Ebreu

2 Ísï jimbo, jatsiskachi para sánderu sési eratsentani indeni ambe engachi kurhaakia parakachi no méni jurajkuaka mintsikani. 2 Ka enga ísï úkuarhika eskaksï ánjeliicha na uandantapka ka ístuksï kastigarinhani imeecha engaksï no úpka ambe enga lei uandajka ka imeecha engaksï no kurhandirapka, 3 jiájkani, ¿nénachi uaa jucha kuájpikuarhini engachi ísku exeska indeni pʼímutantskuani enga xáni kʼéri ambeeka? Jimboka juchaari Tata ueenaska indeni xáni ambakiti ambe uandantani, ka ima kʼuiripuecha engaksï kurhajchapka imajtujtsïni ísï aiangusti, 4 ka Tata Diosïjtu uandantaxapti indeeri ambe jimboka milagruechani uaasïreenga,* kʼéri ambe úsïreendi ka uánikua máteru ambe, ka ístu jimboka íntspisïreenga imeeri espiritu santu ísï eska ima na uékeenga.

5 Jimboka Tata Diosï no ánjeliichani arhiaska paraksï juramuni imani parhakpinirhu enga jurhani jaka ka engachi jucha jámani jaka uandantani. 6 Joperu ma xanhari, achamasï ma uandaspti: “¿Andi neeski kʼuiripu parari tʼu méntku miáni jarhani? ¿O neeski achamasïiri uájpa parari tʼu xáni pendienti páni? 7 Tʼuri sanititu sánderu sapichu ambe úska eska ánjeliichani; tʼuri kʼéri ambe úska ka ísturi úska eska janhanharhinhaaka, ka tʼuri imani jurajkukuska ambe engari xáni úka. 8 Tʼuri imeeri jantsiriicharhu peerakuska iámindu ambe”. Ka jimboka Tata Diosï ísï kueraaska iámindu ambe para imani jurajkukuni, jiájkani no ma ambe jarhasti enga Tata Diosï no imani jurajkukukia. Ka nájkirukachi jucha nótki exeni jaka na enga iámindu ambe imani jurajkukuka, 9 kʼóruchi exexakaia eska Jesúsi, inde enga sánderu sapichu ambe únhaka eska ánjeliicha, kʼéri ambe únhaskia ka ístu janhanharhinhani jimboka kánikua no sési nitamakuarhiska ka jamberi niárasti uarhini, imasï uarhiti iáminduechani jimbo, jimbokajtsïni Tata Diosï xáni kánikua kóndentaska.*

10 Iámindu ambe enga jaka, jindeesti paraka Tata Diosï kʼéri ambe arhinhaaka ka imani jimbosï jati iámindu ambe. Ísï jimbo, para uánikua uájpeechani kʼéri ambe uaani, sési jarhaspti enga ísï jurajkupka eska no sési nitamakuarhipiringa ima enga Sánderu Kʼéri Orhejtsïkutiika, paraka méntku no ma ambe kueratanchapiringa para úni indeechani pʼímutaantani. 11 Jimboka ima enga pímbinhajkuantani jaka ka imeecha engaksï pímbinhajkunhantani jaka, májku Taatinkuksïsï jatsiti. Jimbosï ima no kʼuratseti arhiani eskaksï imeeri ermanu jémbeeska, 12 jimboka uandasïnga: “Ji aianguauaka juchiiti ermanuechani na engari arhinhajka tʼu; jíkeni pirechiaka parakeni kʼéri ambe arhini kúnguarhikuarhu”. 13 Ístu uandasïndi: “Ji imani mintsikaaka”. Ka ístu uandasïndi: “¡Exe je! Ji ixú jarhaska imani sapiicha* jingoni engareni Tata Diosï Jeoba íntsaaka”.

14 Ka jimbokaksï i “sapiicha”* kʼuiripueska,* imajtu niárasti kʼuiripu úkuarhini paraka imeeri uarhikua jimbo kʼamajkupiringa Noambakitini, jimboka indesï uándikuajka kʼuiripuechani, 15 ka para pʼímutaantani* iámindu imeechani engaksï iónisï ísï irekakia komueska jántspiriicha jimbokaksï chérhisïreenga uarhikuani. 16 Jimboka ima no jurhaska para ánjeliichani jarhuataani. Sánderu sési, jurhasti para Abraániiri uájpeechani jarhuataani. 17 Ísï jimbo, ima iámindu ambe jimbo niárasti ísïini eskaksï “ermanu jémbeecha” para úni sánderu kʼéri saserdoti máeni enga pʼamojpepiringa ka úni sési ánchikuarhikuni Tata Diosïni; ka ísï, ima úni kéjtsïtakuni Tata Diosïni kʼuiripuecheeri pekaduechani jimbo paraksï imeecha úni sési pájperantani Tata Diosï jingoni. 18 Ka jimboka imajtu no sési nitamakuarhispka engaksï kʼuiripuecha no sési kámapka, jimbosï sési mítetini jati néna jarhuataani imeechani engaksï no sési nitamakuarhini jarhajka.