Úkuecha
11 Ka apostoliicha ka erachiicha* engaksï Judea japka, niárasptiksï míteni eskaksï no judiuechajtu jakajkuspkia Tata Diosïiri uandakuani. 2 Ísï jimbo, enga Pedru na karhamapka Jerusaléni, ueenasptiksï no sési arhini* imeecha engaksï uandeenga eskaksï tatakeecha jatsispka para pasïri pʼikujtsïkukuni tsʼiuerakuani.* 3 Ka arhisptiksï: “¿Andiresï niki pʼorhembiani imani achamasïichani engaksï no pʼikujtsïkujka pasïri tsʼiuerakuani ka andiresï imeecha jingoni tʼire?”. 4 Jimajkani Pedru ueenaspti iámu ambe aianguani ka arhiaspti:
5 “Ji kómarhixapka Tata Diosïni jini Jope ka ma repentkuni ueenaspka jánhaskua ma exeni. Exespka na enga kétseni japka auandarhu uératini kʼéri sábaneeni jásï ma linueri ka tʼápuru jupikakata jarhaspti ka sési sési jima niáraspti nani engani ji japka. 6 Ískuni pakaraspka exeni ka jimaksï jarhaspti mámaru járhati animaliicha engaksï tʼámu jantsiriichani jukaaka, animaliicha engaksï no sési jámajka ka ístu ima animaliicha engaksï antsikukuarhijka* ka auandarhu anapu pájaruecha. 7 Ístuni kurhaaspka engareni nema arhipka: ‘¡Pedru, jauara. Ataa ka auaantsï!’. 8 Joperuni ji uandaspka: ‘Nómbe Tata. No méni arhaxaka imani ambe engani no jatsika para arhani o imani ambe enga no pímbinhasï jaka ísï eska lei na uandajka’. 9 Joperu ménderu kurhaakuarhispti uandakua ma auandarhu uératini engareni arhipka: ‘Ásteru uandaia eska no pímbinhasï jarhaska ima ambe enga Tata Diosï pímbinhajkuntakia’. 10 Ka para tanimu úni jámania, ménderuni kurhaaspka uandakua ma ka tátsekua auandarhu pánhaspti iámindu ambe. 11 Ka jimajkuksï niáraspti tanimu achamasïicha imani kʼumanchikuarhu engachi jucha pakarani japka, engaksï Sesarea uératini axanhapka parajtsïni nirani jirinhantani. 12 Espiritu santurini arhispti eskani imeecha jingoni nipiringa. Ka ístuksï jíndeni jingoni niraspti i seisi erachiicha ka inchaakuspkachi imani achamasïiri kʼumanchikua jimbo.
13 ”Imajtsïni aianguspti eska ánjelini ma exespka imeo ka eska ánjeli arhispka: ‘Axaa ireta Jope máru achamasïichani paraksï Simónini juáni enga ísï mítekateeka komueska Pedru 14 ka imakeni arhiati nénari uaa pʼímutantskata uérani tʼu ka chiiti kʼumanchikuarhu anapuecha’. 15 Joperu engani ji na ueenapka uandani, espiritu santu andajtsïkueraaspti imeechani, ísï eskajtsïni orheta juchantsïni na andajtsïkuerapka. 16 Ka ji míjpaaspka* ambe enga Tata xáni uandeenga: ‘Juanu itsï jingoni itsï ataasti* kʼuiripuechani, joperujtsï chá espiritu santu jingoni itsï atanhaaka’. 17 Ísï jimbo, enga Tata Diosï imeechantu íntsaaka indeni intsïmperakuani engajtsïni juchantsïni íntskuka, juchantsïni engachi jakajkuka tata Jesukristuni, ¿andisïni ji ójkutani japirini Tata Diosïni?”.
18 Engaksï na kurhaapka ini ambe, imeechaksï nóteru ambe ma arhisptia* ka kʼéri ambeksï arhispti Tata Diosïni. Uandasptiksï: “¡Jiájkani Tata Diosï sésikua íntsaaxati no judiuechani paraksï móantani ka paraksï tsípikua intsïnhani!”.
19 Ka imeecha engaksï etsakuarhipka engaksï no sési kánhapka* jiáni engaksï Estebanini uándikupka, Fenisiaksï jamberi niáraspti, Chipre ka Antiokíaisï jamberi. Joperu judiuechantkuksïsï aianguauendi ambakiti aianhperakuani. 20 Joperu máru achamasïicha engaksï Chipre ka Sirene anapuepka, Antiokíaksï niraspti ka ueenasptiksï aianguani imani kʼuiripuechani engaksï griegu uandeenga ka ambakiti aianhperakuaksï aianguaspti Jesúsiiri* ambe. 21 Ka Tata Diosï Jeoba jarhuataaxapti ka uánikua kʼuiripuechaksï ueenaspti jakajkuni ka Tateeri chúxapatiksï úkuarhispti.
22 Kúnguarhikuarhu anapuecha engaksï Jerusaléni japka, kurhaasptiksï ini ambe ka Antiokíaksï axaspti Bernabéni. 23 Enga ima na niárapkia ka enga exepka na enga Tata Diosï kánikua kóndeantani japka, kánikua tsípispti ka arhiaspti eskaksï méntkisï mintsita jingoni kurhajchapiringa Tatani, 24 jimboka Bernabé ambakiti kʼuiripu máespka enga kánikua espiritu santu intsïnhapka ka enga kánikua mintsikeenga. Ka uánikua kʼuiripuechaksï ueenaspti jakajkuni Tatani. 25 Jimajkani, ima Tarsu niraspti ka iápurisï jámaspti jirinhantani Sauluni. 26 Enga na exentapkia, Antiokía páspti. Ka ma uéxurhinksï tánguarhispti kúnguarhikua jingoni ka uánikua kʼuiripuechanksï jorhendaaspti. Ka Jesúsiiri chúxapatiichaksï Antiokía ueenaspti “kristianu” arhinhani, jimboka Tata Diosï ísï uékaspka.
27 Imani jurhiatikuecha jimbo, máru Tata Diosïiri uandakua páriichaksï* Jerusaléni kétsemaspti paraksï Antiokía niárani. 28 Ka Tata Diosïiri uandakua pári ma enga Ágabu arhinheenga, jauaraspti ka espiritu santu jimbo uandaspti eska no ióni jimbo kʼarhingua japiringa iámu parhakpinirhu; i ambe ísï úkuarhispti Klaudiueri jurhiatikuechani jimbo. 29 Ísï jimbo, chúxapatiichaksï pakatperaspti eskaksï tánapiringa ambe engaksï xáni úpiringa mándani arhini ka eskaksï Judea anapu erachiichani axakuapiringa paraksï jarhuataani. 30 Ka ísïksï úspti. Bernabé ka Saulu jingonksï axakuaspti ambe engaksï xáni tánapka paraksï jarhuataani ka iichaksï orhejtsïkutiichani íntsaantaspti.