¿Nénaksïni marhuachisïni mítini Tata Diosïni?

Iásï jamberichi exeskia máru ambe engajtsïni jarhuatajka mítini néski Tata Diosï. Exeskachi eska Biblia jorhentpesïnga eska imeri nombri jindeska Jeoba ka eska imeri sánderu ambakiti kualidadi uékperakueska. Ístuchi exeska ambe enga xáni úkia ka ambe enga útasï uáka kʼuiripuni jimbo. Peru para Tata Diosïni mítini sánderu ambe arhikuekasïndi, perujtsï jamberi cha kurhamarhikuarhijka sini jukaparhakueski ísï úni.

Jeobaksïni aiachesïndi eska engajtsï jirinhantaska “ima jurajkuati eska[jtsï] exentaaka” (1 Crónicas 28:9). Engajtsï jánguarhintaska mítini Jeobani kʼéri kóntperatajtsï ma intsïnhaaka: ambakiti pájperakua ma jatsini imani jingoni (Salmo 25:14). ¿Nénaksïni jarhuataa sési pájperani imani jingoni?

Merujtsï tsípikua jingoni irekaaka. Biblia arhisïndi eska Jeoba Tata Diosï máeska enga felisika (1 Timoteo 1:11, TNM). Engajtsï andarheraska Tata Diosïni ka jánguarhintani ísïini eska ima, merujtsï felisiuaka ka i ambeksïni jarhuataati para chári kuerpu sési jarhani, eratsikua ka parajtsï sési pʼikuarherani (Salmo 33:12). Ístujtsï nóteru uákia imani ambe engaksïni no sési úchiaka, ambarhati pʼindekuechantsï jatsiauaka ka sésijtsï pájperaaka máteruecha jingoni. Seguru eskajtsï niáraaka májkueni uandani eska salmista: “Kánikua sésisti para ji, Tata Diosïni andarherani” (Salmo 73:28).

Tata Diosïksïni kuidariuati. Jeoba aiakuasïndi imeri amiguechani: “Juchiti éskuechaksïni méntku exeni jauati” (Salmo 32:8). I ambe arhikuekasïndi eska Jeoba kuidariasïnga mándani arhini imeri marhuarichani ka íntsaasïndi ambe engaksï meru uétarhinchani jarhajka (Salmo 139:1, 2). Engajtsï sánderu sési pájperaaka Jeoba jingoni, exeakajtsï eskaksïni ima méntkisï jarhuataaka.

Ambakiti kóntperatajtsï ma jatsiaka sánderu orhepani. Aparti deksïni iásï jarhuatani parajtsï felisini, ístuksïni Jeoba aiachesïndi sési jásï ma irekua jatsini sánderu orhepani (Isaías 48:17, 18). Biblia arhisïndi: “I jindesti tsípikua para méntkisï, eskaksïni mítiaka tʼun[gini] engari tʼujku jindeeka Diosï engari sési jimboeka, ka ístu Jesukristuni engari tʼu axaka” (Juanu 17:3). Ambe engajtsïni Tata Diosï aiachejka, ísïsti komu ankla ma enga uinhamu “jupikuarhitini jaka” engajtsïni jarhuatajka ini jurhiatikuecha jimbo engaksï xáni úkua jukaka (Ebreu 6:19).

I solu máru ambesti de na engajtsïni marhuachijka sési mítini Tata Diosïni ka imeri amigueni. engajtsï uéjka sánderu ambe mítini, pʼímarhisïngaksïni Jeobaeri testigu ma jingoni uandontskuarhini o juchari pájina Internetirhu inchani www.jw.org/tsz.