TEMA ENGA PORTADARHU JAKA | NA ENGA ÚKA ORHEPANI UÉRANI BIBLIA
Biblia útasï jarhasti nájkiruka imani materiali jimbo karanhapka enga niárajka kʼamakurhini
AMBE ENGA JIMBO ÚPIRINGA NÓTERU JARHANIA. Imeecha engaksï Bibliani karantapka ka ístu imeecha engaksï ísï tátsekua kopiaripka, úrasptiksï papiru ka pergaminu paraksï jima karani (2 Timoteo 4:13).a ¿Nénaksï úpirini i materialicha úni eska nóteru japiringia Biblia asta iásï jamberi?
Papiru niárasïndi kuarhakurhini ka kolori jupinhani o sóntku karukurhini. Richard Parkinson ka Stephen Quirke engaksï Egiptu anapu ambe estudiarijka, uandasïndiksï: “Tiempu jingoni, papiru sánhani arhisïndi iluni jásï úkuarhintani ka tʼupurintani. Enga patsakata jauaka papirueri roiu ma, uaati iámu púni ka enga inchaskukata jauaka, animali sapirhatichaksï niárasïndi iámu arhani, sánderia sïruki urapiticha”. Ísï tátsekua engaksï na exeantapkia papiruechani, máruksï jima peeraspti nani enga kánikua tsándeni japka o kuakandeni ka inde ambe úspti eskaksï sánderu sóntku ambendurhikuarhipiringa.
Pergaminu sánderu ióni marhuasïndi eska papiru, peru ístu niárasïndi ambendurhikuarhini engaksï no sési kuidariuaka o enga jima jauaka nani enga kánikua aparhikuarhijka, tsʼirakuarhini o kánikua tsándeni.b Peru ístu, animali sapirhatichaksï niárasïndi arhani. Libru La escritura cotidiana en el Oriente Grecorromano (Everyday Writing in the Graeco-Roman East), uandasïndi andiksïsï u ióntki anapu karakatecha asta iásï jamberi jarhani: “Engaksï ióntki anapu karakatecha niárapiringa kʼamakurhini, iásï nóchi úpiringa míteni ambe enga Biblia uandajka”.
NÉNA ÚSKI ASTA IÁSÏ JAMBERI JARHANI BIBLIA. Lei engaksï intsïnhapka israelitecha, uandasïreendi eskaksï iámindu Israeli anapu reicha, karapiringa ma kopia i leiri, engaksï jindeeka primeru sinku libruecha engaksï Bibliarhu jaka (Deuteronomio 17:18). Ístu, imeecha engaksï kopiechani ueenga, uánikua kopiechanksï uaaspti. Ísï jimbo, primeru siglurhu kʼamarani jámani, iámindu Israeli anapu sinagoguecharhu jarhasptiksïa Karakatecheri kopiecha ka asta jini Masedonia enga xáni iauani japka (Lukasʌ 4:16, 17; Ukuecha [Hechos] 17:11). ¿Nénaksï úski asta iásï jamberi jarhani máru ima ióntki anapu karakatecha?
Karakatecha engaksï ísï mítekateka komu Rollos del mar Muerto, iónksï patsakata jarhaspti porhechini járhaticha jimbo kuebecharhu, jimeesïsï enga kánikua aparhikuarhijka.
Philip Comfort enga mítikuka Nuevo Testamentueri ambe, uandasïndi eskaksï judiuecha porhechini járaticharhuksï patsaasïrenga Karakatechani. Ka kristianuechajtuksï májkueni úspti. Jimbosï máru Biblieri karakatecha niárasptiksï exenhantani porhechini járhatichani jimbo engaksï patsakata japka kuartuecharhu, kuebecharhu ka ístu jimeesïsï enga kʼarikʼarhindeka.
NA ENGA MARHUAPKA I AMBE. Uánikua ióntki anapu Biblieri karakatecha, asta iásï jamberi jarhasti ka máruksï jukari dos mili uéxurhini ísïistia engaksï karanhaka. No jarhasti máteru libru enga xáni uánikua karakatechani jatsiaka ka engaksï xáni ióntki anapueka.
a Papiru jindeesti materiali ma enga úranhajka para jima karani, úkata jarhasti planta ma jimbo enga ísï arhinhajka papiru ka enga itsïrhu andarajka. Ka pergaminu, animaliri sïkuiri jimbo úkata jarhasti.
b Pori ejemplu akta orijinali Declaración de Independencia, Estados Unidos anapu, pergaminu jimbo karanhaspti. No jamberi dosientu sinkuenta uéxurhini nitamasti ka nóteru kánikua xarharasïndia ambe enga arhijka.