Segundu Karakata para Korintu anapuecha
3 ¿Andi juchaksïni jatsiski para ménderu arhini neeskichi jucha? ¿O uétarhisïni eska jauaka karakata ma enga sési ambe uandaaka juchaari ambe? ¿O uétarhijki eskajtsï chá karaaka i jásï karakata ma? Méntku nómbe. 2 Chájtsïsï jindeeka karakata ma enga juchaari mintsitarhu karakata jaka ka iámindu kʼuiripuechaksï mítestia indeni karakatani ka ístuksï arhintastia. 3 Jimboka, sési jimbo, chájtsï jindeeska Kristueri karakata ma engachi jucha karaka, jimbokachi jucha Tata Diosïni marhuakusïnga. Ka i karakata no tinta jingoni karakata jarhasti, sino Tata Diosïiri espiritu jingoni, ima Tata Diosïiri enga tsípiti jaka. Ka no tsakapurhusï karanharhikukata jati, sino juchaari mintsitarhu.
4 Jimboka Kristuni jimbo, Tata Diosïjtsïni jarhuatasïndi parachi jucha sési xékuarhini.* 5 Jucha no uandaxaka eskani juchasï xáni jorhenaka ambe ma úni, sánderu sési, Tata Diosïni jimboesti engani jucha indeni ambe jorhenaka úni. 6 Tata Diosïjtsïnisï jorhendati parachi jimbanhi pakatperakua ma jimbo marhuakuni, joperuchi no ísï marhuaxaka eska na karakata jaka Leirhu, sánderu sési, ísïchi marhuaxaka eska na uandajka espiritu. Jimboka uarhikuarhu pájpisïnga ambe enga Leirhu karakata jaka, joperu espiritu tsípikua íntspisïndi.
7 Ka inde Lei enga uarhikuarhu pájpijka ka enga tsakapurhu karanharhikunhapka, xáni tʼíntskua jingoni niárasti engaksï Israeli uájpeecha no jamberi ueenga erateni Moisésini, jimboka ima kánikua meremerenharhixapka ka inde t’íntskua niárapirindi kʼamajkunhani. 8 Jimajkani, ¿no jatsipirini para sánderu tʼíntskua jingoni íntspinhani espiritu santu? 9 Enga kánikua tʼíntskapka inde Lei enga kastigarpijka, jimajkani, ¡sánderu kánikua tʼíntskaati ima ambe enga jarhuataajka kʼuiripuechani paraksï sési jámani! 10 Jimboka inde ambe enga ióntki tʼíntskeenga iásï nóteru tʼíntskasïndia, jimboka iásï jarhaska ambe ma enga sánderu kánikua tʼíntskajka. 11 Enga ióntki xáni t’íntskua jingoni niárapka inde ambe enga kénditanhapiringa, jimajkani, ¡sánderu kánikua tʼíntskaati inde ambe enga pakaraaka!
12 Ka jimbokachi jucha indeni ambe mintsikaxaka, juchachi no sáni chéparini uandasïnga 13 ka nóchi ísï jámasïnga eska Moisési enga takusï ma jingoni ónharhienga parakaksï Israeli uájpeecha no exepiringa Leiiri tʼíntskuani* enga ísï tátsekua kénditanhapiringa. 14 Joperu imeechaksï no úsïreendi kurhanguni. Ka iásï jamberi enga arhikuarhintajka ióntki anapu pakatperakua, imaksï útasï ísï jarhasïndi enajkiksï takusï ma jingoni ónharhitini jaki, jimboka Kristujkusï újka pʼenonharhikuani. 15 Ístu, iásï jamberi imeecheeri mintsita ójchakurakata jarhasti, jimboksïsï no újti kurhanguni ambe enga Moisési karaka. 16 Joperu engachi Tata Diosï Jeobaeri xanharu jimbo jámajka, pʼenonharhisïngachi. 17 Tata Diosï Jeoba Espiritu máesti, ka ima kʼuiripu enga jatsika Tata Diosï Jeobaeri espiritu santu, no jántspiriisti. 18 Ka iámindu jucha engachi pʼenonharhikia, ísïiskachi komueska espeju ma enga xarhatajka na enga xáni kʼéri ambeeka Tata Diosï Jeoba. Juchachi mójtakunhaxaka parachi ísïini komueska Tata Diosï, ka parachi sánhani arhini sánderu sési xarhatani na enga xáni kʼéri ambeeka Tata Diosï ka ísïminduchi úni eska Tata Diosï Jeoba na uéjka, ima enga Espiritu máeka.*