Santiagu

5 Ka iásï, kurhaa je chá engajtsï jatsikuarheriika; kurhaa je ka kómatsïkuarhi je, jimbokajtsï no ióni jimbo kánikua no sési nitamakuarhiaka. 2 Ambe engajtsï chá xáni jatsikuarhepka, iámu terestia ka seperi iámu arhastia chaari takusïni. 3 Oru ka plata engajtsï xáni jatsikuarhepka iámu kʼuerestia, ka inde kʼuereri xarhataati ambe engajtsï no sési niátani jaka ka kʼamachaati chaari kʼuiripetani. Ambe engajtsï chá xáni tánakuarhika, ísïiuati komueska chpiri últimu jurhiatikuechani jimbo. 4 Ima pʼikuntstiicha engaksï chaari echeriicha jimbo ánchikuarhika uinhachaxatiksï jimbokajtsï chá no maiamuaxaka, ka Tata Diosï Jeoba, enga jindeeka auandarhu anapu juramuti,* ima jamberi kurhaastia engaksï ima uinhachaparini kurhakuni jaka eska jarhuatauaka. 5 Sésijtsï irekuarhiska echerirhu imani ambe jingoni engajtsï xáni jatsikuarhepka ka tsïnchentaskajtsï tsípikuarhini. Chaari mintsita ísï pʼukuranhasti komueska animaliicha paraksï uándikunhani. 6 Chájtsï kastigariska ka uándikuskajtsï imani enga sési jámeenga. Jimboksïnisï ima méntku no sáni jaiapanhentajti.

7 Ísï jimbo erachiicha,* tekaanta je asta jiáni jamberi enga Tata ixú jauakia. Exe je, tarheri ma jiáni jamberi erokuarhini jarhasïndi enga ueenajkia janini ka ístu enga nóteru tiempuejkia para janini para ambanharhi frutu pʼikuntani echerirhu. 8 Ísï jimbo, chájtu tekaanta je; uíuinhajkunta je chaari mintsitani, jimboka nóteru ióni jimbo Tata ixú jauakia.

9 Erachiicha, asï jáma je ikiakuani máteruechani* parakajtsï no jusgarinhaaka. Exe je, Juesi puertarhu jarhastia. 10 Erachiicha, chájtu orhepani uéra je engajtsï no sési nitamakuarhini jauaka ka tekaanta je ísï eskaksï uandakua páriicha* engaksï Tata Diosï Jeobaeri nombri jimbo uandapka. 11 Exe je, jucha exesïnga eskaksï kánikua tsípisïnga* ima engaksï tekaantajka. Chájtsï míteska na enga xáni tekaantapka Jobu ka exeskajtsïa ambe enga úka Tata Diosï Jeoba imani jimbo, ka sésijtsï míteskia eska Tata Diosï Jeoba kánikua xénchpesïnga ka eska kánikua pʼamojpesïnga.

12 Juchiiti erachiicha, ásteru jámia je auandani jimbo jurariini o echerini jimbo, ka méntku ásteru jámia je jurariini. Sánderu sési, engajtsï uandaaka eskajtsï uaaka ambe ma, ísï ú je, ka engajtsï uandaaka eskajtsï no ma ambe uaaka, asï ú je, parakajtsï no tátsekua jusgarinhaaka.

13 ¿Jarhaski nema chánksïni jingoni enga no sési nitamakuarhini jaka? Jiájkani eska seguiriini jauaka Tata Diosïni kómarhini. ¿Jarhaski nema enga kánikua tsípini jaka? Jiájkani eska salmuechani pireauaka. 14 ¿Jarhaski nema chánksïni jingoni enga pʼamenchani jaka? Jiájkani eska kúnguarhikuarhu anapu orhejtsïkutiichani uandajpauaka ka eskaksï imeecha kómarhijpikuaka ka eskaksï aseiti atajtsïkuaka Tata Diosï Jeobaeri nombri jimbo. 15 Ka imeechaksï mintsikaparini kómarhiati ka inde ambe jarhuataati imani enga pʼamenchani* jaka para sési pʼikuarherantani, ka Tata Diosï Jeoba jauatantaati. Ístu, enga ima pekadu ambe niátaka, puáminhantaati.

16 Ísï jimbo, aianhpera je ambe engajtsï no sési niátaka ka kómarhijpikua je máteruechani ka eskaksïni imeechajtu kómarhijpicheaka, parakajtsï uaaka ambakeranhantani. Kánikua jarhuajpesïndi* enga ima kʼuiripu kómarhijka enga sési jámajka. 17 Elíasi achamasï máespti enga májkueni pʼikuarhereenga eska jucha, joperu enga mintsita jingoni kurhakupka Tata Diosïni eska no janipiringa, tanimu uéxurhini ka terujkani no janispti echerirhu. 18 Jimajkani ima ménderu kómarhispti ka ueenaspti janini auandarhu uératini ka echeri ueenaspti frutu íntspini.

19 Juchiiti erachiicha, enga chá máisï támisï pánhaska ka jurajkuntsï jurhimbikuani ka máteru nemaksïni kʼuanhaskuntani, 20 mítetini ja je eska ima enga kʼuanhaskuntajka no sési úrini ma para nóteru imani xanharu jimbo jámania enga no sési jaka, pʼímutantaati* uarhikuarhu ka jarhuataati para ima puáminhaantani imeeri pekaduechani.