3 Janhanharperani

¿AMBE ARHIKUEKASÏNI?

Temungurhiriicha engaksï janhanharperajka, pendientiksï pájperasïndi, nájkirukaksï no májkueni eratseaka. Libru Diez claves para transformar tu matrimonio, uandasïndi: “I járhati temungurhiriichaksï no uandasïndi eska jatsiska para meru ísï úkuarhini eskaksï iicha na eratsejka. Sánderu sési, uandontskuarhesïndiksï néna sési peentani problema ma. Janhanharhikua jingonksï kurhajchperasïndi ka imani ambeksï úsïndi enga tsimarhani marhuakuauaka”.

BIBLIERI KARAKATA: “Ima enga uékpijka, [...] no uékasïndi imeeri ambejku” (1 Korintu 13:4, 5).

“Para ji, janhanharhini juchiiti uarhiitini arhikuekasïndi eskani jukaparharaaka ka no imani ambe úni enga no sési pʼikuastaaka o enga uaaka eskachi nóteru sési pájperaakia” (Micah).

¿ANDISÏ JUKAPARHAKUE?

Engaksï temungurhiriicha no janhanharperajka, úpirindiksï ueenani arhinchperani, teresmarperani ka no sési pʼikuastperani. Imeecha engaksï familiecheeri ambe exejka, uandasïndiksï eskaksï ini ambe úsïnga ima temungurhiriicha engaksï niárajka diborsiarikuarhini.

“Engajtsï teresmarhuparini arhiska ambe ma chaari uarhiitini parajtsï no sési pʼikuastani, uaati eska ima ísï pʼikuarheraaka eska no ma ambe jukaparhaska ka nóteruksïni mintsikaatia” (Brian).

¿AMBEJTSÏ UAA ÚNI?

EXE JE NA ENGAJTSÏ JÁSÏIKA

Eratsenta je ambe engajtsï uandontskuarheka chaari uarhiiti o acheeti jingoni últimu semana jimbo ka na engajtsï kámaka. Tátsekua mókuanta je arini kurhamarhikuechani:

• ¿Namuni xanharijtsï arhinchaski ka namuni xanharijtsï sési jásï ambe arhiski?

• ¿Nénajtsï xarhatakuski eskajtsï janhanharhiska?

IIRI AMBE UANDONTSKUARHI JE TEMUNGURHIRI

• ¿Náki uandakuecha ka úkuecha úsïni eskachi ísï pʼikuarheraaka eskachi janhanharperasïnga?

• ¿Náki uandakuecha ka úkuecha úsïni eskachi ísï pʼikuarheraaka eskachi no janhanharperasïnga?

KONSEJUECHA

• Tsimarhani kara je tanimu ambe engajtsï uékapiringa eska chaari acheeti o uarhiiti úpiringa para xarhatani eskaksïni janhanharhisïnga. Exea je listeechani ka jánguarhinta je úni ambe enga máteru uéjka.

• Lista ma ú je ima amberi engajtsï tsitijka chaari uarhiitiiri o acheetiiri ka arhi je na engajtsï xáni jukaparharajka.

“Janhanharhini juchiiti acheetini arhikuekasïndi eskani úkuecha jingoni xarhatakuaka eskani jukaparharasïnga ka eskani uékasïnga eska sési pʼikuarheraaka. No uétarhisïndi kʼéri ambe úni para xarhatani eskachi janhanharperasïnga, ménichani sapichitu ambe jingontku sési jarhasïndi” (Megan).

Sánderu jukaparhakua ambe, jindeesti eska chaari uarhiiti o acheeti exeaka eskajtsï janhanharhisïnga ka no eskajtsï chájku ísï exeaka eskajtsï janhanharhisïnga.

BIBLIERI KARAKATA: “Mintsita jingoni pʼamojpera je [...], ka sési kámbera je ka nójtsï teparakuarhitsperani, sino kaxumbitsperani ka no ikiatsperani” (Kolosasi 3:12).