Primeru Karakata para Timoteu

2 Ísï jimbo, jíksïni uékasïnga arhini eskajtsï kómarhijpikuauaka sáni iámindu kʼuiripuechani, eskajtsï mintsita jingoni kómarhiaka Tata Diosïni ka eskajtsï diosmaiamukua arhiaka, 2 ka ístu kómarhijpikua je juramutiichani ka iámindu imeechani engaksï kʼéri ambeeka,* parachi jucha seguiriini jarhani sési irekani ka nóchi ambe ma jimbo uandanhiani, ka parachi ístu sési marhuakuni Tata Diosïni* ka janhanharhikua jingoni. 3 Tata Diosï, ima engajtsïni pʼímutantaka, kánikua sési exesïndi ini ambe ka kánikua jaiapanhentasïndi 4 jimboka ima uékasïnga eskaksï iámindu jásï kʼuiripuecha pʼímutanhantaaka ka eskaksï niáraaka sési míteni jurhimbikua ambe. 5 Jimboka májkusï Tata Diosï jati, ka májkusï jati enga jarhuajpejka para inde ambe enga Tata Diosï kʼuiripuecha jingoni pakatperaka: ma achamasï enga jindeeka Kristu Jesúsi, 6 ima íntspisti imeeri tsípikua, ka enga ísï úka, íntspisti ambe enga uétarhini japka para iáminduechani* euajpiantani. I ambe jiáni uandanhantaati enga uaxastakata jakaia. 7 Ji erakunhaska parani ini ambe jámani uandantani ka parani apostoliini, parani jorhendaani no judiuechani nénaksï uaa mintsikani Tata Diosïni ka ístu parani jurhimbikua ambe jorhendaani. Jíksïni jurhimbitku aianguxaka ka nóksïni chkuanderachixaka.

8 Ísï jimbo, ji uékasïnga eskaksï kʼuiripuecha iápurisï seguiriini jauaka kómarhini, eskaksï tarhatauaka jájkiichani paraksï kómarhini, joperu eskaksï no jámaaka ikiani ka nijtu arhirperani. 9 Ka ístu, nanakechaksï jatsisti para sési mórhekuarhini, ka engaksï sési jáxentaaka, jatsistiksï para xarhatani eskaksï janhanharhiasïnga máteruechani ka eskaksï sési eratsesïnga;* nóksï jatsisti para tepeni jauirini ka oru ambe jukajtsïni o perleechani o imani takusï jukantani enga kánikua jukaparhaka, 10 sánderu sési, jatsistiksï para sési ambe úni ísï eskaksï na jatsika para úni ima nanakeecha engaksï uandajka eskaksï sési marhuakuxaka Tata Diosïni.*

11 Enga nanaka jorhendanhani jauaka, jatsisti para pínasku jarhani* ka kaxumbikua jingoni kurhajchaani tatakeechani. 12 Ji no uékasïnga eska nanaka jámaaka jorhentpini ka nijtu eska juramukuaka tatakani; sánderu sési, jatsisti para pínasku jarhani.* 13 Jimboka Adáni orheta kueraanhaspka ka tátsekua Eba. 14 Ístu, nóksï Adáninisï támisï jánhastapti, sánderu sési, nanakanksïsï sési sési támisï jánhastapti ka imasï niárapti pekadu ambe* úni. 15 Joperu nanakani kánikua jarhuataati enga kánguarhiaska sapiichani, joperu jiántku enga* seguiriini jauaka mintsikani Tata Diosïni, enga xénchpeaka ka enga pímbinhasï jauaka, ka enga méntkisï sési eratseaka.*