Lukasï

22 Ka no ióni jimbo, úkuarhipirindia Kʼuínchikua enga Kurhinda No Xarhipiti* Jukari Únheenga enga ísï mítekateepka komueska Paskua. 2 Ka kʼérati saserdotiicha ka karariichaksï chérhiasïreendi iretarhu anapuechani, jimboksïsï jámani japti jirinhakuntani nénaksï jámapirini paraksï sïpatikuarku uándikuni Jesúsini. 3 Jiájkani Satanási incharhispti Judasïni —enga arhinheenga Iskariote, ima enga 12 apostoliichani jingoni kuenta úkuarhienga— 4 ka Judasï niraspti kʼérati saserdotiichani exeani ka templurhu anapu kuáriichani para arhiani néna traisionariipirini* Jesúsini. 5 Imeechaksï kánikua tsípispti ka arhisptiksï eskaksï sentabu* íntskupiringa. 6 Judasï jiókuarhispti ka ueenaspti jirinhakuntani néna jámapirini para Jesúsini traisionariini* jiáni enga no xáni uánikua kʼuiripu japiringa.

7 Jimajkani niáraspti jurhiatikua Kʼuínchikueri enga Kurhinda No Xarhipiti* Jukari Únheenga, jiáni engaksï kéjtsïtakua ueenga para Paskueri kʼuínchikua. 8 Ísï jimbo, Jesúsi axaspti Pedruni ka Juanuni ka arhiaspti: “Ní je úntani Paskueri tʼirekua parachi arhani”. 9 Ka imeechaksï kurhamarhispti: “¿Naniri uékasïni eskachi úntaaka?”. 10 Jesúsi arhiaspti: “Exe je, engajtsï na inchaakuakia iretarhu, jimajtsï kúmuaka achamasïni ma enga itsï páni jaka kʼamukua ma jingoni. Chúxapa je ka jima inchaaku je nani enga ima inchaakuaka. 11 Ka arhi je kʼumanchikuarhu anapu achamasïni: ‘Jorhentpiri uandasïndi: “¿Nani ambandeski parani ji jima arhani Paskueri tʼirekua juchiiti chúxapatiichani jingoni?”’. 12 Ka ima achamasïksïni exeraati kuartu kʼéri ma enga karhakua jaka ka jima tʼuini iámu ambe listu jauatia. Jima úmanta je tʼirekuani para Paskueri kʼuínchikua”. 13 Imeechaksï niraspti ka méntkuksï iámindu ambe ísï exentaspti eska Jesúsi na arhiapka. Jiájkani, jimaksï úntaspti iámindu ambe para Paskueri kʼuínchikua.

14 Ísï jimbo, enga niárapkia jandora, Jesúsi uaxaparhakuspti mesarhu imeeri apostoliichani jingoni. 15 Ka arhiaspti: “Meru uékaxapkia chánksïni jingoni arhani Paskueri tʼirekua ante de ji ueenani no sési nitamakuarhini...; 16 jimbokaksïni ji arhisïnga eskani nóteruni auakia asta jiáni enga iámindu i ambe ísï úkuarhiaka Tata Diosïiri Reinurhu”. 17 Ka enga na pʼíkupkia kopa ma, diosmaiamukua arhispti Tata Diosïni ka arhiaspti: “Í je ka intsïtpera je, 18 jíksïni arhisïnga eskani nóteruni auakia ini binuni asta jiáni enga juuaka Tata Diosïiri Reinu”.

19 Tátsekua, pʼíkuspti kurhinda ma, diosmaiamukua arhispti Tata Diosïni, arhukuspti ka íntsaaspti imeeri chúxapatiichani ka arhiaspti: “I kurhinda arhikuekasïndi juchiiti kuerpu enga chánksïni jimbo íntspinhaaka. Ú je ini ambe jíndeni miántsparini”. 20 Tátsekua engaksï na tʼirepkia, májkueni úspti kopa jingoni. Arhiaspti: “I kopa arhikuekasïndi jimbanhi pakatperakua enga jiáni ueenaaka jarhani engani ji juchiiti iurhirini tsïtaaka chánksïni jimbo.

21 ”Joperu exe je, jíndeni jingoni uaxaparhakusti mesarhu ima engareni traisionariuaka. 22 Jimboka ísïiska, Achamasïiri Uájpa jatsisti para iámindu ambe ísï úni eska na karakata jaka. Joperu, ¡lástima ima kʼuiripu enga traisionariuaka!”. 23 Ísï jimbo, imeeri chúxapatiichaksï ueenaspti arhirperani né ísï úpirini.

24 Jimajkani, imeeri chúxapatiichaksï ueenaspti uandani né sánderu kʼéri ambeespi ka ueenasptiksï no sési arhirperani. 25 Joperu Jesúsi arhiaspti: “Reiichaksï imeecheeri jájki jimbo jatsisti iretani ka uandanhasïndi eskaksï juramutiicha ambakiti kʼuiripueska engaksï jarhuajpejka. 26 Joperujtsï chá no jatsiska para ísïini. Sánderu sési, ima enga sánderu kʼéri ambeeka, eska ísï jámaaka komueska sánderu sapichu ambe, ka ima engaksïni orhejtsïkujka, jatsisti para ísïini komueska jántspiri ma. 27 Jimboka, ¿né sánderu kʼéri ambeeski? ¿Ima enga uaxaparhakujka tʼireni o ima enga kéntpijka? ¿Andi no sánderu kʼéri ambeeski ima enga uaxaparhakujka tʼireni? Joperu ji ísï jarhaska chánksïni jingoni komueska ima enga kéntpijka.

28 ”Joperu jiáni engani xáni no sési nitamakuarhika, chájtsïni no méni jurajkuska. 29 Ka ji iásï ísï pakatperaxaka chánksïni jingoni parajtsï juramuni reinurhu ma, ísï eska juchiiti Taati na pakatperaka jíndeni jingoni, 30 parajtsï juchiiti Reinurhu jíndeni jingoni uaxaparhakuni tʼireni ka itsïmani, ka parakajtsï kʼérati uaxantskuecharhu* uaxakaaka parajtsï juramukuani ka jusgariuani 12 Israeli anapu ireteechani.

31 ”Simóni, Simóni, exe, Satanási uandasti eskaksïni uékasïnga ísï uauatani komueska triguni. 32 Joperukeni ji kómarhijpicheska parakari no jurajkuaka mintsikani Tata Diosïni. Ka tʼu, engari na kʼuanhatsentaakia, uinhaperantaa chiiti erachiichani”.* 33 Jimajkani Simóni arhispti: “Tata, no arhiati engajtsïni tʼungini jingoni ónhaaka o engajtsïni tʼungini jingoni uándikuaka”. 34 Joperu Jesúsi arhispti: “Pedru, jíkeni sési jimbo arhisïnga eska tʼarhechu no pireaka iásï, astakari na tanimu uelta uandaakia eskarini no míteska”.

35 Ístu arhiaspti: “Jiáni engaksïni axapka ka arhinksïni eskajtsï no jámapiringa sentabu páni, nijtu sutupu ma tʼirekua ambe jingoni, nijtu kuarhachiichani, ¿kueratanchaspijtsï ambe ma?”. Imeechaksï arhispti: “Nómbe”. 36 Jimajkani Jesúsi arhiaspti: “Joperu iásï, ima enga jatsikuarheka sentabu, eska pákuarhiaka ka ístu sutupu ma para tʼirekua ambe jatsirani; ka ima enga no kámajka espada, eska íntspikuarhintaaka imeeri takusïni para piákuarhini ma. 37 Jimboka jíksïni arhisïnga eskani ji jatsiska para ísï nitamakuarhini eska na karakata jaka: ‘Ísï exenhasti komueska kʼuiripu ma enga no sési ambe niátajka’.* Ka iásï, ji ísï nitamakuarhixakaia”. 38 Jimajkani imeechaksï arhispti: “Tata, exe ixúksï jarhasti tsimani espadeecha”. Ka Jesúsi arhiaspti: “Sésku jauati indeecha jingoni”.

39 Ka enga na uéakuntapkia jima uératini, niraspti Olibusïiri juáta jimbo ísï eska na pʼindepka ka imeeri chúxapatiichaksï imani jingoni niraspti. 40 Ka engaksï na niárapkia, arhiaspti: “Ixú pakara je kómarhini Tata Diosïni parajtsï úni orhepani uérakuni tsʼéjkukuani”. 41 Ka jarhariaspti sáni, tinguixurhispti ka ueenaspti kómarhini Tata Diosïni. 42 Arhispti: “Juchiiti Taati, engari tʼu uéjka, kénditacherini ini kopani. Joperu eska no úkuarhiaka ambe engani ji uéjka sino ambe engari tʼu uéjka”. 43 Jimajkani, auandarhu uératini jurhaspti ánjeli ma ka uinhaperantaspti. 44 Joperu jimboka xáni uandanhiaxapka, sánderu mintsita jingoni kómarhispti Tata Diosïni ka iurhiriini jásï aparhintaxapti, xáni iurhenharhixapti enga jamberi echerirhu andatsereenga. 45 Enga na kómarhipkia, jauaraspti, andarhientaaspti imeeri chúxapatiichani ka enga exeapka, iáminduechaksï kʼuíxapti jimbokaksï iámu chkéspkia xáni kómu pʼikuarherani. 46 Ka arhiaspti: “¿Andijtsïsï kʼuíni jaki? Jauara je ka méntku únda je kómarhini parajtsï úni orhepani uérakuni tsʼéjkukuani”.

47 Enga Jesúsi útasï ini ambe arhiani japka, jimajkisïksï niáraspti uánikua kʼuiripuecha. Judasï orhekupaaxapti, ima enga 12 apostoliichani jingoni kuenta úkuarhienga, ka andarhieraspti Jesúsini para putinharhikuni. 48 Joperu Jesúsi arhispti: “Judasï, ¿putinharhikuskiri Achamasïiri Uájpani parari traisionariini?”. 49 Ka engaksï ini ambe exepka imeecha engaksï Jesúsini jingoni japka, kurhamarhisptiksï: “Tata, ¿atauachi espada jimbo?”. 50 Ka máechakua enga jima japka, ataspti sánderu kʼéri saserdotiiri jántspirini ka méntku pʼikueeraspti jurhijkandani anapu kutsïkuani. 51 Jimajkani Jesúsi uandaspti: “Ísku ja je”. Ka andarhieraspti jántspirini, pʼárhikuspti kutsïkuani ka ambakerantaspti. 52 Jimajkani Jesúsi arhiaspti kʼérati saserdotiichani, templurhu anapu kuáriichani ka orhejtsïkutiichani engaksï nípka jirinhantani: “¿Espada ka chkariicha jingontsïni jurhaski jupikani enajkini ji sïpari máe? 53 Pauani pauani chánksïni jingoni jarhasïreenga templurhu jorhentpini ka chájtsïni no jima jupikaspka. Joperu i jindeesti chaari ora ka ima ora engaksï imeecha juramujka engaksï pápkʼandekuarhu jaka”.

54 Tátsekuaksï jupikaspti, pásptiksï ka kʼéri saserdotiiri kʼumanchikuarhuksï inchaataspti. Ka Pedru iauani jatini chúxapaaxapti. 55 Kʼuiripuechaksï kurhikantaspti ekuaru ka iáminduechaksï uaxakaspti. Pedrujtu imeechani jingoni uaxakaspti. 56 Ka uarhiiti ma enga imani kʼumanchikua jimbo jántspienga exespti Pedruni jima jorhentani jarhani. Ísku pakaraspti erateni ka uandaspti: “I achamasïjtu Jesúsini jingoni jámaxapti”. 57 Joperu Pedru uandaspti eska no ísïispka. Uandaspti: “Nana, ji no míteska indeni achamasïni”. 58 Ísï tátsekua, máteru nema exespti ka arhispti: “Tʼujturi indeechani jingoni jámasïnga”. Joperu Pedru arhispti: “Nóchkambe tata”. 59 Ma ora ísï tátsekua, máteru kʼuiripu méntku úndaspti arhini: “¡Ísïisti, i achamasïjtu imeecha jingoni jámasïndi! Jimboka jimintku xarharasïnga eska Galilea anapueska”. 60 Joperu Pedru arhispti: “Ískuri ambe ma uandaxaka tata”. Ka enga Pedru útasï uandani japka, jimajku pirespti tʼarhechu ma. 61 Tátsekua Tata pʼirhipakuarhespti ka eratespti Pedruni ka Pedru míjpaaspti* ambe enga Tata uandapka enga arhipka: “Ante de tʼarhechu ma pireni iásï, tʼuri tʼuini tanimu uelta uandaakia eskarini no míteska”. 62 Jimajkani uéakuntaspti ka jurajkutakuarhispti uerani xáni no sési pʼikuarherani.

63 Ka achamasïicha engaksï jupikakata jatsipka Jesúsini, ueenasptiksï teresmarhuni ka atani. 64 Tátsekuaksï ónharhitaspti ka úndasptiksï arhini: “Engari tʼu Tata Diosïiri uandakua páriika,* aiangujtsïni aberi nékini ataski”. 65 Ka chkuanderakua ambeksï uandasïreendi imeeri ambe.

66 Enga na erandepkia, tánguarhintasptiksï iretarhu anapu orhejtsïkutiicha, kʼérati saserdotiicha ka karariicha. Ka Kʼérati Juesiicha jingonksï páspti Jesúsini ka arhisptiksï: 67 “Arhijtsïni, ¿tʼu jindeeski Kristu?”. Ka ima arhiaspti: “Chájtsï no jakajkupiringa na uéjkiksïni arhini eska jo. 68 Ístu, engaksïni ji kurhamarhipiringa ambe ma, chájtsï no ma ambe uandapiringa. 69 Joperu iásï uératini, Achamasïiri Uájpa uaxakatini jauati Tata Diosïiri jurhijkandani jimbo enga xáni uinhapitiika”. 70 Ka iáminduechaksï kurhamarhispti: “Jiájkani, ¿tʼu jindeeski Tata Diosïiri Uájpa?”. Ka Jesúsi arhiaspti: “Jo, chájtsï mismu uandaxaka”. 71 Ka imeechaksï uandaspti: “Ambeteruchi úni kurhajchauaia máteru kʼuiripuechani. Juchachi mismu kurhachakuskia ambe enga uandaka”.