Filipusï
2 Ka jimbokajtsï chá Kristueri chúxapatiiska, jánguarhinta je uinhaperaantani máteruechani ka sési pʼikuastaantani jimbokajtsï xénchaasïnga; ístujtsï jatsiska para uandanhiani máteruechani jimbo, ka ístu xénchaa je ka pʼamojkua je. 2 Ísï jimbo, xarhata je eskajtsï májkueni eratsesïnga, eskajtsï májkueni xénchperasïnga, eskajtsï májku kʼéri jarhaska ka eskajtsï májku eratsekua jingoni jámasïnga. 3 Nójtsï jatsiska para úrhutani máteruecha jingoni ojtsï kʼéri ambe exekuarhini, sánderu sési, kaxumbi je ka ísï exea je máteruechani eskaksï sánderu kʼéri ambeeska eska chá, 4 ka ístu méntkisï uandanhia je máteruechani jimbo ka nójtsï chaari ambe jimbojku uandanhiani.
5 Seguirii je májkueni eratseni eska Kristu Jesúsi. 6 Nájkiruka ima sáno májkueniipka eska Tata Diosï, no méni jámaspti eratseni eska úpiringa ísïini eska Tata Diosï. 7 Nómbe, sánderu sési, jurajkuspti iámindu ambe* ka niáraspti ísïini komueska jántspiri ma ka ístu niáraspti jindeeni* kʼuiripu ma. 8 Ka enga ísï jupka* komueska kʼuiripu ma, ísku exekuarhispti ka méntkisï kurhajchaspti asta ima jurhiatikua enga uarhika, jo, chkarirhu ma uarhisti enga jindeeka para no sési nitamakuarhini.* 9 Ísï jimbo, Tata Diosï kʼéri ambe ústi imani, ka jimboka xénchasïnga, íntskusti sánderu kánikua juramukua eska náki uéjki kʼuiripuni ma,* 10 paraka Jesúsiiri nombri jimbo, iáminduechaksï tinguixurhiaka, imeecha engaksï auandarhu jaka, imeecha engaksï echerirhu jaka ka ístu imeecha engaksï inchatsetini jaka, 11 ka paraksï iámindu kʼuiripuecha uandantani eska Jesukristu jindeeska Tata, para kʼéri ambe arhinhani Tata Diosï, ima enga jindeeka Taati.
12 Ísï jimbo juchiiti erachiicha* engaksïni ji xáni xénchajka, chájtsï méntkisï kurhandirasïnga, ka no jiántku engani ji chánksïni jingoni jarhajka, sino sánderia jiáni engani ji no chánksïni jingoni jarhajka. Ísï jimboksïnisï arhini jaka eskajtsï seguiriini jauaka jánguarhintani parajtsï úni pʼímutanhantani. Ísï ú je kánikua janhanharhiparini Tata Diosïni ka chénharhiparini. 13 Jimboka Tata Diosïksïnisï uinhaperantajti parajtsï chá úni jaiapanherantani, jimbokaksïni imasï jarhuatajti parajtsï chá uékani úni ambe ma ka ístuksïni íntskusïndi uinhapikua parajtsï ísï úni. 14 Seguirii je iámindu ambe úni, joperu asï jáma je uandauandamini nijtu máteruechani jingoni arhirperani, 15 jimbokajtsï Tata Diosïiri uájpeeska engajtsï pímbinhasïika ka engajtsï no ma ambe no sési niátajka; ka indeni jimbo engajtsï chá no ma ambe no sési exeminhajka, chájtsï meremerexexaka ini parhakpinirhu iásï anapu kʼuiripuechani japarini engaksï támisï jámajka ka engaksï xáni no sési úriika. 16 Ísï jimbo, méntku asï jáma je jurajkuni Tata Diosïiri uandakuani enga tsípikua íntspijka. Ísï kʼóruni kánikua sési pʼikuarheraaka Kristueri jurhiatikua jimbo, jimbokani míteaka eskani no ísku jatini uiriiska ka eskani no ísku jatini xáni uinhamu ánchikuarhiska. 17 Joperuni ji ísï kéjtsïtanhaxaka komueska binu ka jarhuataxakaksïni parajtsï chájtu kéjtsïtani ka parajtsï sési marhuakuni Tata Diosïni ka jíjtuni sési pʼikuarherasïnga ka kánikua tsípixaka iámindu chánksïni jingoni. 18 Ka chájtujtsï jatsiska para tsípini, ka ju je májku kʼéri tsípini.
19 Ka ji mintsikaxaka Jesúsini* paraksïni no ióni jimbo axacheni Timoteuni ka parani ji sési pʼikuarherantani engareni ima na aianguakia nájtsï jámaxaki chá. 20 Jimboka no nema jarhaska ixú enga ísï jámajka eska inde, jimboka inde kánikua uandanhiasïnga chánksïni jimbo. 21 Jimbokaksï máteruecha imeecheeri ambe jimbojkusï uandanhiajti ka nóksï uandanhiasïndi tata Jesukristueri ambe jimbo. 22 Joperujtsï chá sési mítetixaka eska inde no ísï jámasïnga, jimboka jíndeni jingoni jámaska ánchikuarhini para uandantani ambakiti aianhperakuani, ísï eska sapi ma na jámajka imeeri taati jémba jingoni. 23 Jimbosïni indeni uékani jaka axani engani na míteakia ambe úkuarhinchaa ji. 24 Ka ji kánikua mintsikaxaka Tatani eskani jíjtuni no ióni jimbo uaaka chánksïni jingoni jarhani.
25 Joperuni ji sési exexaka Epafroditunksïni axacheni, imani engajtsïni chá axacheka parareni jarhuatani, juchiiti erachini enga jíndeni jingoni ánchikuarhijka ka imajtu Kristueri sondaduesti. 26 Indeksïni kánikua jirinhantaxatiia ka kómu pʼikuarheraxati jimbokajtsïnha chá mítespka eska ima pʼamenchaxapka. 27 Ka ísïisti, uinhamu jarhaspti, sáno uarhispti. Joperu Tata Diosï pʼamojkusti ka jíndenturini pʼamojkusti parani ji no méntku kómu pʼikuarherani jarhani. 28 Jimboksïnisï axachentani jaka parajtsï chá tsípini engajtsï na exentaakia ka parani ji nóteruni xáni no sési pʼikuarherania. 29 Ísï jimbo, sési eroka je ísï eskajtsï na eroajka Tateeri chúxapatiichani kánikua tsípikua jingoni. Ka méntkisï sési kaa je indeeni járhati achamasïichani, 30 jimboka ima sáno uarhiska enga Kristueri* ánchikuarhitani úni japka. Ima sáno uarhispti parareni jíndeni jarhuatani jimbokajtsï chá no ixú jarhaspka parajtsïni jarhuatani.