuati eskaksï jatsinhantaaka inde uarhiriicha. 10 Ka imeecha engaksï echerirhu irekani jaka sésiksï pʼikuarheraati ka kánikuaksï tsípiati engaksï ísï uándikunhaka, ka intsïmperata ambeksï axatsperaati jimbokaksï inde tsimani Tata Diosïiri uandakua páriicha* no sési pʼikuastaaspka imeechani engaksï echerirhu irekani jaka.
11 Enga na nitamapkia tanimu jurhiatikua ka terujkani, incharhiaspti inde tarhiata* enga tsípikua íntspijka ka enga Tata Diosïiriika ka imeechaksï jauaraspti. Imeecha engaksï exeapka, kánikuaksï chérakuarhespti. 12 Jimajkani imeechaksï kurhachakuspti nemani enga auandarhu uératini uinhachapka, ka arhiasïreendi: “Ju je ixúani karharani”. Ka imeechaksï auandarhu karhanchespti nube ma jimbo ka imeecha engaksï ikiakuauenga exeasptiksï.* 13 Jirejiresï* ueenaspti uinhamu jencheni. Desima parti ireta xerekuarhentaspti ka 7 mili kʼuiripuechaksï uarhispti jenchekua jimbo. Máteruechaksï kánikua chérakuarhespti ka kʼéri ambeksï arhispti auandarhu anapu Tata Diosïni.
14 Nitamastia máteru kʼéri uandanhiata, ini jingonksï tsimaniistia. ¡Jingontku ja je! Jimboka no ióni jimbo juuaka máteru, paraksï tanimuenia.
15 Máteru ánjeli kústaspti imeeri trompetani, ini jingonksï sieteesptia. Jimajkani ueenaspti uinhachanhani auandarhu ka uandasïreendiksï: “Juchaari Tata Diosïiri Reinu ka imeeri Erakukateeri,* juramukuaxatiia kʼuiripuechani, ka ima juramuati para méntkisï”.
16 Inde 24 orhejtsïkutiicha engaksï Tata Diosïni japarini uaxakatini japka imeecheeri kʼéri uaxantskuecharhu,* tinguixurhisptiksï ka kómarhisptiksï Tata Diosïni. 17 Uandasptiksï: “Diosmaiamukuaksïni arhisïnga, Tata Diosï Jeoba, tʼu engari iámindu ambe újka úni, engari jaka ka engari japka, jimbokari chiiti jájkirhu jatsiskia uinhapikua ka ueenaskaria juramuni. 18 Joperuksï kʼérati ireteecha kánikua ikiaspti, ka tʼujturi kánikua ikiaska, ka niárasti inde jurhiatikua enga uaxastakata japkia para jusgariuani uarhiriichani ka para kóndeantani imeechani engaksïni jántspichejka, chiiti uandakua páriichani ka ístu pímbinharhatiichani ka imeechani engaksï janhanharhijka chiiti nombrini, sapirhatiichani ka ístu kʼératiichani, ka para kʼamajkuani imeechani engaksï kʼamajkuni* jaka echerini”.
19 Jimajkani, jini auandarhu mítakuarhespti santuariu enga Tata Diosïiri templurhu jaka ka templurhu anapu santuariurhu eraakuarhispti arka imeeri pakatperakueri. Ka ueenaspti piritani ka uinhamu charasïreendi, ísï kurhaakuarhisïreendi enajki uandanhani japi, uinhamu jenchespti ka uinhamu xanuaspti.