Segundu Karakata Pedrueri
2 Joperu ísï eskaksï iretarhu na japka Tata Diosïiri uandakua pári* arhikateecha, chánksïni jingontuksï jauati jorhentpiri arhikateecha. Imeechaksï sïpatikuarku jámaati parajtsï chá ueenani táchanisï eratseni ka nóterujtsï mintsikania,* ka ístuksï nóteru jamberi jaiapanhentaatia imani* enga maiampika imeechani jimbo, ka indeni ambe jimbo, jandiajkuksï jirinhakuarhini jauati eskaksï sóntku kʼamajkunhaaka. 2 Ístu, uánikuechaksï májkueni jámaati eska imeecha engaksï no sáni kʼuratsekua jingoni niátajka no sési jásï ambe,* ka jimbokaksï indeecha ísï jámaaka, kʼuiripuechaksï no sési ambe uandaati Tata Diosïiri xanharueri ambe.* 3 Ka jimbokaksï xáni tsititspeni jámaaka, chkuanderachiatiksïni paraksïni fásili exeni. Joperu ióntki uandanhasptia eskaksï no ióni jimbo kastigarinhaaka ka sési jimboksï niáraati kʼamajkunhani.
4 Jimboka Tata Diosï méntku no pʼíngukuarhispka para kastigariuani imani ánjeliichani engaksï no sési ambe niátapka, sánderu sési, Tártarurhu* kʼuaninhaaspti ka kadeneecha jingoni jótaaspti jima* enga xáni pápkʼandeka, ka míndaasti para jusgariuani. 5 Ístu, méntku no pʼíngukuarhispti para ióntki anapu kʼuiripuechani kastigariuani, joperu kuájchakuspti Noéni, imani enga uandantani jámeenga ambe enga sési jaka ka ístu kuájchakuaspti máteru siete kʼuiripuechani jiáni enga kʼéri janirapka para imani kʼuiripuechani kʼamajkuani engaksï no janhanharhienga Tata Diosïni. 6 Ka kastigariuaspti jiáni enga kʼamajkuapka ireta Sodoma ka Gomorrani astakaksï tʼupuri jápujku* pakarapka, ka ísï exeraaspti imani kʼuiripuechani engaksï méntku no janhanharhijka Tata Diosïni ambe enga úkuarhiaka. 7 Ístu, pʼímutantaspti Lotini enga sési jámeenga, jimboka kánikua no sési pʼikuarheraxapka jimbokaksï no ambarhati kʼuiripuecha* méntku no sáni kʼuratsekua jingoni niátasïreenga no sési jásï ambe,* 8 jimboka inde achamasï enga sési jámeenga, pauani pauani no sési pʼikuarherasïreendi* jimboka no ambarhati kʼuiripuecha jingoni irekaxapka; ima exesïreendi na engaksï irekuarhini japka ka ístu kurhajchaasïreendi na engaksï uandeenga. 9 Ísï jimbo, Tata Diosï Jeoba sési mítesti néna pʼímutaantani imani kʼuiripuechani engaksï imani marhuakujka* jiáni engaksï no sési nitamakuarhini jarhajka, ka ístu mítesti néna támu peeraani* imani kʼuiripuechani engaksï no káni sési jámajka parakaksï kʼamajkunhaaka imani jurhiatikua jimbo enga ima jusgarpiaka, 10 ka sánderia imeechani engaksï jirinhakuntajka néna úni ambe enga imeecheeri kuerpu tsitijka paraksï jájkuani máteruechani ka engaksï méntku no uéjka kurhajchaani imeechani engaksï juramukua jatsika.
Ka jimbokaksï imeecha méntku no sáni chésïnga ka inchandimenksï, nóksï sáni pʼímukukuarhisïndi ka no sési ambeksï uandasïndi imeecheri ambe enga Tata Diosï kʼéri ambe uaaka. 11 Joperu nájkirukaksï ánjeliicha iauani sánderu uinhapika eska imeecha, nóksï no sési arhiasïndi jimbokaksï janhanharhisïnga Tata Diosï Jeobani.* 12 Joperu i achamasïichaksï no sési ambe uandasïndi ima ambeeri engaksï no jamberi míteka, ísïistiksï komueska animaliicha engaksï no eratsejka ka engaksï ísku jámajka ka andajpenunksï paraksï jupikanhani ka kʼamajkunhani. Inde achamasïichaksï kʼamajkunhaati jimbokaksï no sési ambe niátasïnga, 13 ka no sésiksï nitamakuarhiati jimbokaksï ísï andakuarheska engaksï ísï no sési niátaka.
Indeechaksï kánikua tsitisïndi tsïnchekuarhintani no sési ambe niátani na uéjki jurhiakueni. Indeechaksï ísïisti komueska ikichakueni jásï ambe enga no pímbinhasïika ka tsitisïndiksï* chkuanderakua ambe jorhentpini jiáni engaksï tʼirekua ambe úntajka paraksï chánksïni jingoni arhani. 14 Indeechaksï iatiru ísku jándikua ambe únchasïndi* ka méntkuksï no úsïndi pekaduni jurajkuni, ka sésiksï arhiasïndi imeechani engaksï nótki xáni uíuinhasï jaka. Indeecheeri mintsita sési jorhendakata jarhasti paraksï tsititspeni jámani. Ka míndakataksï jarhasti paraksï kastigarinhani. 15 Engaksï ísï jurajkuka xanharuni enga jurhimbitiika, támisïksï nirastia. Májkuenksï jámasti eska Balaami, Beori uájpa, ima enga no sési ambe niátapka jimboka sánderu tsitispka ambe enga maiamunhapiringa, 16 joperu xukanhaspti jimboka no sési ambe niátaxapka. Ka burru ma enga no ueenga uandani, ísï uandaspti komueska kʼuiripu ma ka pʼínguspti indeni uandakua párini paraka no ísku ambe ma úpiringa.
17 Indeechaksï ísïisti eska jima enga itsï uérajka joperu enga iámu kʼarhikia ka ísï eska xúmu enga tarhiata jini ka jini kámajka, ka míndakataksï jarhasti paraksï jima peeranhani nani enga xáni pápkʼandeka. 18 Ísku ambe maksï uandasïndi ka kʼéramakuarhisïndiksï. Nóksï sáni kʼuratsekua jingoni niátasïndi no sési jásï ambe* ka ménderuksï no sési ambe tsitiraasïndi kʼuiripuechani, sésiksï arhiasïndi parakaksï imeecha ménderu no sési ambe niátaaka, imani ambe engaksï nóteru ueengia. 19 Arhiasïndiksï eskaksï nóteru jántspiriuakia ka jiniksï ima jántspiriini ima ambeeri enga no sési jaka. Jimboka ima enga andanhajka, jántspikusïndi imani enga andajka. 20 Ísï jimbo, engaksï jurajkupkia ikichakueni jásï ambe engaksï parhakpini anapuecha újka ka enga xáni no sési jaka jimbokaksï mítespkia Tata Jesukristuni, imani engajtsïni pʼímutantajka, joperuksï ménderu ueenani ikichakueni jásï ambe úni ka inde ambe andaani, indeni ambe jimbo, imeechaksï sánderu no sési uéranchasïndi ka sánderuksï no sési jarhasïndia eska ueenani jámani. 21 Ísï jimbo, sánderu sési japirindi eskaksï indeecha no méni mítepiringa indeni xanharuni enga jindeeka para sési jámani, ka eskaksï niáraaka míteni ka tátsekuaksï jurajkuni indeni pímbinhasï mandamientuni engaksï intsïnhaka. 22 Ísïksï jámasti eska na uandanhajka: “Uíchu kʼuanhatsentasïndi para ántskantani imeeri jiuatani, ka kúchi enga na jikuaranhajkia, nirasïndi atsïmurhu perekuarhini”.*