Jorhenguarhikua 7
Néna andarhierani Tatá Diosïni kómarhikua jimbo
¿Andisï uétarhijki méntkisï kómarhikuarheni Tatá Diosïni? (1)
¿Jucha néni kómarhikuarhia, ka néna? (2, 3)
¿Ambe sési jaki kurhajkuarhini kómarhikuarhu? (4)
¿Cha ná jatini uá kómarhikuarheni Tatá Diosïni? (5, 6)
¿Kurhauajki Tatá Diosï iámindu kómarhikuechani? (7)
1. Kómarhikua jindesti kaxumbikua jingoni uandontskuarhikuni Tatá Diosïni. Uétarhisïndi méntkisï kómarhikuarheni Tatá Diosïni. Enga jucha ísï uáka, jucha pʼikuarheraka eska jucha sánderu no iauani jarhaska imani jingoni, ísï eska ma pʼíchpirini jingoni enga jucha kánikua uékajka. Najkiruka Tatá Jeobá sánderu kʼéri ambeka ka uinhapitini, kurhauasïndi juchari kómarhikuechani ¿Cha kómarhikuarhesïni méntkisï Tatá Diosïni? (Salmo 65:2; 1 Tesalonika 5:17.)
2. Kómarhikuani jimbojtu jucha kʼéri ambe arhisïnga Tatá Diosïni. Ísï jimbo jucha jatsiska para Tatá Jeobántku kómarhikuarhini. Enga Jesúsi parhakpinirhu jápka, méntkisï imeri Táti jémbani kómarhikuarhesïremti, no máteru nemani. Juchajtu májkueni jatsiska para úni (Mateu 4:10; 6:9). Joperu jucha méntkisï Jesúsiri arhinhakuani jimbo kómarhikuarhiaka. Ísï jucha xarhatasïnga eska jucha Jesúsini janhanharhisïnga ka jakajkuni eska ima uarhiska parajtsïni euajpintani (Juanu 14:6; 1 Juanu 2:1, 2).
3. Jucha jatsiska para mintsita jingoni uandajpakuarheni Tatá Diosïni. Jucha no jatsiska para arhiantani níjtu jorhenguarhiani kómarhikuechani, para imani ambejku kurhajkuarhini jarhani (Mateu 6:7, 8). Jucha uáka kómarhikuarheni néna uéjki, joperu janhanarhikua jingoni, ístu ná uéjki jatini, ka nani uéjki ísï. Tatá Diosï imani kómarhikuechani jamberi kurhauasïndi enga jucha sïpatikuarku újka juchari mintsitarhu (1 Samuel 1:12, 13). Enga jucha uékaka jandiajku kómarhikuarheni, jucha jima uáka enga pínandiaka (Markusʌ 1:35).
4. ¿Ambe sési jaki para cha kurhajkuarhini? Iámindu ambe engaksïni jarhoataka para sési pájperani Tatá Diosïni jingoni (Filipusʌ 4:6, 7). Kómarhikua enga Jesúsi jorhentpipka, uandasïndi eska jucha, kurhajkuarhiaka Tatá Jeobéri arhinhakueri ambe ka imani ambe jimbo enga ima uéjka úni. Jucha uáka kurhakuni ambe enga jucha uétarhinchaka, ístu eskajtsïni kʼamanharhintskuechani puáchiantauaka ka eskajtsïni jarhoataka pʼíngukuarhini no sési úkuechani jimbo (Mateu 6:9-13). Juchari kómarhikuecha nóksï jindeuati para juchari ambejku kurhajkuarhini. Jucha imantku ambe kurhajkuarhiaka, enga terokuntaka Tatá Diosïri eratsikuani jingoni (1 Juanu 5:14).
5. Cha uáka kómarhikuarhini, méntkisï enga cha pʼikuarhinhiaka diosmeiamukua arhini Tatá Diosïni o parajtsï kʼéri ambe arhini (1 Crónicas 29:10-13). Ásï jurajku je kómarhini enga cha uandanhiata ambe jatsiaka o enga chári jakajkukua tsʼéjkunhani jauaka (Salmo 55:22; 120:1). Ístu sési jarhasti eska cha kómarhikuarhiaka Tatá Diosïni engajtsï tʼireni jámakia (Mateu 14:19). Jeobájtsïni pʼímarisïndi para méntkisï kómarhikuarhini (Efesu 6:18).
6. Enga jucha kʼéri kʼamanharhintskua ma uáka, jucha jatsiska para Tatá Jeobáni kómarhikuarhini ka kurhakuni eskajtsïni xarhatachiaka pʼamojperakua ka eskajtsïni puáchintaka. Enga jucha aianguaka juchari kʼamanharhintskuechani ka jánguarhintani para no ménderu uéntani úni imani ambe, Tatá Diosï jingontku jauati parajtsïni puáchintani (Salmo 86:5; Proverbios 28:13).
7. Tatá Jeobá imantku kómarhikuechani kurhauasïndi engaksï jurhimbiti kʼuiripuecha újka. Paraka Tatá Diosï kurhauaka chári kómarhikuechani, cha jatsiska para jánguarhintani ísï irékani eskaksï ná uandajka Imeri juramukuecha (Proverbios 15:29; 28:9). Cha jatsiska para kaxumbikua jingoni kómarhikuarheni (Lukasʌ 18:9-14). Chári jángua jatsisti para xarhatani ambe enga cha kurhajkuarhijka. Ísïjtsï xarhatani jauaka eska cha jakajkusïnga ka eskajtsï mintsita jingoni kómarhikuarhisïnga. Jiájkani kʼóruksïni Tatá Diosï mókuchintati chári kómarhikuechani (Ebreu 11:6).