Méminduni uéntaspka bisiu jingoni astakani jurajkuka

NA ENGANI IREKAPKA IÓNTKI.

Uéxurhini 1949 jimbo, juchiiti taati jini Australia mótsispti Alemania uératini para jirinhani ánchikuarhita minecharhu ka ístu elektrisidadiri ambe. Jimeesïsï irekaspti nani enga kási no nema irekaka ireta Victoria, ka jima tembuchaspti juchiiti naandi jingoni. Ji uéxurhini 1953 jimbo andajpenuspka.

Máru uéxurhinisï tátsekua, juchiiti naandi uénaspti Biblieri ambe jorhenguarhini Jeobaeri testiguechani jingoni, ísï jimbo desde sapichutki miásïnga Biblieri jorhenguarhikuechani. Joperu, juchiiti taati no ma relijioni xénchasïreendi. Ueenaspti kánikua no sési kámpini. Ka juchiiti naandi kánikua chérhisïreendi, joperu, seguirispti sïpatikuarku jorhenguarhini ka niáraspti jukaparharani ambe enga jorhenguarhini japka. Enga juchiiti taati no jarhenga juchiniu, juchaari naandi jorhendasïrendijtsïni juchiiti ermanani ka jindeeni ambe enga ima jorhenguarhini japka. Arhisïndijtsïni eska echeri paraisu ma úkuarhintapiringa ka eskachi tsípikua jingoni irekapiringa engachi ísï jámapiringa eska Biblia na uandajka (Salmo 37:​10, 29; Isaías 48:17).

Jimbokarini juchiiti taati no sési kámasïreenga, uéraspka juchiniu uératini enga 18 uéxurhini jatiripka. Nájkiruka jakajkuenga ambe engareni juchiiti naandi jorhendeega, no jukaparharasïreenga ambe enga Biblia jorhentpienga, jimbosïni no ísï jámeenga. Ueenaspka ánchikuareni elektrisidadiri ambe jingoni turhiriri minecharhu ka tembuchaspka engani 20 uéxurhini andangutapka. Juchaari orheta sapi andajpenuspti tanimu uéxurhini tátsekua,ka inde ambe úspti eskani eratsepiringa ambe enga jindeepka jukaparhakua ambe juchiiti irekuarhu. Mítespka eska Biblia úpiringa jarhuataani juchaari familiani, jimbosï ueenapka jorhenguarhini Jeobaeri testiguecha jingoni. Joperu juchiiti uarhiti no xénchasïreendi Jeobaeri testiguechani. Engani nípka tánguarhikuarhu ma, ima uspti eskani erakupiringa ambe úni: jurajkuni Biblieri ambe jorhenguarhini o uéntani juchiniu. Jimbokani no úsïreenga eratseni ambe úni, úspka ambe engareni ima arhipka ka nóteruni uandontskuarhespka Jeobaeri testiguechani jingoni. Tátsekua no sési p’ikuarheraspka engani jurajkupka ambe engani mítepka eska jurhimbikua ambeeska.

Ma jurhiatikua, juchiiti ánchikuarhitarhu anapu kompanieruechajtsïni uénaspti exerani pornografia ambe. No úsïreenga jurajkuni exeni joperu ikichakueni jásï ambeespti, ka no sésirini pʼikuastasïreendi. Miántasïreenga ambe engani jorhenguarhipka Bibliarhu ka seguru jarhaspka eskarini Tata Diosï kastigaripiringa. Peru engani na sánderu ka sánderu exeni japkia, nóterurini no sési p’íkuastaxaptia ka uénaspka méntkisï exeni.

Nájkirukarini juchiiti naandi kánikua jánguarhintapka parareni jorhendani sési irekani, ma 20 uéxurhinicha jimbo nóteru ísï irekaxapkia. Na engani jámeenga xarhatasïreendi ambe enga japka juchiiti eratsekuarhu. No sési uandontskuarhesïreenga ka ambe engani uandeenga ikichakueni jásï ambeespti. Kánikua ménderueni eratsesïreengia seksueri ambe ka, nájkirukani juchiiti témba jingoni irekani japka niáraspka máteru uarhiitichani jingoni apondini. Ma jurhiatikua eratekuarhispka espejurhu ka eratsespka: “No sési jásï kʼuiripu maeska”. Enbesi de xénchakuarhini niáraspka ikichakueni jásï ambe eratseni juchiiti ambeeri.

Juchiiti temungurhirikua kʼamakurhispti ka no mítespka ambe úni juchiiti irekuarhu. Jimajkani kómarhispka Tata Diosï Jeobani iámindu juchiiti mintsita jingoni. Ménderuni ueenaspka jorhenguarhini Biblieri ambe nájkirukani 20 uéxurhini nitamapkia. Imani tiempu jimbo juchiiti taati uarhisptia ka juchiiti naandi Jeobaeri testigu ma úkuarhispti.

NA ENGARINI BIBLIA MÓJTAKUCHEKA IREKUA.

Kánikua ménderuenispti na engani ji irekapka juramukuecha jingoni enga Biblia uandeenga. Joperu iásï kʼóru uékasïreenga imani pínandikua jatsini enga Tata Diosï eiatspijka imeeri karakatarhu. Ueenaspka nóteru no sési jásï ambeeri uandani ka nóteru sóntku ikiania. Ístu nóteru apondisïreengia uarhiitichani jingoni, ni sentabu jimbo chʼanani, ni kauini ka ístu nóteru sïpasïreenga juchiiti ánchikuarhitarhu.

Juchiiti ánchikuarhitarhu anapu kompanieruechaksï no kurhangusïreendi andisïni uékeenga xáni ísï mójtakurhini. Seguirisïrendiksï uánikua ambe úni paraka ji ménderu uéntapiringa ísï jámani tanimu uéxurhini jimbo. Engani ménderu ikiapiringa o maldisioni ambe uandani, tsípiparinksï uinhachasïreendi: “¡Ióntki anapu Joe ménderu junguastia!”. ¡Kánikuajtsïni no sési pʼikuastasïreendi inde uandakuecha! Ísï pʼikuarherasïreenga enajkini no ueenga mójtakurhini.

Juchiiti ánchikuarhitarhu uinispti pornografia ambe. Juchiiti kompanieruechaksï méntku axatsperani jarhasïreendi fotuechani sïranda jimbo o komputadora jimbo ísï eskani ji na ueenga ióntki. Ji jánguarhintasïreenga parani nóteruni exenia indeni jásï ambe, joperu imeechajtuksï jánguarhintasïreendi para ji ísï úni. Uandajpaspka erachini engani jingoni jorhenguarhini japka Biblieri ambe parakarini jarhuatapiringa ka uinhaperantani, imarini jingontku kurhajchaspti engani ji aianguni japka na engani pʼikuarherani japka. Ima úraaspti máru tekstuechani engaksï iiri ambe uandaenga para ji úni pʼíngukuarhini. Ka ísturi arhispti eskani úpiringa someni kómarhini Tata Diosï Jeobani parani kurhakuni imeeri jarhuajperata (Salmo 119:37).

Ma jurhiatikua tánantaspka juchiiti kompanieruechani ánchikuarhitarhu anapuechani ka, engaksï iáminduecha jima japkia, arhiaspka eskaksï íntsaapiringa máru serbesechani tsimani kompanieruechani engachi mítepka eskaksï kauisïreenga. Iáminduechajtsïni ikiaparini ueenaspti uinhachachini: “¡¿Andichisï íntsaua?! ¡Íksï acheetiicha jánguarhintaxati pʼíngukuarhini!”. Ka ji arhiaspka: “Jíjtuni jánguarhintaxaka”. Ka desde imani jurhiatikua jimbo imeechaksï kurhanguspti eskani jíjtuni jánguarhintaxapka pʼíngukuarhini para nóteru exenia pornografia ambe ka jiáni uératini nóterujtsïni méni arhispti eskani ísï jámapiringa eska ióntki.

Enga na nitamapkia tiempu, ka Tata Diosï Jeobaeri jarhuajperata jimbo, úspka kénditani juchiiti bisiu. Uéxurhini 1999 jimbo itsï atakuarhispka komueska Jeobaeri testigu. Kánikua agradesidu jarhaska jimbokajtsïni ménderu jiárhitaska parani úni sési jángua ma jingoni irekani ka ístu tsípikua jingoni.

Iásï kurhanguska andisï Tata Diosï Jeoba kurhunhijka iámindu imani ambe engani ji xáni ióni tsitipka. Májkueni eska taati uékpiti ma, imarini uékasïreendi kuájchakuni imani no sési jásï ambeeri engareni úpiringa úchini pornografia. Ísïisti eska na uandajka Biblia ixú Proverbios 3:​5, 6: “Mintsika Jeobani iámindu chiiti mintsitani jingoni, ka asï mintsika chiiti eratsekuani. Iámindu ambe engari uaaka, u imani eratseparini, ka ima jurhimberauati chiiti xanharuechani”. Biblieri anapu juramukuechaksï kuájchakukua máesti; ka enga na nitamaakia tiempu uaakachi sési irekani (Salmo 1:​1-3).

NÁKI KÓNTPERATECHANI INTSÏNHAASKIA.

Ióntki kánikua no sési exekuarhisïreenga, joperu iásï nóteru ambeia ka pínandikua jatsiska. Iásï pímbinhasï irekasïnga ka meru pʼikuarherasïnga eskarini Tata Diosï Jeoba puáchentaskia ka eskarini jarhuatasïnga. Uéxurhini 2000 jimbo tembuchaska ambakiti Jeobaeri testigu ma jingoni enga arhinhajka Karolin. Ima ísï xáni xénchasïreendi Tata Diosï Jeobani komueska ji. Ka pínandikua jingonchi irekaska. Kánikuachi tsípini pʼikuarherasïnga jimbokachi erachiicha jingoni jarhaska engaksï uápuru ísï anapueka ka engaksï pímbinhasïka ka uékpisïndiksï.