¿Né jindeski arkanjili Migueli?

BIBLIA uandasïndi eska ma ánjili, Migueli arhinhasïnga. Peru i textuecharhu, Migueli méntkisï ambe ma úni jarhasïndi. Danieliri librurhu, uarhiperani jarhasïndi demoniuechani jingoni; Judasïri karakatani jimbo, Migueli arhijperasïndi Noambakitini jingoni, ka Jaŋaskuecheri libru jimbo (o Apocalipsis), uarhiperani jarhasïndi Satanasi ka imeri demoniuechani jingoni. Jo ísïsti, Migueli méntkisï úni jarhasïndi ambe ma para xarhatakuani Jeobaeri ikiatspitichani eska Jeobajkusï uáka Juramutiini. Ka jimbosï sési pakarakujti arhinhakua Migueli jimboka i arhinhakua arhikuekasïnga “¿Né Ísïski Eska Tata Diosï?”. Peru, ¿néski Migueli?

Orheta ju je miántani eskaksï máru kʼuiripuecha jukari ma arhinhakua jukasïnga. Miánta je eska Jakobu, enga kʼéri familiani ma jatsipka, ístu mítinhaspti komueska Israeli, ka apostuli Pedru, komueska Simoni (Génesis 49:1, 2; Mateu 10:2). Májkueni, Biblia xarhatasïndi eska Migueli, máteru tata Jesukristueri arhinhakueska ante de Echerirhu jurhani ka ístu tátsekua enga na kʼuanhatsentapka auandarhu. Ju je exeni ambe enga jaka Bibliarhu, engachi jimbo ísï eratsijka.

Arkanjili. Biblia arhisïndi Miguelini eska “arkanjiliska” (Judas 9, TNM). I uandakua arhikuekasïndi “sánderu kʼéri ánjili”. Exesïngachi eska Biblia arhisïnga Miguelini arkanjili, i ambe arhikuekasïndi eska májku i jásï ánjili jarhaska. Méntkisï enga Biblia i ánjiliri ambe uandajka, úrasïndi uandakua “arkanjili” máechakuajku ka no méni arkanjilicha. Ístu, Biblia mémindu uandasïndi Jesusiri ambe, úraparini imani ánchikuarhitani enga arkanjili újka. Ísï xarharasïndi ixú 1 Tesalonicenses 4:16, TNM, enga uandajka ambe enga tata Jesukristu uáka sánderu orhepatini, uandasïndi: “Jimboka Tata kétsintaaka auandarhu uératini, ka ioarhiantauati imerichani ísï mintsiraparini eska arkanjili”. I textu uandasïndi eska Jesusi ísï uandaaka eska arkanjili, xarhatasïndi jiájkani eska Jesusi arkanjili Migueliska.

Komandanti. Biblia uandasïndi “Migueli ka imeri ánjilicha uarhiperaxaptiksï dragonini jingoni, [...] ka imeri ánjilicha” jingoni (Jaŋaskuecha 12:7). Ixú xarharasïndi eska Migueli Komandantiska ánjilicheri engaksï marhuakujka Jeobani. Jaŋaskuecheri libru ístu xarhatasïndi eska Jesusi jindeska Komandanti ima ánjilicheri engaksï marhuakujka Jeobani (Jaŋaskuecha 19:14-16). Ka apostuli Pablu uandaspti ‘Tata Jesukristueri’ ka ‘imeri ánjilicheri [...] engaksï uinhapitika’ (2 Tesalonika 1:7). Jiájkani, Biblia uandasïndi Migueliri ka “imeri ánjilich[eri]” ka Jesusiri ka “imeri ánjilich[eri]” (Mateu 13:41; 16:27; 24:31; 1 Pedru 3:22). Biblia no nani uandasïndi eskaksï tsimani grupu ánjilicheri jarhaska, ma enga Migueli orhejtsïkuajka ka máteru enga Jesusi orhejtsïkuajka. Ísï jimbo, úsïngachi kurhanguni eska Migueli, jindeska tata Jesukristu jini auandarhu.a