Néna exentani jurhimbiti religiónini

Enga jucha uéjka Tatá Diosïri pʼíchpirini, jucha jatsiska para imani religiónini jimbo jarhani enga ima jaiapanhintajka. Jesúsi uandaspti eska «tsʼïma engaksï sesi jimbo kómarhijka» kómarhipirindiksï Tatá Diosïni eska na terhokuntajka jurhimbikua jingoni (Juanu 4:23, 24). Maechakuajku religióni jarhasti enga Tatá Diosï jaiápanhintajka (Efesu 4:4-6). Religióni enga jurhimbitika, pájpesïndi tsípekuarhu para méntkisï, ka religióni enga no jurhimbitika uarhikuarhu pájpesïndi (Mateu 7:13, 14).

Jucha uáka mítentani naki religióni jurhimbitiski, exeaparini kʼuiripuechani engaksï jima jámajka. Jimboka Tatá Jeobá ambakitiska, imeri sesi jimbo kómarhirhichajtuksï jatsisti para ambakitini. Májkueni eska ma ambakiti anhatapu naraxeri, enga íntspejka ambarhati naraxechani, istu religióni enga jurhimbitika ínspesïndi ambakiti kʼuiripuechani (Mateu 7:15-20).

Tatá Jeobéri pʼíchpirichaksï kánikua janhanharhisïndi Bibliani. Mítestiksï eska Biblia, Tatá Diosïni jimbo jurhasïnga. Isï jimbo jurajkusïndiksï eska Biblia jurhimberauaka imecheri tsípekuani, sesi péntani imecheri uandanhiatechani ka paraksï uni sánderu sesi mítini Tatá Diosïni (2 Timoteo 3:16). Istu, jánguarhentasïndiksï uni ambe engaksï aianhpejka.

Tatá Jeobéri pʼíchpirichaksï uékperasïndi máteru ka máteruni jingoni. Jesúsi xarhataspti eska uekasïremga kʼuiripuechani, jorhendapariani Tatá Diosïri ambe ka ambakerantapariani pʼamenchatichani. Engaksï jurhimbiti religiónirhu jámajka, imajtuksï xarhatasïndi eskaksï uékaasïnga máteru kʼuiripuechani. Isï eska Jesúsi, jukaparharasïndiksï no jatsikuarhirichani ka imechani engaksï tamu isï anapueka. Jesúsi uandaspti eska kʼuiripuecha úpiringa mítiantani imeri chúxapatichani, uékperakuani jimbo engaksï jatsipiringa máteru ka máteruni jingoni (Juanu 13:35).

Tatá Diosïri pʼíchpirichaksï kʼéri ambe arhisïndi Tatá Jeobéri arhinhakuani. Enga nema no uékapiringa úrani juchari arhinhakuani, ¿jindepirini juchari ambakiti pʼíchpirini? Nombe. Enga jucha jatsijka ma pʼíchpirini, jucha imeri arhinhakuani jimbo uandajpasïnga, ka jucha sesi jasï ambe uandasïnga imeri ambe, máterhuechani jingoni. Isï jimbo, ne engaksï uékajka jindéni Tatá Diosïri pʼíchpiricheni, jatsistiksï para úrani Imeri arhinhakuani ka uandantani imeri ambe, máterhuechani jingoni. Tatá Jeobá uékasïndi eska jucha isï uáka (Mateu 6:9; Roma 10:13, 14).

Isï eska Jesúsi, Tatá Diosïri pʼíchpirichajtuksï jorhendasïndi máterhuechani Tatá Diosïri Juramukueri ambe. Tatá Diosïri Juramukua auándarhu anapu juramukua maesti, enga uáka eska ari echeri sesi jándintaka. Tatá Diosïri pʼíchpiricha mítetarasïndiksï máteru kʼuiripuechani ini ambakiti eianhperakua Tatá Diosïri Juramukuerini (Mateu 24:14).

Engaksï Jeobéri ambe uandantajka jánguarhentasïndiksï para jindéni Tatá Diosïri pʼíchpirini. Janhanharhisïndiksï Bibliani ka uékperasïndiksï máteru ka máteruni jingoni. Istuksï úrasïndi ka kʼéri ambe arhini Tatá Diosïri arhinhakuani ka jorhendaasïndiksï máteru kʼuiripuechani Tatá Diosïri Juramukueri ambe. Iásï, ixu parhakpinirhu imecha engaksï Jeobéri ambe uandantajka, jindestiksï ima religiónini enga jurhimbitika.