Segundu Karakata para Korintu anapuecha
4 Tata Diosïjtsïni pʼamojkusti ka íntskustijtsïni sésikua parachi ísï marhuani, jimbochisï no kuatantajka. 2 Ísï jimbo, juchachi nóteru úsïngia imani ambe enga sïpatikuarku úkuarhijka ka enga kʼuratsekua ambeeka, nijtuchi jámajki támisï jánhastpini ka nóchi jámasïnga mójtakuni* Tata Diosïiri uandakuani. Sánderu sési, jucha jurhimbikua ambe aianguasïnga kʼuiripuechani, ka engachi ísï újka, Tata Diosï exesïndi eskachi sési ambe úxaka paraksï ístu iámindu kʼuiripuecha exeni. 3 Ka ísï jimbosï takusï ma jingoni ójchakurakata jati inde ambakiti aianhperakua engachi jucha aianhpijka, paraksï no úni exeni imeecha engaksï imani xanharu jimbo nirani jaka nani engaksï kʼamajkunhaaka,* 4 ima kʼuiripuecha engaksï no jakajkutiika, jimboka i parhakpini anapu* diosï pápkʼanhastaasti paraksï no úni kurhanguni ka nóksï exeni na enga xáni kánikua tʼíntskajka ambakiti aianhperakua Kristueri ambe, ima engajtsïni exerajka na engamindu jásïika Tata Diosï. 5 Jimbokachi jucha no juchaari ambesï jámajka aianhpini, sánderu sési, aianhpisïngachi eska Jesukristu jindeeska Tata, ka eskani jucha chaari jántspiriiska Jesúsini jimbo. 6 Jimboka Tata Diosïsï ísï uandaka: “Eska tʼíntskua kánikua meremerexeaka jima enga pápkʼandeka”. Ka jimboka Kristu xáni meremerenharhixaka, Tata Diosï tʼíntskasti juchaari mintsitarhu indeni tʼíntskua jingoni enga jindeeka Tata Diosïiri ambe míteni.
7 Joperuchi jucha ísïiska komueska jatakua ambe enga kʼuerekua* jingoni úkata jaka jimbokachi ini ambe jatsiska enga xáni kánikua jukaparhaka, ísï jimbo, juchachi jatsiska indeni uinhapikua enga no ma kʼuiripu újka jatsini, jimbokajtsïni Tata Diosïsï íntskujti indeni uinhapikuani ka no juchaaristi. 8 Juchachi ísï jarhaska enajkijtsïni katsinhani jaki jimbokachi mámaru ambe nitamakuarhisïnga, joperujtsïni no xáni uinhamu katsinhasïndi parachi nóteru jamberi únia manakuarhini; nóchi jánhaskani jarhasïnga ambe úni joperuchi méntkisï úsïnga orhepani uérani; 9 no sésijtsïni kámasïndi, joperuchi no jandiajku jarhaska; kuáskusïndijtsïni, joperuchi no uarhisïnga. 10 Nani uéjkichi jámani, jucha pauani pauani sáno uarhisïnga, parakaksï kʼuiripuecha exeaka eskachi juchajtu májkueni no sési nitamakuarhisïnga eska Jesúsi. 11 Ka engachi jamberi útasï irekani jaka, jucha pauani pauani sáno uarhisïnga Jesúsini jimbo, parakaksï kʼuiripuecha exeaka eskachi juchajtu májkueni no sési nitamakuarhisïnga eska Jesúsi. 12 Ísï jimbo, jucha sáno uarhisïnga, joperujtsï chá tsípikua jatsisïnga.
13 Ka jucha ísï mintsikasïnga eska na karakata jaka: “Mintsikaska Tata Diosïni ka jimbosïni uandaka”. Ísï jimbo, juchajtuchi mintsikasïnga Tata Diosïni ka jimbochisï uandajka, 14 jimbokachi míteska eska ima enga tsítantaka* Jesúsini, ístujtsïni tsítantaati* juchantsïni ka ístu chánksïni parachi Jesúsini jingoni jarhani. 15 Jimboka iámindu i ambe chaari sési jimboeska paraka Tata Diosï útasï sánderu kóndeantauaka kʼuiripuechani, jimbokaksï sánderu uánikua kʼuiripuecha jarhaska engaksï diosmaiamukua arhini jaka Tata Diosïni, ísï jimbo, Tata Diosï sánderu kʼéri ambe arhinhasïndi.
16 Ísï jimbo, juchachi no kuatantasïnga. Ka nájkiruka juchaari kuerpu sánhani arhini jauaka kʼamakurhini, juchaari mintsita pauani pauani sánderu jimbanhiintasïndi. 17 Jimboka, nájkirukachi no sési nitamakuarhijka,* inde ambe ariskusï nitamajti ka no xáni kʼéri ambeesïndi, ka ísï jimbo, juchachi sánhani arhini jauaka sánderu kʼéri ambe exenhani ka kʼéri ambechi exenhaaka para méntkisï. 18 Jimbochisï jucha méntku eratseni jarhajka imani ambe enga no xarharajka ka no imani ambe enga xarharajka. Jimboka ariskusï nitamajti inde ambe enga xarharajka, joperu inde ambe enga no xarharajka, jindeesti para méntkisï.