Jorhenguarhikua 5
¿Ambe uá Tatá Diosï ixu Echerirhu?
¿Andisï kuera Tatá Jeobá Echerini? (1, 2)
¿Andisï iásï Echeri nóteru jindé sési jándekua máeni? (3)
¿Ambeksï úkuarhincha kʼuiripu no sési úricha? (4)
¿Nóteru ióndani ambe uá Jesúsi pʼamenchatichani jimbo, tʼarhepikuani jimbo ka uarhirichani jimbo? (5, 6)
¿Cha ambe uétarhisïni úni, para jatsiani indeni kómperatechani engaksï jauaka nóteru ióndani? (7)
1. Tatá Jeobá kuerasti Echerini parakaksï kʼuiripuecha tsípikua jingoni irékapiringa para méntkisï. Ima uékasïremti eska ixu parhakpinirhu méntkisï japiringa kʼuiripu jurhimbiticha engaksï tsípikua jingoni irékapiringa (Salmo 115:16; Isaías 45:18). Echeri no méni kʼamajkunhati; para méntkisï jauati (Salmo 104:5; Eclesiastés 1:4).
2. Enga Tatá Diosï nótki kuerani jápka kʼuiripuni, erakuspti sanitku Echeri ka kánikua sési jántskaspti ka arhinhataraspti «Edéni». Jima iréraspti orheta anapu achatini ka uarhitini engaksï jindepka: Adáni ka Eba. Tatá Diosï uékasïremti eskaksï, kánguarhiapiringa uájpechani ka eskaksï iámindu parhakpinini uinirapiringa. Sánhani arhipirindiksï iámindu Echerini sési jándekua ma úntani (Génesis 1:28; 2:8, 15).
3. Adáni ka Eba kʼamanharhintsti úkuarhisptiksï, jimbokaksï mítiparini no kurhajchaspka Tatá Diosïri juramukuani. Indeni jimbosï, Tatá Jeobá petantapti sési jándekuarhu, ka sési jándekua tsïnchespti (Génesis 3:1-6, 23). Joperu, Tatá Jeobá no mirikurhixati ambe enga uáka íni Echerini jingoni. Ima aiatspesïndi eska sési jándekua ma úntaka parakaksï kʼuiripuecha méntkisï irékaka ¿Néna uá indeni ambe? (Salmo 37:29.)
4. Paraka i Echeri uáka sési jándintani, orheta kʼamajkunhati iámindu no sési úricha (2 Pedru 2:9). Inde ambe Armagedónirhu úkuarhiati, enga jindeka Tatá Diosïri uarhiperakua, para iámindu no sési jásï ambeni kʼamajkuni. Tátsekua, Satanási mili uéxurhini ónhanhati, inde arhikuekasïndi eska nóteru nema no sési úri pakaraka, para no sési jántskantani parhakpinini. Tatá Jeobéri irétajku tsípiti pakarati (Jaŋaskuecha 16:14, 16; 20:1-3).
5. Jimajkani, Jesúkristu auandarhu uératini uénati juramuni parhakpinirhu mili uéxurhini (Jaŋaskuecha 20:6). Sánhani arhiati kénditani kʼamanharhintskuani juchari eratsikuarhu ka juchari kuerpurhu. Jucha nóteru kʼamanharhintskua jukarhakia ísï eska náepka Adáni ka Eba, engaksï nótki kʼamanharhintsti úkuarhiamga. Jiájkani nóteru jauatia pʼamenchakua, tʼarhepikua, kutsïmikua ni uarhikua. Pʼamenchatichaksï tsinakuarhiati, ka tʼarhepiticha ka kutsïmiticha ménderuksï jimbanhi úkuarhintati (Job 33:25; Isaías 33:24; Jaŋaskuecha 21:3, 4).
6. Imani mili uéxurhini enga Jesúsi juramuni jauakia, tsʼïma kʼuiripuecha engaksï no méni jurajkuka Tatá Jeobáni, ánchikuarhiatiksï para iámindu Echerini sési jándekua ma úntani (Mateu 5:5). Ístu, milloni jimboksï uarhiricha tsíntati ka ménderuksï iréntati Echerirhu (Ukuecha 24:15). Engaksï úska ambe enga Tatá Diosï kurhakuauaka, irékatiksï para méntkisï Echerirhu. Joperu engaksï no kurhandiaka, kʼamajkunhatiksï para méntkisï (Juanu 5:28, 29; Jaŋaskuecha 20:11-15).
7. Ísï úkuarhiati íni Echerini jingoni eska Tatá Diosï ná eratsikata jatsipka uénakuarhu. ¿Cha uékapirini jatsiani indeni kómperatechani engaksï nóteru ióni jimbo jauaka? Jimajkani, jatsiskajtsï para chúngumani jarhani jorhenguarhini Tatá Jeobéri ambe ka kurhajchani jarhani imeri juramukuechani. Ma ambe engaksïni jarhoataka úni indeni ambe, jindesti nirani tánguarhikuecharhu imani Kʼumanchikuani jimbo engaksï Jeobéri eianhpiricha tánguarhijka (Isaías 11:9; Ebreu 10:24, 25).
[Ilustrasioni pájina 10 anapu]
Sési jándekua enga tsínchika
[Ilustrasioni pájina 11 anapu]
Enga Armagedóni nitamakia, Echeri sési jándekua ma úkuarhintati