Tata Diosï Dabidini erakusïndi

¿ÚSÏNIRI exeni ambe úkuarhiski ixú? Tumbi kuájpintasti karichi sapichuni. Osu páxaptia para antani. Peru tumbi nirasti chúxapani ka euámukuntasti osuni. ¡Ka enga jauarapkia osu, tumbi atasti ka uándikusti! Ístu máteru jurhiatikua, tumbi kuájpintasti karichini ma enga leoni ma uékani japka antani. ¿Nori exesïni eska i tumbi enga i ambe úka no sáni chésïnga? ¿Mítiskiri néski i tumbi?

I tumbi Dabidisti ka Beleni irekasti. Ka Obedi jindespti inderi tatita, Obedi, Ruti ka Boasiri uájpespti. ¿Miásïniri imechani? Jese jindesti Dabidiri tátemba. Ka Dabidi, imeri tátemberi karichichani eranguasïndi. Dabidi diesi uéxurhini tátsekua andajpenusti enga Jeoba erakupka Saulini para juramutini.

Niárasïndi jurhiatikua enga Jeoba arhijka Samuelini: ‘Pʼiku ambakiti aseiti ma ka ni Jeseri kʼumanchikuarhu jini Beleni. Ji, imeri uájpani ma erakuska para juramutini’. Enga Samueli exejka Eliabini, Jeseri uájpa kʼérini, uandasïndi: ‘I jindeti’. Peru Jeoba arhisïndi: ‘Asï exe na enga xáni iójtaraka ka na enga sési jáxeka. Jimbokani no indeni erakuska para juramutini’.

Ísï jimbo, Jese juákusïndi Samuelini máteru imeri uájpani enga arhinhajka Abinadabi, peru Samueli arhisïndi: ‘Nómbe, Jeoba nójtu erakusti indeni’. Tátsekua Jese juásïndi imeri uájpa Samani. Peru Samueli arhisïndi: ‘Nómbe, Jeoba nójtu erakusti indeni’. Jese juaasïndi sieti imeri uájpechani, peru Jeoba no nemani erakusïndi. Ísï jimbo, Samueli kurhamarhisïndi: ‘¿Iámindueskiksï i?’.

Jese arhisïndi: ‘Kueratasïndi sánderu sapichu. Karichichani eranguaxati’. Engaksï juákujka Dabidini, Samueli exesïndi eska sési jáxeska. ‘I jindesti’, arhisïndi Jeoba. ‘Atajtsiku aseitini.’ Ka Samueli ísï úsïndi. Tátsekua, Dabidi juramutisïndi Israeli.