Juanu

1 Ueenakuarhu, Uandakua jarhasptia, Uandakua Tata Diosïni jingoni jarhaspti ka Uandakua diosï máespti. 2 Ka Tata Diosïni jingoni jarhaspti ueenakuarhu. 3 Imani jimbo niárasti iámindu ambe jarhani ka méntku no ma ambe japirindi enga no imeepiringa.

Ambe enga niáraka jarhani 4 imani jimbo, jindeesti tsípikua, ka tsípikua jindeespti tʼíntskua para kʼuiripuecha. 5 Tʼíntskua meremerexexati jima enga pápkʼandeka, joperu pápkʼandekua no úxati andani tʼíntskuani.

6 Jurhasti achamasï ma enga Tata Diosï axapka. Juanu arhinhasïreendi. 7 I achamasï jurhaspti para uandantani tʼíntskueri ambe, parakaksï ini achamasïni jimbo, iámindu jásï kʼuiripuecha jakajkupiringa. 8 Juanu no jindeespti ima tʼíntskua, sánderu sési, jurhaspti para uandantani ima tʼíntskueri ambe.

9 Ima tʼíntskua enga sési jimboeka, ka enga iámindu jásï kʼuiripuechani erajkutaraajka, janoxamendia parhakpinirhu. 10 Joperu ima* tʼuini parhakpinirhu jarhasptia ka parhakpini niárasti jarhani imani jimbo, joperu parhakpini no mítentasti. 11 Imeeri kʼumanchikuarhu niántasti, joperu imeeri kʼumanchikuarhu anapuechaksï no jiókasti. 12 Joperu imeechani kʼóru engaksï jiókaka, íntsaasti sésikua paraksï Tata Diosïiri uájpeeni jimbokaksï mintsikasïreenga imeeri nombrini. 13 Ka imeechaksï no niárasti kánguarhinhani iurhirini jimbo ni jimbokaksï kʼuiripuecha ísï uékaska o jimboka achamasï ma ísï uékaska, sánderu sési, Tata Diosïsï kánguarhiati.

14 Ka Uandakua niárasti kʼuiripu úkuarhintani ka juchantsïni jingoni irekasti ka exespkachi imeeri tʼíntskuani, ísï komueska taati ma na íntskujka tʼíntskua imeeri máechakua uájpani. Ka Tata Diosï kánikua jaiapanhentasïreendi* ka ima méntkisï jurhimbikua ambe jorhentpisïreendi. 15 —Juanu imeeri ambesï uandantapti. Uandaspti: “¡Ínisïni arhikuekeenga engani uandapka ‘Ima enga ísï tátsekua juuaka eska ji, orheta niáraspti jimboka tʼuini jarhaspkia ante de ji jarhani’!”—. 16 Imajtsïni kánikua kóndentasïndi* iámindu juchantsïni, jimboka ima meru kánikua kóntpintasïnga. 17 Jimboka Tata Diosï Moisésini jimbo íntspispka Leini, joperu tata Jesukristuni jimboksïsï kʼuiripuecha kánikua kóndenhantati ka imani jimbosï niárati jarhani jurhimbikua ambe. 18 Méntku no ma kʼuiripu exexati Tata Diosïni. Ima máechakua diosï enga Taatiiri máekandu jimbo jaka,* imajtsïnisï aianguti na enga jásïika Tata Diosï.

19 Ini ambesï uandantapti Juanu engaksï judiuecha Jerusaléni uératini axaapka saserdotiichani ka lebiteechani paraksï Juanuni kurhamarhini “¿Neeskiri tʼu?”. 20 Ka Juanu no ísku pakaraspti, sánderu sési, arhiaspti: “No jiiska Kristu”. 21 Ka imeechaksï arhispti: “¿Jimajkania? ¿Elíasiiskiri?”. Ima arhiaspti: “Nómbe, no Elíasiiska”. “¿Tʼuri jindeeski Tata Diosïiri Uandakua Pári?”.* Ka ima arhiaspti: “¡Nómbe!”. 22 Ísï jimbo, arhisptiksï: “Arhijtsïni neeskiri tʼu para jucha ísï aianguani imeechani engajtsïni axaka. ¿Ambejtsïni sáni uaa aianguni chiiti ambe?”. 23 Ima arhiaspti: “Ji jindeeska ima enga desierturhisï uinhachani jaka ‘¡Ú je eska Tata Diosï Jeobaeri xanharu pareju jándu pakaraaka!’, ísï eska na uandapka Isaíasi Tata Diosïiri uandakua pári”. 24 Fariseuechaksï axaaspti imani kʼuiripuechani. 25 Ka kurhamarhisptiksï: “Engari tʼu no jindeeka Kristu, nijtu Elíasi, nijtu Tata Diosïiri Uandakua Pári, jiájkani, ¿andiresï itsï ataajki* kʼuiripuechani?”. 26 Juanu arhiaspti: “Ji itsï jingoni itsï ataasïnga kʼuiripuechani. Chánksïni jingoni jarhasti nema engajtsï chá no míteka. 27 Imeesti enga ísï tátsekua juuaka eskani ji, ka ji no jamberini jukanchaska kuarhachiichani kuerandukuani”. 28 I ambe Betania úkuarhispti, Jordánirhu parhikutenisï jima enga Juanu itsï ataani japka kʼuiripuechani.

29 Ísï pauandikua, Juanu exespti Jesúsini enga nirani japka andarhierani ka uandaspti: “¡Exe je, inde jindeesti Tata Diosïiri Karichi sapichu enga pʼikurhiantajka pekadu parhakpini anapu kʼuiripuechani! 30 Ínisïni arhikuekeenga engani uandapka: ‘Ima enga ísï tátsekua juuaka eska ji, orheta niáraspti jimboka tʼuini jarhaspkia ante de ji jarhani’. 31 Jíjtuni no mítespka, joperu arini ambe jimbosïni juka itsï ataani kʼuiripuechani: parakaksï Israeli anapuecha niárapiringa míteni imani”. 32 Ka Juanu ístu uandantaspti: “Exespka espirituni auandarhu uératini kétseni jarhani komueska palomasï ma ka na enga imani andarhierapka. 33 Jíjtuni no mítespka, joperu ima engareni axaka parani itsï jingoni itsï ataani kʼuiripuechani, arhisptirini: ‘Mítentaakari imani enga espiritu santu jimbo itsï atajpijka engari exeaka eska espiritu kétsexaka ka eska imani andarhieraxaka’. 34 Ka ji exespka indeni ambe ka uandantaxaka eska i jindeeska Tata Diosïiri Uájpa”.

35 Ísï pauandikua, Juanu tsimani kʼuiripuechani jingoni jarhaspti engaksï imeeri chúxapatiipka 36 ka enga exepka eska Jesúsi jimeesïsï xanharaxapka, uandaspti: “¡Exe je, i jindeesti Tata Diosïiri Karichi sapichu!”. 37 Ka engaksï ima tsimani kʼuiripuecha engaksï Juanueri chúxapatiipka kurhaapka ini ambe, nirasptiksï Jesúsini chúxapani. 38 Jimajkani Jesúsi pʼirhikuarhispti ka enga exeapka eskaksï chúxapaxapka, kurhamarhiaspti: “¿Ambejtsï uékasïni?”. Imeechaksï arhispti: “Rabí —enga arhikuekajka ‘jorhentpiri’—, ¿naniri pakaraxaki?”. 39 Ima arhiaspti: “Ju je jíndeni jingoni parajtsï exeni”. Ísï jimbo, imeechaksï niraspti ka exesptiksï nani enga pakarani japka ka chúskutasptiksï imani jingoni jarhani; kuatrisïisptia xatini anapu.* 40 Ima tsimani achamasïicha engaksï kurhaapka ambe enga Juanu uandapka ka engaksï nípka chúxapani Jesúsini, ma jindeespti Andrési, Simóni Pedrueri ermanu jémba. 41 Orheta imeeri ermanu jémbani Simónini exentaspti ka arhispti: “Exentaskachia Mesíasini” —enga arhikuekajka Kristu— 42 ka jima páspti enga Jesúsi japka. Enga Jesúsi exepka, arhispti: “Tʼuri jindeeska Simóni, Juanu uájpa. Tʼuri Sefasi arhinhaaka” —enga arhikuekajka Pedru—.

43 Ísï pauandikua, Jesúsi Galilea uékasïreendi nirani. Jimajkani Felipeni exentaspti ka arhispti: “Júreni chúxapuni”. 44 Felipe Betsaida anapuespti jima enga Andrési ka Pedru anapuepka. 45 Ka Felipe exentaspti Natanaelini ka arhispti: “Exentaskachia imani enga Moisési karapka Leirhu ka ístu engaksï Tata Diosïiri Uandakua Páriicha karapka: Jesúsini, José uájpani, enga Nasareti anapueka”. 46 Joperu Natanaeli arhispti: “¿Andi uaa ambakiti ambe uérani Nasareti uératini?”. Ka Felipe arhispti: “Ju parakari exekuarhiaka”. 47 Enga Jesúsi exepka Natanaelini nirani jarhani andarhierani, uandaspti: “Exe je, Israeli anapu achamasï ma enga sési jámajka”. 48 Natanaeli kurhamarhispti: “¿Tʼureni néna míteski jíndeni?”. Jesúsi arhispti: “Ante dekini Felipe uandajpani, jíkeni tʼuini exespkia jígusïirhu jandukutini”. 49 Natanaeli arhispti: “Jorhentpiri,* tʼuri jindeeska Tata Diosïiri Uájpa, tʼuri jindeeska Israeli anapu Rei”. 50 Jesúsi arhispti: “¿Imani jimbojkurini jakajkusïni jimbokakeni arhispka eskakeni jígusïiri jandukutini exespka? Útasïri sánderu kʼéri ambe exeaka”. 51 Ka ístu arhiaspti: “Jíksïni sési jimbo arhisïnga eskajtsï exeaka auandani mítakuarhetini jarhani, ka ístujtsï exeauaka Tata Diosïiri ánjeliichani engaksï karhancheni ka kétseni jauaka paraksï Achamasïiri Uájpani andarhierani”.