¿MÍTESPIJTSÏ?
¿Andisï repetirikuarhijki máru ambe Bibliarhu?
IMEECHA engaksï karaka Bibliani, ménisïksï niáraspti májkueni karani ambe enga máteru karapkia, asta ménichani imani mismu uandakuechani úraani eska máteru. Ju je exeani tanimu rasoniichani engaksï jamberi jimbo ísï úpka:
Jiáni enga karanhapka. Ióntki anapu israeliteechaksï no jatsikuarhespti Leiri kopia ma. Jiántkuksïsï ueendi kurhaani ambe enga Lei uandeenga engaksï tánguarhintapiringa tabernakulurhu ka templurhu (Deut. 31:10-12). Jamberi kánikua úkua jukeendi jingontku kurhaani xáni uánikua kʼuiripu jingoni, ka tekaantani jimbokaksï ióni anhandetini jarhasïreenga (Neh. 8:2, 3, 7). Ísï jimbo, kánikua marhuakuauendi someni kurhaani májku ambe jimboka jarhuataasïreenga paraksï no mirikurhini ka ísï úni eska Lei na uandeenga. Ka sánderu jukaparhakuespti ménderu kurhaani Tata Diosï Jeobaeri juramukuechani o juisiu ma (Lev. 18:4-22; Deut. 5:1).
Na enga karakata jaka. Ma 10% Biblieri, pirekuecheestiksï komueska Salmos, El Cantar de los Cantares ka Lamentaciones. Máru pirekuecha jimboksï repetirikuarhisïreendi orasioniicha o estribiiu ma. Enga ísï repetirikuarhienga, marhuasïreendi para xarhatani ambeerisï uandeeni pirekua ka para sánderu sóntku jorhenguarhini. Ju je exeni ejemplu ma, Salmo 115:9-11: “Oh, Israeli, mintsika Tata Diosï Jeobani. (Ima jindeesti engaksïni jarhuataaka ka engaksïni kuájchakuaka). Oh, Aaróniiri kʼumanchikua, mintsika Tata Diosï Jeobani. (Ima jindeesti engaksïni jarhuataaka ka engaksïni kuájchakuaka). Chá engajtsï chénharhijka Tata Diosï Jeobani, mintsika je Tata Diosï Jeobani (Ima jindeesti engaksïni jarhuataaka ka engaksïni kuájchakuaka)”. Enga nema pireenga indeni xáni sési jásï pirekuani, ¿a no eska no mirikurhienga ambe enga uandeenga?
Andisï karanha. Máru achamasïicha engaksï karaka Bibliani, repetiriisptiksï imani ambe enga jukaparhakueka ka enga jindeepka para no méni mirikurhini. Pori ejemplu jiáni enga arhiapka israeliteechani eskaksï no jámapiringa iurhiri arhani, arhispti Moisésini eska méntku úndapiringa arhiani andiksïsï no jatsipi para ísï úni. Tata Diosï uékasïreendi eskaksï israeliteecha no méni mirikurhipiringa eska iurhirisï jindeeka tsípikua (Lev. 17:11, 14). Ísï ióni tátsekua jiáni engaksï Jerusaléni anapu apostoliicha ka orhejtsïkutiicha imeeri ambe uandontskuarhepka engachi no jatsika para úni ka engachi uéjka eskajtsïni Tata Diosï jaiapanhentaaka, ménderuksï uandaspti eskachi no jatsiska para iurhiri arhani (Úku. 15:20, 29).
Nájkiruka Bibliarhu repetirikuarhijka máru ambe, no arhikuekasïndi eska Tata Diosï Jeoba uékasïnga eskachi puru imani ambejku repetiriini jauaka. Jesúsi uandaspti: “Engari kómarhini jauaka, nóri méntku úndaaka májku ambe uandani” (Mat. 6:7). Ístu uandaspti eskachi uaaka mámaru ambe kómarhini Tata Diosïni ka enga terukuntajka imani ambe jingoni enga ima uéjka (Mat. 6:9-13). Nájkirukachi no repetiriuajka mismu uandakuechani jiáni engachi kómarhijka, kʼóruchi uaaka someni aiangukuarhini májku ambe (Mat. 7:7-11).
Xáni enga sésiika enga Bibliarhu repetirikuarhijka máru ambe, juchaari Ambakiti Jorhentpirijtsïni ísï jorhendasïndi parajtsïni sési nicheni (Is. 48:17, 18).