Primeru Karakata Pedrueri
4 Jimboka Kristu no sési nitamakuarhispka enga kʼuiripu máepka, jiájkani chájtu jánguarhinta je májkueni eratseni* eska ima; jimboka ima kʼuiripu enga no sési nitamakuarhika imeeri kuerpurhu, nóteru no sési ambe* niátasïndia 2 para úni ísï irekani eska Tata Diosï na uéjka enga jamberi útasï kʼuiripu máeuaka, ka nóteru ísï irekania eskaksï kʼuiripuecha na tsitijka. 3 Jimboka ióniiskia engajtsï ísï jámaka eskaksï parhakpini anapu kʼuiripuecha na jámajka,* no sáni kʼuratsekua jingontsï niátani no sési jásï ambe,* tsitintsï no sési ambe niátani, jukarijtsï kauini, tsïnchentantsï kʼuínchikuecharhisï, kʼuínchikua ambejtsï úntani parajtsï kauini ka diosï úkatechantsï kómarhiani enga xáni no sési jaka. 4 Imeechaksï ísku pakarasïndi jimbokajtsï chá nóteru ísï jámasïngia eskaksï imeecha na irekajka, engaksï tsïnchentajka ikichakueni jásï ambe niátani, ka jimboksïsï xáni no sési ambe uandajti chaari ambe. 5 Joperu i kʼuiripuechaksï kuenta íntskuntaati imani enga jingontku jaka para tsípitiichani ka uarhiriichani jusgariuani. 6 Ka jimboksïsï uarhiriichajtu aiangunhapti ambakiti aianhperakuani parakaksï ísï irekaaka eska espiritu santu na uandajka ka ísï eska Tata Diosï na sési exejka, nájkirukaksï kʼuiripuecha ísï jusgariuauaka eskaksï na xarharajka.
7 Joperu no ióni jimbo, iámindu ambe kʼamakurhiatia. Ísï jimbo, méntkisï sési eratsenta je ambe ma ka méntkisï jingontku ja je* parajtsï kómarhini Tata Diosïni. 8 Joperu ambe engajtsï sánderu jatsika para úni jindeesti kánikua xénchperani, jimboka ima enga xénchpejka méntkisï puátspentasïndi. 9 Jatsiskajtsï para iáminduechani sési kaani ka asï jáma je uandauandamini jarhani. 10 Imani intsïmperata engajtsï mándani arini intsïnhaka, úra je parajtsï jarhuataani máteruechani paraka Tata Diosï imeechantu kánikua kóndeantauaka, ka Tata Diosï mámaru kóntpintasïndi. 11 Enga nema uandaska, eska ísï uandaaka komueska ima enga Tata Diosïiri uandakuani jámajka uandantani; ka enga nema jántspikuajka máteruechani, eska ísï uaaka Tata Diosïiri uinhapikua jimbo, paraka tata Jesukristuni jimbo, Tata Diosï iámindu ambe jimbo kʼéri ambe arhinhaaka. Imasï kʼéri ambeeti ka uinhapikua jatsini para méntkisï. Eska ísï úkuarhiaka.
12 Juchiiti erachiicha* engaksïni ji xáni xénchajka, asï ísku pakara je engajtsï ísï no sési nitamakuarhini jaka, enga ísïika komueska chpiri, asï ísku pakara je enajkijtsï no mítepirini andijtsïsï ísï nitamakuarhini jaki. 13 Sánderu sési, seguirii je sési pʼikuarherani jimbokajtsï ísï kómu nitamakuarhixaka eska Kristu, parakajtsï chájtu uaaka tsípini ka kánikuajtsï sési pʼikuarherani jiáni enga ima xarhataaka na enga xáni kʼéri ambeeka. 14 Chájtsï kánikua tsípisïnga engajtsï no sési arhinhani* jarhajka Kristueri nombri jimbo, jimboka inde ambe xarhatasïnga eskajtsï jatsiska espirituni enga xáni kʼéri ambeeka ka enga jindeeka Tata Diosïiri espiritu.
15 Joperuni ji no uékasïnga eskajtsï chá máisï no sési nitamakuarhini jauaka jimboka uándikpiska, sïpani jámaska, no sési ambe niátaska o jimboka jámaska máteruechani inchaakukuani. 16 Joperu enga nema no sési nitamakuarhiska jimboka Kristueri chúxapatiiska, asï jámee kʼuratseni; sánderu sési, eska seguiriini jauaka kʼéri ambe arhini Tata Diosïni jimboka ísï irekasïnga eska Kristueri chúxapati ma. 17 Jimboka i jindeeska tiempu enga uaxastakata jakaia paraksï Tata Diosïiri kʼumanchikuarhu anapuecha ueenani jusgarinhani. Ka enga juchantsïni jingoni ueenaska, jiájkani, ¿ambeksï úkuarhinchaa imeecha engaksï no újka ambe enga Tata Diosïiri ambakiti aianhperakua arhijka? 18 “Ka enga kʼuiripu ma enga sési jámajka jatsika para kánikua jánguarhintani paraka Tata Diosï pʼímutantaaka, jiájkani, ¿ambe úkuarhinchaa ima enga no kurhajchajka Tata Diosïni ka ima enga no sési ambe niátajka?”. 19 Ísï jimbo, imeecha engaksï no sési nitamakuarhini jaka jimbokaksï úsïnga ambe enga Tata Diosï uéjka, eskaksï seguiriini jauaka sési ambe úni ka Kuerajpiriiri jájki jimbo jarhani, ima enga mintsinharhikueka.