Segundu Karakata para Korintu anapuecha
6 Juchachi Tata Diosïni jingoni ánchikuarhisïnga* jimboksïnisï kurhacheni jaka eskajtsï no jámaaka ísku jatini uékani eskaksïni Tata Diosï kóndentaaka ka tátsekuajtsï niárania mirikurhini. 2 Jimboka Tata Diosï uandasïnga: “Jíkeni kurhajchaska jiáni engakeni újchakuraka ka jíkeni jarhuataska ima jurhiatikua engakeni pʼímutantaka”. ¡Iásïstia engajtsïni Tata Diosï újchakuraka! ¡Ka niárastia jurhiatikua parajtsïni Tata Diosï pʼímutantani!
3 Nóchi úxaka imani ambe enga no sési ambe úrauaka* máteruechani para no nema úni uandani eskachi no káni sési marhuakuxaka Tata Diosïni. 4 Sánderu sési, juchachi jánguarhintasïnga sési jámani iámindu ambe jimbo, jimbokachi Tata Diosïni marhuakusïnga: tekaantasïngachi engachi no sési nitamakuarhini jarhajka, engachi kómu nitamakuarhijka, engachi uétarhinchani jarhajka, engachi uandanhiata ambe jatsijka, 5 engajtsïni atajka, engajtsïni ónhajka, enga no sési jánhaskuarhijka, engachi uinhamu ánchikuarhijka, engachi chúrikisï no kʼuíjka, engachi méni no ma ambe arhajka; 6 engachi jánguarhintajka pímbinhasïini, engachi ísï jámajka eskachi na jorhenguarhijka, engachi tekaantajka ka engachi sési kámpijka, engachi jurajkutakuarhejka parajtsïni espiritu santu arhini nénachi jatsiski para irekani, engachi mintsita jingoni xénchaajka máteruechani, 7 engachi méntkisï jurhimbikua ambe uandajka, engachi mintsikajka Tata Diosïiri uinhapikuani, engachi jánguarhintajka sési jámani jimbokachi ísï jarhaska enajkichi jurhijkandani* ka uikixkandani* jimbo jupikatini jaki uarhipetarakua ambe engajtsïni jarhuatajka sési jámani; 8 engajtsïni sési exejka o engajtsïni no sési exejka, engaksï sési ambe uandajka juchaari ambe o engaksï no sési ambe uandajka. Kʼuiripuechajtsïni ísï exesïndi enajkichi jucha chkuanderajki, joperuchi jucha méntkisï jurhimbikua ambe uandasïnga; 9 enajkijtsïni no nema míte, joperujtsïni sési mítesti; enajkichi uarhini jakiia,* joperuchi jucha tsípiti jarhaska; enajkijtsïni kʼuiripuecha no sési káma, joperuchi jucha nótki uarhixaka; 10 kʼuiripuechajtsïni ísï exesïndi enajkichi kómu pʼikuarherani jaki, joperuchi jucha méntkisï tsípini jarhasïnga; enajkichi no jatsikuarherii, joperuchi uánikua ambe íntsaasïnga kʼuiripuechani; enajkichi no ma ambe jatsikuarhe, joperuchi iámindu ambe jatsikuarheska.
11 Juchaari erachiicha* engajtsï Korintu anapueka, juchaksïni sési* aianguska iámindu ambe ka ístuksïni kánikua xénchasïnga.* 12 Jucha méntkuni no sáni pʼíngukuarhisïnga paraksïni xarhatacheni eskaksïni xénchasïnga, joperujtsï chá kʼóru pʼíngukuarhixaka ka nójtsïni xarhatachesïnga eskajtsïni xénchasïnga. 13 Ísï jimbo, chájtujtsïni jatsiska para májkueni sési kámani juchantsïni ísï eskaksïni jucha na sési kámajka chánksïni ka ístujtsï jatsiska para sánderu uékpini, ka jíksïni ísï arhixaka ini ambe jimbokaksïni ísï exesïnga komueska juchiiti sapiicha.*
14 Asï jáma je kúrhiani imeechani engaksï no jakajkutiika.* Jimboka, ¿néna terukuntasïni sési jángua, no sési jángua* jingoni? ¿O terukusïni tʼíntskua pápkʼandekua jingoni? 15 Ístu, ¿andi Kristu úsïni sési pájperani Belialini* jingoni? ¿O ambe jatsiski jakajkuti ma* no jakajkutini ma jingoni? 16 Diosï úkateechaksï no uaati Tata Diosïiri templurhu jarhani. Jimbokachi jucha jindeeska Tata Diosïiri templu, ima Tata Diosïiri enga tsípiti jaka. Ísïisti eska Tata Diosï na uandaka: “Ji imeechani jingoni jauaka ka imeechani jingoni jámaaka, ji imeecheeri Tata Diosïuaka ka imeechaksï juchiiti ireteuati”. 17 “Ísï jimbo, uéakunta je ka kéndikukua je indeechani, ísï uandasïndi Tata Diosï Jeoba, ka ásteru jáma jeia pʼárhini ikichakueni jásï ambe”, “ka jíksïni jiókaaka”. 18 “‘Ka ji chaari taatiuaka ka chájtsï jindeuaka juchiiti tatakeecha ka nanakeecha’, ísï uandasïndi Tata Diosï Jeoba, ima enga iámindu ambe újka úni”.