Apokalipsisi
20 Ji exespka ánjelini ma enga auandarhu uératini kétseni japka, jima anapu iabeni kámaxapti nani enga xáni jauanhika* ka ístu k’éri kadena ma kámaxapti jájkirhu. 2 Jupikaspti dragonini, ióntki anapu akuitsini enga jindeeka Noambakiti ka Satanási, ka mili uéxurhini jótaspti. 3 Ka kʼuaninhaspti jima enga xáni jauanhika, jima ónhaspti ka sési míkakuspti* paraka nóteru jámapiringia támisï jánhastaani* kʼérati ireteechani astaka na nitamapiringia mili uéxurhini. Tátsekua jatsisti para jurajkunhani ma tiempu.
4 Ji exeaspka kʼérati uaxantskuechani,* ka imeecha engaksï jima uaxakatini japka juramukuaksï intsïnhaspti paraksï jusgarpini. Ísïisti, imeecheeri iurhirini* exespka engaksï uándikunhapka* jimbokaksï uandantasïreenga Jesúsiiri ambe ka ístu jimbokaksï uandantasïreenga Tata Diosïiri ambe, imeecha engaksï no kómarhipka no sési jásï animalini nijtu imeeri imajenini ka engaksï no jatsikunhapka mínda tsʼérukuarhu nijtu jájkirhu. Iichaksï tsíntaspti ka Kristu jingonksï juramuspti mili uéxurhini. 5 Íksï jindeesti engaksï orheta tsíntaka. —Máteru uarhiriicha engaksï pakarani japka, jiánksï tsíntaspti enga na nitamapkia mili uéxurhini—. 6 Tsípisïndi ka pímbinhasïisti ima enga orheta tsíntajka; méntku no ma ambe úkuasïndi uarhikua enga jindeeka para tsimani úni jámani, sánderu sési, Tata Diosïiri ka Kristueri saserdotiuatiksï ka imani jingonksï juramuati mili uéxurhini.
7 Joperu enga na nitamaakia mili uéxurhini, Satanási jurajkunhaati ka uéntaati jima enga ónhakata jauaka 8 ka uéraati para támisï jánhastaani kʼérati ireteechani, indeechani engaksï tʼápuru ladu echerirhu jaka, Gog ka Magogini, para tánaantani ka uarhipenksï. Iichaksï xáni uáneesti komueska marirhu anapu kutsari. 9 Ka iichaksï iápurisï niraspti echerirhu ka uirhipandasptiksï jima engaksï pímbinharhatiicha japka* ka ístu iretani enga xáni xénchanhajka. Joperu auandarhu uératini chpiri uekorhespti ka méntku kʼamajpaaspti. 10 Noambakiti, ima enga támisï jánhastpini japka, kʼuanijpanhaspti lagurhu chpiriiri ka asufriiri, jima engaksï tʼuini japkia no sési jásï animali ka ístu Tata Diosïiri uandakua pári* arhikata. Iichaksï chúrikua ka jurhiakua no sési pʼikuastanhani jauati* para méntkisï.
11 Ji exespka kʼéri uaxantskuani* ma enga urauraxepka* ka ístu imani enga jima uaxakatini japka. Echeri ka auanda sïpakuarhikusptiksï ka jimajkuksï nóneespti. 12 Ka exeaspka uarhiriichani, kʼératiichani ka sapirhatiichani, engaksï kʼéri uaxantskuarhu* orhepatini anhandetini japka, ka pʼirakunhasptiksï karakateecha.* Joperu pʼirakunhaspti máteru karakata: karakata nani enga karanhani jaka néksï intsïnhaa tsípikua. Ka ísï eska na karakata jaka karakateecharhu, uarhiriichaksï ísï jusgarinhaspti imeecheeri úkuecha jimbo. 13 Mari íntspiantaspti uarhiriichani engaksï jima japka, ka uarhikua ka Tumbajtu* íntspiantasptiksï uarhiriichani engaksï jima japka. Ka mándani arinksï jusgarinhaspti imeecheeri úkuecha jimbo. 14 Uarhikua ka Tumba,* kʼuanijpanhasptiksï lagurhu enga chpiriiriika. Lagu enga chpiriiriika, arhikuekasïndi uarhikua enga jindeeka para tsimani úni jámani. 15 Ka ístu imeecha engaksï no karanhaka imani karakatarhu* nani enga karanhani jaka néksï intsïnhaa tsípikua, kʼuanijpanhastipksï lagurhu enga chpiriiriika.