Pirekuecha engajtsïni jorhendajka ka engajtsïni sési pʼikuastajka

SÁNDERU kʼéri libru enga Bibliarhu jaka, uánikua pímbinharhati pirekuechani jatasti ka sáno mili uéxurhini jimbo únhastiksï. Ima engaksï uántaka ini pirekuechani, kánikua sésiksï xarhataspti na enga xáni kʼéripka imecheri jakajkukua. Ístu, xarhatasptiksï mámaru jásï pʼikuarherakuechani ini pirekuechani jimbo engaksï kʼéri ambe arhijka Tata Diosïni, komueska tsípikua, kómu pʼikuarherakua, jeiapanhintskua ka na enga pʼikuarherajka enga ma moantajka, ka na enga pʼikuarherajka enga ma uandanhiata jatsiaka. Iámindu i achaticha uékasïrendiksï Tata Diosïni ka no iauani pʼikuarherasïrendiksï jarhani imani jingoni. Ju je exeni ambe uandasïni Salmusiri libru.

Jeoba, enga Juramutika iámindu amberi, imanichisï jatsika para kómarhini ka kʼéri ambe arhini. Salmo 83:18 uandasïndi: “Tʼu, engari arhinhajka Jeoba, tʼujkuri jindeska enga Sánderu Kʼéri ambeka iámindu parhakpinirhu”. Uánikua salmuecha, Jeobanksï kʼéri ambe arhisïndi, jimboka kueraska auandechani, jóskuechani, tsípikua parhakpinirhu ka kʼuiripuecheri kuerpuni enga xáni sési úkata jaka (Salmos 8, 19, 139 ka 148). Máru salmuecha kʼéri ambe arhisïndiksï Jeobani jimboka kuájchakuasïnga ka kuájpiantasïnga imechani engaksï no méni jurajkujka (Salmos 18, 97 ka 138). Ka máteru salmuecha pirekusïndiksï jimboka jurhimbitiska, ka jarhuauasïnga sési úrichani engaksï no sési kánhajka ka kastigariani no sési úrichani (Salmos 11, 68 ka 146).

Jeoba jarhuauasïndi ka sési pʼikuastasïndi imechani engaksï uékajka imani. Úpiringachi uandani eska salmu, enga sánderu mítikuarhika jindesti Salmo 23, ini salmuni jimbo, Dabidi terokutantasïndi juchari Táti Jeobani, karichi eranguti uékpiti ma jingoni enga xanhatatajka, enga kuájchakuajka ka enga kuidariajka imeri karichichani. Salmo 65:2 míatantasïndijtsïni eska Jeoba jindeska enga “kurhauajka kómarhikuechani”. Imecha jamberi engaksï no sési jásï ambe úka, sési pʼikuarherakua exentasïndiksï Salmuecharhu 39 ka 51 jimbo. Indeni salmuecharhu Dabidi xarhatasïndi na enga xáni no sési pʼikuarherajka imani no sési jarhati úkuechani jimbo enga uápka, ka na enga mintsikani jaka eska Tata Diosï puákuntaka. Ka Salmo 55:22 jarhuatasïndijtsïni para mintsikani Jeobani ka jurajkuni eskajtsïni ima jarhuataka uandanhiatechani jingoni.

Jeoba jimbanhi parhakpini ma juaati Mesiasiri Juramukuani jimbo. Salmusirhu, uánikua ambe uandasïndi Mesiasiri ambe, Juramuti enga Jeoba eiatspipka. Salmo 2 jimbo uandasïndi eska i Juramuti kʼamajkuaka náki uéjki nasionini enga no uékaka eska i juramuaka. Salmo 72 uandasïndi eska i juramuti uáka eska jauaka kánikua tʼirekua, ka eska nóteru jauaka no sési kánhakua ka iámindu ambe enga no sési pʼikuastajka kʼuiripuechani. Ka Salmo 46:9 uandasïndi eska Mesiasiri Juramukuani jimbo, Tata Diosï kénditauati uarhiperakuechani ka xerendurhiantauati iámindu ambe enga úrakuarhijka para uarhiperani. Ístu, Salmo 37 uandasïndi eska jimbanhi parhakpinirhu nóteru jauakia kʼuiripu no sési úricha, ka kʼuiripu sési úricha irekatiksï márku ka pínandikua jingoni para méntkisï.

(Pʼitakata jarhasti Salmos jimbo.)