Chájtujtsï uaaka ini ambe kurhanguarhini

Juanu ka Maríaa temungurhiri máestiksï ka imani paisi jimboksï irekasti engaksï uánikua filipinuecha nirajka ánchikuarhini, ka imeechaksï jánguarhintasïndi aianguani Biblieri ambe. Jiáni enga COVID-19 japka, María ueenaspti uánikua kʼuiripuechani jorhendaani ka no solu imeeri paisirhu anapuechani, sino ístu máteru paisirhu anapuechani. ¿Néna ísï úspi?

María kurhamarhiasïreendi imeeri jorhenguarhiriichani: “¿Míteskiri nemani enga tsitipiringa Biblieri ambe jorhenguarhini?”. Engaksï arhienga jo, ima arhiasïreendi “¿uaa míteni imani kʼuiripuni?”. Enga ini ambe kurhamarhiauenga jarhuataspti paraka uánikua kʼuiripuechani jorhendaapiringa. ¿Andi? Jimbokaksï kʼuiripuecha kánikua tsitisïnga jorhenguarhini Tata Diosïiri Uandakueri ambe ka tsitisïndiksï parientiichani ka amiguechani aianguani ambe engaksï jorhenguarhini jarhajka. Ju je exeni ambe enga nitamakuarhipka María.

Jasmini enga María Biblieri ambe jorhendani japka, arhispti eskaksï ístu tʼámu kʼuiripuecha uékasïreenga jorhenguarhini Biblieri ambe. Ka ma jindeespti Cristina enga kánikua tsitienga jorhenguarhini Biblieri ambe, jimbosï arhipti eska tsimani uelta jorhenguarhipiringa ma semana jimbo. Enga María kurhamarhipka sini míteaspi máteru kʼuiripuechani engaksï uékapiringa jorhenguarhini Biblieri ambe, Cristina arhispti: “Jo, juchiiti amigaechaksï uékaati jorhenguarhini”. Ka solu máru semanechanisï tátsekua, María míteaspti támu Cristineri amiga jémbeechani. Joperu ístu, Cristina mítetaraspti máteru amigu jembeechani ka indeechajtuksï mítetaraspti máteru kʼuiripuechani engaksï ístu uékeenga jorhenguarhini Biblieri ambe.

Enga María na míteapkia Cristineeri amiga jémbeechani, Cristina uékasïreendi eska imeeri familiajtu enga Filipinas irekaka, jorhenguarhipiringa Biblieri ambe. Jimbosï uandontskuarhepti Andrea jingoni, imeeri uájpa. Joperu ueenani jámani, Andrea uandaspti: “Jeobaeri testiguechaksï sekta máesti. Nóksï jakajkusïndi Jesúsini ka soluksï Antiguo Testamentuni arhintasïndi”. Joperu ma uelta jimbojku enga jorhenguarhipka Biblieri ambe, kuenta íntskukuarhespti eska no ísïispka ambe enga eratseenga. Jimbosï enga jorhenguarhini jarheenga, uandeendi: “Enga Biblia ísï uandajka, ísïiti”.

Sánderu tátsekua, María míteaspti Andreaeri tsimani amiga jémbeechani ka ánchikuarhitarhu anapu kompanierani ma engaksï ístu ueenapka jorhenguarhini Biblieri ambe. Ka Andrea tía jémbani ma jatsispti enga Angela arhinhajka ka enga sieguepka. Joperu enga Andrea jorhenguarhini jarhenga, Angela sïpatikuarku kurhaani jarhasïreendi. Ma jurhiatikua, Angela arhispti Andreani eska uékasïreenga míteni Maríani jimboka imajtu uékasïreenga jorhenguarhini. Angela kánikua tsitisïreendi jorhenguarhini, jimbosï no jamberi ma mesi jimbo, uánikua tekstuechani jorhenguarhiaptia, ka ístu uandaspti eska uékasïreenga tʼámu uelta jorhenguarhini ma semana jimbo. Andrea jarhuatasïreendi Angelani paraka konektarikuarhipiringa tánguarhikuecharhu bideuiamada jimbo.

Enga Cristina jorhenguarhini jarheenga Biblieri ambe, imeeri uámba Josué jimeesïsï jarhasïreendi kurhaani. Enga María kuenta íntskukuarhepka, kurhamarhispti sini imajtu uékapirini imeecha jingoni jorhenguarhini. Ka ima uandaspti: “Jo, joperuni solu kurhaani jauaka, engareni kurhamarhiaka ambe, ji kéndikuaka”. Nótki jamberi sinko minutu nitamasïreendi ka Josué sánderu uánikua ambe kurhanguarhixaptia eska Cristina ka uandasptia eska imajtu uékasïreenga jorhenguarhini Biblieri ambe.

Uánikua kʼuiripuechaksï ueenaspti jorhenguarhini Biblieri ambe, jimboka María kurhamarhiaspka sinksï uékasïreeni jorhenguarhini. Ka jimboka María no andajkuarhisïreenga xáni uáni kʼuiripuechani jorhendaani, arhiaspti máteru erachi ka pirenchiichani eskaksï jarhuatapiringa. María 28 kʼuiripuechani ueenaspti jorhendaani Biblieri ambe engaksï tʼámu paisi jimbo anapueka.

Jasmini enga ueenapka jorhenguarhini María jingoni, abrilini 2021 jimbo itsï atakuarhisti ka Cristina maiuni 2022 jimbo ka iásï Filipinas irekaxatiia imeeri familia jingoni. Ka máteru tsimani kʼuiripuechani enga Cristina mítetaraapka Maríani, ístuksï itsï atakuarhistia. Ka máru mesiichani tátsekua, Angelajtu itsï atakuarhisti ka iásï prekursora regulariistia. Ka Josué Cristineeri uámba ka imeecheeri uájpa Andrea ka máteru kʼuiripuecha, kánikuaksï sési jorhenguarhixati.

Primeru siglurhujtu sóntku niáraspti mítekuarhini ambakiti aianhperakua, jimbokaksï máru kʼuiripuecha aianguasïreenga imeeri parientiichani ka amiguechani (Juanu 1:​41, 42a; Úku. 10:​24, 27, 48; 16:​25-33). Chájtujtsï uaaka májkueni úni imani kʼuiripuechani jingoni engajtsï jorhendaani jaka Biblieri ambe ka imeecha jingoni engaksï tsitijka míteni Tata Diosïiri ambe, ka kurhamarhiantsï: “¿Míteskijtsï nemani enga tsitipiringa jorhenguarhini Biblieri ambe?”. Engachi ini ambe kurhamarhiaska, jamberichi uaaka uánikua kʼuiripuechani ueenani jorhendaani Biblieri ambe.