Mateu

3 Imani jurhiatikuechani jimbo, Juanu, enga itsï atauenga* kʼuiripuechani, ueenaspti aianhpini desierturhisï enga Judea jaka. 2 Uandasïreendi: “Móanta je, jimboka auandarhu anapu Reinu janoxakaia”. 3 Isaíasi, Tata Diosïiri uandakua pári,* Juanunisï arhikuekani japti enga uandapka: “Nema kurhaakuarhixati uinhachani jarhani desierturhisï: ‘¡Listu jatsi je Tata Diosï Jeobaeri xanharuni! Ú je eskaksï Tata Diosïiri xanharuecha pareju jándu pakaraaka’”. 4 Juanueri xukuparhakua, kameiueri pʼunguari jingoni úkata jarhaspti ka sintu ma sïkuiriiri jónguarhisïreendi. Chochuechani auasïreendi ka ístu juátarhu anapu tékolmena* arhasïreendi. 5 Ka iámindu kʼuiripuechaksï nirasïreendi exeni, Jerusaléni anapuecha, iámu Judea anapuecha ka engaksï xáni Jordánirhisï irekapka. 6 Ima iurhekua Jordánirhu itsï ataasïreendi ka imaksï kʼuiripuni japarini uandantasïreendi ambe engaksï no sési úni japka.*

7 Enga Juanu exepka eskaksï uánikua fariseuecha ka saduseuecha jurhaxapka jima enga ima kʼuiripuechani itsï atauenga, arhiaspti: “Akuitsi uájpeecha, ¿andi néksïni arhiski eskajtsï uaaka sïpakuarhini ima jurhiatikueri enga Tata Diosï kastigarpiaka? 8 Orheta ú je ambe ma parajtsï xarhatani eskajtsï móantaskia. 9 Asï tekaa je ni sikiera eratseni ‘Juchaari taati Abraániisti’. Jimboka jíksïni arhisïnga eska Tata Diosï uaaka úni eskaksï ini tsakapuechani jimbo uéraaka Abraáni uájpeecha. 10 Jácha anhatapuecheeri sïranguarhu jarhastia. Ísï jimbo, ima anhatapuecha engaksï no ambanharhi frutu jukaaka, chʼapanhaatiksï ka chpirirhuksï kʼuanijpanhaati. 11 Jíksïni itsï jingoni itsï ataxaka chánksïni jimbokajtsï móantaskia, joperu ima enga ísï tátsekua juuaka eskani ji, sánderu uinhapitiisti ka ji no jamberini jukanchaska kuarhachiichani pʼikuantani. Imaksïni espiritu santu jingoni itsï ataati ka chpiri jingoni. 12 Jájkirhu kámaxati trigu kʼuanikutarakuani ka sési ambantskantaati jima enga trigu uauatajka, tánantaati triguni ka patsaati jima enga tʼirekua ambe patsajka, joperu pajani chpiri ma jingoni kurhiraati enga méntku no pátakuarhijka”.

13 Tátsekua, Jesúsi Jordánirhu niraspti Galilea uératini paraka Juanu itsï atapiringa. 14 Joperu Juanu méntku úndaspti arhini eska nómbe. Arhispti: “¿Andirenisï jurhajki jíndeni andarhierani? Tʼurenisï jatsipiringa parareni itsï atani”. 15 Jesúsi arhispti: “Asïrini arhi eska nómbe, jimboka ini ambe jimbo, niáraakachi úni ambe enga xáni Tata Diosï uéjka”. Ísï jimbo, Juanu nóteru ambe ma arhisptia. 16 Enga Jesúsi itsï atakuarhipkia, uémentaspti ka jirejiresï mítakuarhespti auanda ka ima* exespti Tata Diosïiri espirituni ísï kétseni jarhani komueska palomasï ma ka Jesúsini niraxapti andarhierani. 17 Ka nema auandarhu uératini uandaspti: “I jindeesti juchiiti Sapi* engani xáni xénchajka, ji jaiapanhentasïnga”.