Lukasï
6 Ka sábadu ma jimbo, Jesúsi jimeesïsï nitamaxapti nani enga trigu jukapka ka imeeri chúxapatiichaksï pʼikuaxapti máru píntsïteechani, pichujkuasptiksï ka semiia akuakuni. 2 Jimboksïsï máru fariseuecha arhiapti: “¿Andijtsïsï imani ambe úni jaki enga no sési jaka para úni sábadu jurhiatikua jimbo?”. 3 Joperu Jesúsi arhiaspti: “¿Andi nójtsï méni arhintaxaki ambe enga úpka Dabidi jiáni enga ima ka ima achamasïicha engaksï imani jingoni jámani japka niárapka kʼarhimani? 4 ¿Andi no inchaspi Tata Diosïiri kʼumanchikuarhu ka íntsaanksï kurhindeechani engaksï jindeepka para kéjtsïtani ka ima auaspti ka ístu íntsaaspti imani achamasïichani engaksï imani jingoni jámani japka? Ka no nema sésikua jatsisti para indeni ambe úni. Saserdotiichajkuksïsï újti arhani”. 5 Jimajkani Jesúsi arhiaspti: “Achamasïiri Uájpa Juramutiisti sábadu jurhiatikueri”.
6 Máteru sábadu jimbo, inchaspti jima engaksï judiuecha tánguarhijka para Tata Diosïni kómarhini ka ueenaspti kʼuiripuechani jorhendaani. Ka jima jarhaspti achamasï ma enga no ueenga jurhijkandani anapu jájkini manatani.* 7 Karariicha ka fariseuechaksï méntku exexapti Jesúsini paraksï exeni sini ambakerantapirini imani achamasïni sábadu jurhiatikua jimbo ka ísïksï úni no sési ambe uandani imeeri ambe. 8 Joperu Jesúsi mítespti ambe engaksï eratseni japka, jimbosï arhipti imani achamasïni enga no ueenga máechakua jájki manatani: “Jauara ka ixú terujkani niára”. Achamasï jauaraspti ka jima anhandespti. 9 Jimajkani Jesúsi arhiaspti: “Kurhamarhiakaksïni ambe ma. ¿Ambe sési jarhaski para úni sábadu jurhiatikua jimbo? ¿Ambakiti ambe úni o no sési ambe úni? ¿Jarhuatani kʼuiripuni ma o uándikuni?”. 10 Jesúsi erateaspti iáminduechani engaksï jima japka ka tátsekua arhispti achamasïni: “Iójkurhantsï”. Enga ima iójkurhantapka, ambajkurhantaspti. 11 Joperuksï ima kánikua ikiaspti ka ueenasptiksï uandontskuarheni ambeksï úpirini úkuni Jesúsini.
12 Ma xanhari, ima niraspti karhamani juátarhu ma para Tata Diosïni kómarhini ka erantskutaspti kómarhini. 13 Enga erandepkia, ióarhiaspti imeeri chúxapatiichani ka 12 achamasïichani erakuaspti paraksï apostoliini: 14 Simónini —enga ístu arhienga Pedru— ka imeeri ermanu jémba Andrésini, Santiaguni, Juanuni, Felipeni, Bartoloméni, 15 Mateuni, Tomásini, Santiaguni Alfeu uájpani, Simónini —ima enga tsípikua jingoni jámajka—, 16 Judasïni* Santiagu uájpani ka Judasï Iskarioteni —enga ísï tátsekua traisionariipka—.
17 Tátsekua kétsemantaspti imeecha jingoni ka pákua ma jimboksï niáraspti. Ka tʼuinksï jima jarhasptia uánikua imeeri chúxapatiicha ka uánikua kʼuiripuecha engaksï Judea anapuepka, Jerusaléni anapuecha ka Tiru ka Sidóni anapuecha engaksï marirhu uanamukutenisï irekapka. Jurhasptiksï paraksï kurhajtsïtani ambe enga Jesúsi uandeenga ka para Jesúsi ambakeraantani. 18 Imeecha jamberiksï ambakentasïreendi engaksï no sési nitamakuarhini japka jimbokaksï no sési jásï espirituecha incharhiatixapka. 19 Ka enga nema pʼárhienga Jesúsini ambakentasïreendi jimboka Jesúsini uérhisïreenga uinhapikua, jimboksïsï iáminduecha uékeendi pʼárhini.
20 Jimajkani erateaspti imeeri chúxapatiichani ka arhiaspti:
“Tsípisïngajtsï chá engajtsï no ma ambe jatsikuarheka, jimboka Tata Diosïiri Reinu chaariiska.
21 ”Tsípisïngajtsï chá engajtsï iásï kʼarhimani jaka, jimbokajtsï niáraaka sési uiniarhantani.
”Tsípisïngajtsï chá engajtsï iásï uerani jaka, jimbokajtsï niáraaka tsípini.
22 ”Tsípisïngajtsï chá engaksïni kʼuiripu ikiachejka, nóksïni jaiapanhentani, no sésiksïni arhini ka chkuanderakua ambeksï uandani chaari ambe* Achamasïiri Uájpani jimbo. 23 Enga i ambe úkuarhiaka, chá kánikua tsípi je ka kánikua sési pʼikuarherani, jimbokajtsï kʼéri intsïmperata ma jatsiska auandarhu, jimboka imeecheeri ióntki anapu parientiichaksï májkueni kaaspka Tata Diosïiri uandakua páriichani.*
24 ”Joperu, ¡lástima chá engajtsï jatsikuarheriika, jimbokajtsï intsïnhaskia ambe engaksïni sési pʼikuastajka!
25 ”¡Lástima chá engajtsï iásï sési uiniarhatini jaka, jimbokajtsï niáraaka kʼarhimani!
”¡Lástima chá engajtsï iásï tsípini jaka, jimbokajtsï niáraaka no sési pʼikuarherani ka uerani!
26 ”¡Lástima chá engaksï sési ambe uandaaka chaari ambe, jimbokaksï imeecheeri ióntki anapu parientiicha májkueni kaaspka imeechani engaksï uandeenga eskaksï Tata Diosïiri uandakua páriispka!
27 ”Joperu chá engajtsïni kurhajchajka, jíksïni arhisïnga eskajtsï seguiriini jauaka xénchaani imeechani engaksïni ikiachejka ka méntkisï sési kaa je imeechani engaksïni kurhunhijka, 28 méntkisï kómarhi je Tata Diosïni eska sési nikuauaka imeechani engaksï uéjka eskaksïni no sési nicheaka chánksïni ka kómarhijpikua je imeechani engaksïni no sési arhijka. 29 Engakeni nema páksanharhikuska, arhi eskakeni ístu páksanharhikuaka máteru ladu jimbo. Ka engakeni nema euakuarhiska chiiti xukuparhakuani, chiiti tánhikuani jamberi jurajkuku. 30 Engakeni nema kurhacheska ambe ma, íntsku. Ka engakeni nema euaska ambe ma, asï jáma kurhakuntani.
31 ”Ístu, ísï kaa je máteruechani eskajtsï na uékapiringa eskaksïni kámapiringa chánksïni.
32 ”Engajtsï xénchaaska imeechani engaksïni xénchajka, ¿ambejtsï sési úxaki? Jimbokaksï no sési úriicha* jamberi májkueni úsïnga. 33 Engajtsï sési kaaska imeechani engaksïni sési kámajka, ¿ambejtsï sési úxaki? No sési úriichaksï* jamberi úsïndi indeni ambe. 34 Ka engajtsï kuánetaaska* ambe ma imeechani engaksïni uaaka íntskuntani, ¿ambejtsï sési úxaki? No sési úriichaksï jamberi kuánetperasïndi ambe ma paraksï májkueni ambe intsïnhantani. 35 Joperu chá méntkisï xénchaa je imeechani engaksïni ikiachejka, méntkisï sési kámpi je ka méntkisï kuánetaa je máteruechani ka asï erokuarhi je eskaksïni íntskuntaaka. Engajtsï ísï uaaka, kʼéri intsïmperatajtsï ma intsïnhaaka ka Tata Diosïiri uájpeuakajtsï enga auandarhu jaka, jimboka ima imeechani jamberi sési kaasïnga engaksï no diosmaiamukua arhijpijka ka engaksï no sési ambe niátajka. 36 Méntkisï pʼamojpi je májkueni eska chaari Taati na pʼamojpejka.
37 ”Ístu, ásteru jáma jeia no sési ambe exekuani máteruechani ka ísïjtsï chájtu no méni no sési ambe exeminhaaka. Ásteru jáma jeia no sési ambe uandani máteruecheeri ambe ka ísïksï no méni no sési ambe uandaati chaari ambe. Méntkisï puátspenta je ka ísïjtsï chájtu puáminhantaaka. 38 Pʼinde je íntspini ambe ma ka ísïjtsï chájtu intsïnhaaka. Kánikuaksïni kununharhitaati ambe ma, sésiksï taianhaati ka churhuntsïtinksïni íntskuati. Jimboka ísï eskajtsï chá na káuaka máteruechani, chájtujtsï ísï kánhaaka”.
39 Jimajkani arini ejemplu jingoni jorhendaaspti: “Kʼuiripu ma enga no újka exeni, no úsïndi orhekupani máteruni enga ístu no újka exeni, ¿no ísïiski? Jimbokaksï tsimarhani posurhu ma uekanhepiringa, ¿a no? 40 Jorhenguarhiri no sánderu kʼéri ambeesti eska imeeri jorhentpiri, joperu ima enga sési jorhendakata jaka, ísïiuati komueska imeeri jorhentpiri. 41 ¿Andiresï exejki indeni pajani enga chiiti erachi* echenharhika, joperuri no exeni indeni bigasïni engari tʼu jatanharhika? 42 ¿Nénari uaa arhini chiiti erachini ‘Erachi, jurajkukeni pʼikunharhikuntani indeni pajani engari echenharhika’ ka jiniri tʼu no exeni indeni bigasïni engari jatanharhitini jaka? ¡Ísku apari! Orheta tʼu pʼitanharhinta indeni bigasïni engari kámani jaka ka ísï kʼóruri uaakia sési exeni néna pʼikunharhikuntani pajani chiiti erachini.
43 ”Ambakiti anhatapu ma no úsïndi no sési jásï frutu jukani ka anhatapu tereri ma no úsïndi ambanharhi frutu jukani. 44 Jimboka frutu jimbo xarharasïnga na enga jásïika anhatapu. No nema pʼikuntasïndi jígusï jima enga chekamikua ambe jukajka, nijtu ubasï pʼikunhantajki tsïtunirhu. 45 Ambakiti kʼuiripu ma, ambakiti ambe uandasïndi jimboka ambakiti ambe jatsiska imeeri mintsitarhu, joperu no sési úri ma, no sési jásï ambe uandasïndi jimboka no sési jásï ambe jatsiska imeeri mintsitarhu. Jimboka uandasïnga ambe enga imeeri mintsitarhu jatsika.
46 ”Jiájkani, ¿andijtsïnisï arhijki ‘¡Tata! ¡Tata!’ ka jinijtsï no úni ambe engaksïni ji arhijka? 47 Arhiakaksïni na enga jásïika ima kʼuiripu engareni jurhajka andarhierani, enga kurhaajka ambe engani ji uandajka ka enga ísï újka eskani ji na arhijka. 48 Ísïisti komueska achamasï ma enga kánikua jarhakupka, ka kʼerendarhu ma peeraani pítsekuechani para imeeri kʼumanchikuani úni. Ísï jimbo, enga iurhentpepka, iurhekua jurhaspti ka kórhimaspti* kʼumanchikuani, joperu no manataspti jimboka sési úkata jarhaspka. 49 Joperu ima enga kurhaajka ambe engani ji uandajka ka no ísï úni, ísïisti komueska ima achamasï enga imeeri kʼumanchikuani jima úpka enga puro echeriipka ka no orheta pítsekuechani peeraani. Iurhekua jurhaspti ka kórhimaspti kʼumanchikuani ka iámu xerekuarhentaspti. Kánikua no sési niraspti kuarhatseni ima kʼumanchikua”.