Ebreu

5 Jiájkani, enga achamasï ma erakunhajka para sánderu kʼéri saserdotiini, jindeesti para jarhuataani kʼuiripuechani paraksï imeecha úni Tata Diosïni kómarhini, para intsïmperata ambe ka kéjtsïtakua ambe úkuni Tata Diosïni pekaduecha jimbo. 2 Ima pʼamojkuasïndi* imeechani engaksï no míteparini no sési ambe niátajka,* jimboka imajtu no úsïnga iámindu ambe sési úni, 3 jimbosï ima jatsiti para kéjtsïtakuni Tata Diosïni imeeri pekaduechani jimbo, ísï eska na újka iretarhu anapu pekaduechani jimbo.

4 No ma achamasï úsïndi jandiajku pʼitsïkuarhini para sánderu kʼéri saserdotiini, jiánkusï újti jindeeni sánderu kʼéri saserdoti enga Tata Diosï erakuaka, ísï eska na erakupka Aarónini. 5 Májkueni, Kristu no jandiajku pʼitsïkuarhisti para sánderu kʼéri saserdotiini ka no jandiajku kʼéri ambe exekuarhispti, sánderu sési, imasï kʼéri ambe úti enga arhika: “Tʼuri jindeeska juchiiti sapi* ka iásï uératini ji jindeeskia chiiti taati”. 6 Ísï eska máteru karakata jimbo na arhijka: “Tʼuri jindeeska saserdoti para méntkisï ísï eska Melkisedeki”.

7 Jiáni enga Kristu echerirhu japka,* ima mintsita jingoni kómarhispti Tata Diosïni ka ueparini kómatsïkuarhispti, kómarhispti imani enga kuájchakupiringa para ima no uarhini, ka Tata Diosï kurhajchaspti jimboka ima chénharhisïreenga* Tata Diosïni. 8 Ka nájkiruka ima uájpeepka, jorhenguarhisti kurhandirani jimboka no sési nitamakuarhiska. 9 Ka jimboka ima iámindu ambe míteskia ka nóteru ambe ma kueratanchania, imani jimboksï niáraati pʼímutanhantani para méntkisï ima kʼuiripuecha engaksï kurhajchaaka. 10 Jimboka Tata Diosï erakuska para sánderu kʼéri saserdotiini ísï eska Melkisedeki.

11 Jucha uánikua ambe uandapiringa imeeri ambe, joperu úkua jukasti paraksïni aianguni jimbokajtsï chá no na kurhanguni jarhasïnga.* 12 Chájtsï iásï jamberi jatsipiringia* para jorhentpini jarhani, joperujtsï uétarhinchaxaka eskaksïni nema ménderu ueenaaka jorhendani indeni ambe enga ma orheta ueenajka jorhenguarhini ambe enga Tata Diosï uandajka. Ka chájtsï ménderu jatsiska para lechi arhani ka no indeni tʼirekuani enga jindeeka para xaxani. 13 Ka ima kʼuiripu enga útasï lechi arhani jaka no mítesti Tata Diosïiri uandakuani enga sési jaka, jimboka inde kʼuiripu útasï sapiiska. 14 Joperu tʼirekua enga xaxanhajka jindeesti para ima kʼuiripuecha engaksï eratsekua jukariika, para ima kʼuiripuecha engaksï pʼindekia* eratsentani, ka engaksï ísï eratsentajka, úsïndiksï jánhaskani ambesï sési jaki ka ambesï no sési jaki.