Juramukua arhukurisïndi

¿MÍTISKIRI andisï inde achati karukuni jaki indeni xukuparhakuani? Jeoba arhisti eska ísï úpiringa. Inde Aiiaesti, Tata Diosïri profeta. ¿Mítiskiri ambeski profeta ma? Nemaesti enga Tata Diosï eiangujka ambe enga úkuarhiaka.

Ixú, Aiia Jeroboanini jingoni uandontskuarhixati. Jeroboani achati máesti enga Salomonini jingoni ánchikuarhienga. Enga Aiia kúperajka Jeroboanini jingoni ini xanharuni jimbo, úsïndi ma ambe. Pʼíntasïndi xukuparhakua jimbanhini, ka 12 pedasu úsïndi. Ka arhisïndi Jeroboanini: ‘I 10 pedasu para tʼu’. ¿Mítiskiri andisï Jeroboanini íntskujki 10 pedasu?

Aiia arhisïndi Jeroboanini eska Jeoba euantaka juramukua Salomonini. Ka eska Jeroboanini 10 tribu íntskuaka. I ambe arhikuekasïndi eska tsimani tribuechajkuksï pakaraka, para Salomoniri uájpa Reoboami juramukuani.

Enga Salomoni kurhajka ambe enga Aiia arhika Jeroboanini, kánikua ikiasïndi. Jámasïndi uándikuni, peru Jeroboani Ejiptu sïpakuarhisïndi. Tátsekua Salomoni uarhisïndi. Kuarenta uéxurhini juramusti, peru iásï imeri uájpa Reoboami juramutistia. Jini Ejiptu, Jeroboani mítisïndi eska Salomoni uarhiskia ka kʼuanhatsintasïndi Israeli.

Reoboami no sési juramusïndi. Sánderu no sési kaasïndi kʼuiripuechani eska imeri tátemba Salomoni. Jeroboani ka máteru achaticha engaksï kʼéri ambeka iretarhu, nirasïndiksï Reoboamini exeni ka arhisïndiksï eska sési káuaka kʼuiripuechani. Peru ima no ísï úsïndi. Sánderu no sési kaasïndi. Jimboksïsï kʼuiripuecha Jeroboanini erakujti para juramukuani 10 tribuechani, peru Reoboami seguirisïndi juramukuani tsimani tribuechani, Benjaminirini ka Judaerini.

Jeroboani no uékasïndi eska imeri ireta niuaka Jerusaleni, templurhu kómarhini Jeobani. Jimbosï uájti tsimani beserru oruerichani, ka úsïndi eskaksï 10 tribuecha imanksï kómarhiauaka. Sóntku iámu paisi uinindesïndi uarhiperakua ambe ka ikichakueni jásï ambe.

Ístu uandanhiata ambe jarhasïndi máteru tsimani tribuechani jimbo. Enga útasï Reoboami nótki andangutani jarhajka iúmu uéxurhini juramuni, juramuti Ejiptu anapu jurhasïndi uarhiperani Jerusalenini jingoni. Uánikua tesoruechani paasïndi Jeobaeri templurhu uératini. Ísï jimbo, templu nóteru ísï jarhasïndia eska na japka uénakuarhu.