Reinueri aianhpirichaksï nirasïndi tribunalicharhu

1, 2. a) ¿Ambeksï úspi relijioniiri orhejtsïkutiicha paraksï nóteru jurajkuania apostoliichani aianhpini? b) ¿Andiksïsï apostoliicha no uékapi jurajkuni aianhpini?

APENASI úkuarhispti kʼuínchikua Pentekostesiiri uéxurhini 33 jimbo, ka Jerusaléni anapu kúnguarhikua ueenaxapti úkuarhini. Satanasi exesïndi eska i jindeeska tiempu para no sési úkuni kúnguarhikuani. Ima uékasïndi kʼamajkuni kúnguarhikuani ante deksï sánderu uániini. Satanasi sóntku úsïndi ambe ma parakaksï relijioniri orhejtsïkutiicha nóteruksï jurajpiakia aianhpini. Peruksï no sáni chéparini apostoliichaksï seguirisïndi aianhpini, ka uánikua acheetiicha ka uarhiitichaksï niárasïndi ʻjakajkuni juchaari Tataniʼ (Uku. 4:​18, 33; 5:14).

² Apostoliicheeri enemiguechaksï kánikua ikiaparini, ónhaasïndiksï paraksï no sési úkuani. Peru ima chúrikua Tata Diosïiri ánjeli ma, mítaasïndi kárselirhu anapu puertechani. Ka enga na erandijkia, apostoliichaksï ménderu aianhpini jámani jarhasïndia. Ofisialiichaksï ménderu jupiasïndi apostoliichani ka paasïndiksï juramutichani japarini. Ka juramutichaksï arhiasïndiksï eskaksï no kurhajchaxaka juramukuani enga arhijka eskaksï no jatsiska para aianhpini. Peru apostoliichaksï no sáni chéparini uandasïndi: “Uétarhisïndi eska jucha sánderu janhanharhiaka Diosïni ka eska kʼuiripuechani”. Jimbokaksï juramutiicha kánikua ikiasïnga, uékasïndiksï kʼamajkuani apostoliichani. Peru enga inde ambe úkuarhini japka, Gamalieli Leiiri jorhentpiri ma, arhiasïndi eskaksï jingontku jámaaka ka ístu arhiasïndi: “Jurajkua je ini acheetiichani, ka ásteru ma ambe arhia je”. Nájkiruka no jakajkukuarhijka, ima juramutiichaksï kurhajchaspti ka jurajkuasptiksï apostoliichani. ¿Ambeksï úsïni tátsekua apostoliicha? No sáni chéparinksï pauani pauani uandajtsïkpisïndi ka jorhentpini tata Jesukristueri ambe (Uku. 5:​17-21, 27-42; Prov. 21:​1, 30).

3, 4. a) ¿Ambe xáni úskia Satanasi desde iónisï para no sési kámani Tata Diosïiri iretani? b) ¿Ambechi exea ini jorhenguarhikua jimbo ka máteruni jimbo?

³ Uéxurhini 33 jimbo, primeru juisiu úkuarhispti paraksï kristianuecha nóteru jurajkunhania aianhpini, peru no indejkuepirindi (Uku. 4:​5-8; 16:20; 17:​6, 7). Ini jurhiatikuecha jimbojtu Satanasi seguirixati úraani juchaari ikiatspitichani paraka jauaka juramukua ma engajtsïni nóteru jurajkuakia aianhpini. Ka parajtsïni pʼínguni uandasïndiksï eskachi úsïnga eskaksï problemecha jauaka. Ístuksï uandasïndi eskachi no kurhajchaasïnga juramutiichani ka eskachi íntspikuarhini jámasïnga. Joperu jiáni enga sánderu sési jarhajka, nirasïngachi tribunalicharhu parachi xarhatani eska inde ambe no ísïiska. ¿Nénajtsïni jarhuataski engachi indeni ambe úka? ¿Nénaksïni marhuachesïni chánksïni ambe engaksï iónksï uandapka tribunaliicha? Exeakachi máru ejempluechani parachi exeni na engaksï tribunaliicha úka ambe ma para kuájpini ka sésikua íntspini parachi úni aianhpini ambakiti aianhperakuani (Filip. 1:⁠7).

⁴ Ini kapitulu jimbochi exeni jauaka ambe engachi xáni úkia parachi jurajkunhani aianhpini ka máteru tsimani jorhenguarhikua jimbochi exeni jauaka ambe engachi xáni úkia tribunalicharhu parachi no úni imani ambe enga no sési jaka ka parachi úni ambe engaksï uandajka Tata Diosïiri Reinueri juramukuecha.

¿úsïnksï eskaksï problemecha jauaka oksï kuájpisïni Tata Diosïiri Reinuni?

5. Uéxurhini 1935 jimbo ísï, ¿andiksïsï jupikaueni aianhpirichani, ka ambeksï eratsespi úni erachicha engaksï órhejtsïkuenga kúnguarhikuani?

⁵ Uéxurhini 1935 jimbo ísï, iámu Estados Unidos, munisipiurhu anapu juramutiicha ka ístu estadurhu anapuecha, uékasïreendiksï eskaksï Jeobaeri testiguecha permisu ma petapiringa paraksï úni aianhpini. Peruksï erachicha no uékaspti petani permisuni, jimboka permisu ma niárasïnga kʼamakurhini. Ístuksï seguru jarhaspti eska no ma gobiernu sésikua jatsiska para kénditani juramukuani enga Jesúsi íntsaaka kristianuechani paraksï aianhpini ambakiti ambe (Mar. 13:10). Ini ambe jimbo, uánikua Reinueri aianhpirichaksï jupinhaspti. Ísï jimbo, erachicha engaksï orhejtsïkuenga kúnguarhikuani, eratsesptiksï nipiringa tribunalicharhu. Ísïksï úspti paraksï xarharani eska Estadu no ísï úxapka eska konstitusioni na uandajka eskaksï Testiguecha derechu jatsiska paraksï aianhpini jámani. Ísï jimbo, 1938 jimbo, úkuarhispti ambe ma enga úpka eska juisiu ma úkuarhipiringa. ¿Ambe úkuarhispi?

6, 7. ¿Ambe nitamakuarhispi familia Cantwell?

⁶ Martesï tsípa 26 de abrili 1938 jimbo, Newton Cantwell, enga 60 jatiripka, imeeri témba Esther, ka imeecheri uájpeecha Henry, Russell ka Jesse engaksï prekursori espesialiichepka, uérasptiksï paraksï chúskuni aianhpini kʼéri iretarhu New Haven (Connecticut). Peruksï prepararikuarhispti paraksï uérakua jámani máru jurhiatikuecha. ¿Andi? Uánikua xanhariksï jupinhaspti, ísï jimboksïsï mítepti eskaksï úpiringa ménderu jupinhani. Nájkiruka ísïipka, imeechaksï uékasïreendi seguirini aianhpini Reinueri ambe. Nirasptiksï New Haven tsimani karruechani jingoni. Erachi Newton familieri karrurhu paaspti publikasionichani, tokadiskueni járhatiichani ka Henry enga 22 jatiriipka, máteru karrurhu páxapti ekipu de soniduni. Ka eskaksï na erokuarhini japka, polisia no ióndaspti niárani ka anhaxustaaspti.

⁷ Orhetaksï Russellini jupikaspti enga 18 jatiripka ka tátsekua Newtonini ka Estherini. Jesse enga 16 uéxurhini jatiripka, iauani uératini exespti na enga polisia paani jaka imeeri taatichani ka imeeri ermanu jémbani. Jimboka Henry máteru naniisï aianhpixapka iretarhu, Jesse jandiajku pakaraspti. Nájkiruka ísï úkuarhipka, ima pʼíkuspti tokadiskueni jásïni ka seguirispti aianhpini. Tsinani acheetiicha engaksï katolikuepka, jurajkusptiksï eska jatsikuntapiringa erachi Rutherfordiri arhijtsïkperatani enga arhinheenga “Ikiatspitiicha”, peru engaksï kurhaapka kánikuaksï ikiaspti engaksï jamberi uékeenga atani Jesseni. Peru no sáni chéparini, Jesse níntaspti, ka ma ratu jimbojku, polisia ma jupikaspti ka imajtuksï ónhaspti. Polisia jurajkuspti pirenchi Estherini, peru imeeri uámbani ka uájpeechani nómbe. Peru imani mismu jurhiatikua jimbo iáminduechaksï uéraspti jimbokaksï maianhpespka.

8. ¿Andisï tribunali arhipi Jesseni Cantwell eska problema ambe jámasïreenga jirinhani?

⁸ Máru mesicha ísï tátsekua, familia Cantwell pánhaspti New Haven anapu tribunalirhu. Newtonini, Russellini ka Jessenksï arhiaspti eskaksï no sési úriispka jimbokaksï donasioni kurhajkuarhixapka no ma permisu jingoni. Ka nájkirukaksï nípka Tribunal Supremo Connecticut anapu jingoni, Jesse arhinhaspti eska no sési úri máespka jimboka problemechani jirinhaasïreenga. ¿Andiksïsï ísï arhipi? Jimbokaksï ima tsimani acheetiicha engaksï katolikuepka ka engaksï kurhaapka grabasionini, arhisptiksï tribunalini eskaksï ikiaspka jimboka ima arhijtsïkperata no sési ambe uandasïreenga imeecheri relijioniiri ambe. Erachicha engaksï exeni japka ini ambe nirasptiksï Tribunal Supremo Estados Unidos anapu jingoni enga jindeeka sánderu kʼéri tribunali enga leicheri ambe exejka indeni paisi jimbo.

9, 10. a) ¿Ambe úspi Tribunal Supremo Estados Unidos anapu familia Cantwelliiri kasu jingoni? b) ¿Nénajtsïni seguirixaki marhuacheni ambe enga erakupka úni Tribunali?

⁹ Jurhiatikua 29 de marsuni ueenani uéxurhini 1940 jimbo, Charles Evans Hughes enga Tribunali Supremueri presidentipka ka máteru ochu majistraduecha engaksï jima japka, kurhaxaptiksï pruebechani enga erachi Hayden Covington uandaani japka enga Jeobaeri testiguecheri abogaduepka.a Enga Connecticut anapu fiskali, uékani japka exeraani pruebechani juesichani para xarhatani eskaksï Testiguecha promeblechani jámasïnga jirinhaani máteruechani jingoni, juesi ma kurhamarhispti: “¿No ísïiski eskaksï kʼuiripuecha no tsitisïreenga ambe enga Kristu Jesúsi jámeenga aianhpini?”. Enga indeni ambe arhipka, fiskali arhispti: “Ísïisti, ka ístuni miásïnga eska Biblia arhisïnga ambe enga úkuarhinchapka Jesúsi enga Reinueri ambe jámeenga aianhpini”. ¡Inde ambe enga uandapka meru ísïispti! No jamberi kuenta íntskukuarheparini terukutantaaspti Testiguechani, Jesúsini jingoni ka Estaduni, imeechani jingoni eskaksï no sési kámapka Jesúsini. Ka 20 de maiuni 1940 jimbo, iámindu Tribunalirhu anapu juesicha, úsptiksï eskaksï Jeobaeri testiguecha andapiringa juisiuni.

¹⁰ ¿Néna marhuaspi inde ambe enga Tribunali úpka? Úspti eska no ma gobiernu, federali, estatali o iretarhu anapu, pʼínguapiringa kʼuiripuechani paraksï relijioni ma jatsini. Ístu Tribunali exespti eska Jesse “no problema ambe jámasïreenga jirinhani” ka eska no no sési ambe úkuasïreenga máteruechani. Ísï jimbo, Tribunali uandaspti eskaksï Jeobaeri testiguecha no jámasïnga problema ambe jirinhani máteruechani jingoni. Kánikua jukaparhakua ambeespti eskaksï Tata Diosïiri marhuaricha andapka ini jusiuni. ¿Seguirixakijtsïni marhuacheni i ambe? Jeobaeri testigu ma enga abogadueka uandaspti: “Engachi sésikua intsïnhaka parachi úni ambe engachi juchaari relijionirhu jorhenguarhijka, úsïndi eskachi ambakiti aianhperakua pákuauaka kʼuiripuechani jima engachi jucha irekaka ka no chéparini eskachi no sési kánhaaka”.

¿Nóksï kurhajchaasïni juramutiichani oksï jurhimbiti ambe uandantasïni?

11. ¿Ambeksï etsakuspi Canadá anapu erachicha, ka andi?

¹¹ Uéxurhini 1940 a 1950 Canadá anapu Jeobaeri testiguechaksï kánikua no sési kánhaspti. Ísï jimbo, parakaksï kʼuiripuecha mítepiringa eska Estadu no jurajkuasïreenga kʼuiripuechani paraksï relijioni ma jatsiani, uéxurhini 1946 jimbo, Canadá anapu erachichaksï 16 jurhiatikuaksï jámaspti trataduni etsakuni Quebec’s Burning Hate for God and Christ and ­Freedom Is the Shame of All Canada (Na engaksï xáni kurhunhijka Quebec anapuecha Tata Diosïni, Kristuni ka engaksï no jurajpijka paraka ma libriuaka, kʼuratsekua máesti para iámindu Canadá). I tratadu enga kuatru pájineeripka, sési uandantasïreendi ambe engaksï saserdoticha ueenga parakaksï erachicha no sési kánhapiringa, na engaksï polisiecha no sési kaapka ka na enga tánguarhienga kʼuiripu para no sési úkuani Quebec anapu erachichani. Tratadu uandasïreendi: “Seguirixatiksï ónhaani Jeobaeri testiguechani nájkirukaksï no no sési ambe újka. Útasïksï ma 800 sïrandeecha jarhasti engaksï uandajka eskaksï Jeobaeri testiguecha no sési úxaka jini Gran Montreal”.

12. a) Engaksï erachicha trataduni etsakupka, ¿ambeksï úspi imeecha engaksï ikiakuauenga? b) ¿Ambeksï arhiasïreeni erachichani eskaksï no sési úxapka? (Ístu exe je notani).

¹² Primeru ministru Quebec anapu Maurice Duplessis, kardenali katoliku Villeneuveeri jarhuajperata jingoni, uandaspti eska guerra ma úpiringa ka eska no sáni pʼamojperakua jingoni kaapiringa Jeobaeri testiguechani. Sïrandeecha engaksï uandeenga eskaksï jupinhapiringa Jeobaeri testiguecha, sóntkuksï uániispti de 800 a 1,600. Pirenchi ma enga prekursoreepka, uandasïndi: “Niárasptijtsïni xáni uánikua xanhari jupikani engachi jamberi nóteruni miájkia namuni xanharispi”. Testiguechani engaksï exeauenga trataduni etsakuni jarhani, arhiasïreendiksï eskaksï delitu ma úxapka enga arhinhajka “libelo sedicioso”, enga arhikuekajka chkuanderakuechani uandaani engaksï újka eskaksï kʼuiripuecha nóteru kurhandiakia.b

13. ¿Neechaksï jindeespi primeru erachicha engaksï arhinhapka eskaksï uékasïreenga no sési úkuni gobiernuni, ka ambe erakuspi úni tribunali?

¹³ Uéxurhini 1947 jimbo erachi Aimé Boucher ka imeeri uájpeecha Gisèle enga 18 jatiripka ka Lucille enga 11 jatiripka, jindeesptiksï primeru erachicha engaksï arhinhapka eskaksï uékasïreenga no sési úkuni gobiernuni. Íksï erachicha imeechoksï no iauani jámaxapti trataduechani etsakuni, peru no nema úpirindi uandani eskaksï ícha no sési ambe úni jámaxapka. Erachi Aimé Boucher, acheeti máespti enga iáminduecha jingoni sési pájpereenga ka imeeri granjani kuidarisïreendi enga juáta sapichuecharhisï japka Quebec suri jimbo ísï, ka ménichani erachi siudadirhu nirasïreendi imeeri karruaji sapichu ma jingoni. Joperu i familia imani ambe nitamakuarhispti ambe enga tratadu uandeenga. Tribunalirhu anapu juesi enga orheta exepka erachicheeri kasuni ka enga kánikua ikiakuauenga Testiguechani no uékasti jiókuarhiani pruebechani engaksï xarhateenga eskaksï erachicha Boucher no ma ambe no sési úspka. Peru kʼóru jiókuarhispti ambe enga fiskali uandapka, eska tratadu úsïreenga eskaksï kʼuiripuecha kurhunhperapiringa ka eska indeni ambe jimbo erachicha Boucher kulpabli arhinhapiringa. Ambe enga arhikuekani japka juesi, jindeespti eska jurhimbitku ambe uandantani no sési jarhaska. Erachi Aimé ka Gisèle, ónhanhasptiksï jimbokaksï arhinhaspka eskaksï úxapka ambe ma paraksï kʼuiripuecha nóteru kurhajchania gobiernuni ka asta nanaka sapichu Lucille tsimani jurhiatikuaksï ónhaspti. Erachichaksï uandaspti eskaksï nipiringa Tribunal Supremo Canadá anapu jingoni, enga jindeeka sánderu kʼéri Tribunali enga leicheri ambe exejka indeni paisi jimbo ka í uékaspti jarhuataani.

14. ¿Ambeksï úspi Quebec anapu erachicha jiáni engaksï no sési kánhani japka?

¹⁴ Nájkirukaksï juchaari erachichani Quebec anapuechani xáni no sési ka méminduksï no sési kánhapka, seguirisptiksï aianhpini Reinueri ambe ka someni sési nikuasïreendi. Uéxurhini 1946 jimbo, ueenaspti etsakuarhini tratadu ka támu uéxurhini tátsekua sánderuksï uánikua testiguecha jarhasptia jini Quebec. Orhetaksï 300 erachichespti ka tátsekuaksï 1,000 erachicha jarhasptia.c

15, 16. a) ¿Ambe úspi Tribunal Supremo Canadá anapu erachicheeri Boucher kasu jingoni? b) ¿Néna jarhuataaspi i ambe erachichani ka máteru kʼuiripuechani?

¹⁵ Juniuni 1950 jimbo, nuebe juesicha engaksï Tribunal Supremo Canadá anapurhu japka, exesptiksï erachi Aimé Boucheriri kasuni. Ka seisi mesi tátsekua, 18 de disiembri 1950 jimbo, inde Tribunali úspti eskachi andapiringa indeni kasuni. ¿Andi? Erachi Glen How, enga Jeobaeri testiguecheri abogaduepka, uandaspti eska Tribunali májkueni uandaspka eska imeecha engaksï kuájpiani japka erachichani, eskaksï Testiguecha no ma ambe úsïnga para no sési úkuni gobiernuni o paraksï kʼuiripuecha nóteru kurhajchani. Tratadu no indeni ambe uandasïreendi ka engaksï seguiripiringa trataduni etsakuni, nóksï no sési ambe úni japirindi. Erachi ístu uandaspti: “Úska exeni néna engajtsïni Tata Diosï Jeoba jarhuataka parachi úni ini kasuni andani”.d

¹⁶ Ambe enga Tribunal Supremo uandapka xarhataspti eska Tata Diosïiri Reinu andaspka ka nóteruksï úkuarhispti máteru 122 juisiucha engaksï jatsiapka Jeobaeri testiguechani jingoni, jimbokaksï no jarhaspka pruebeecha engaksï xarhatapiringa eskaksï Jeobaeri testiguecha no sési úxapka. Ístu ambe enga Tribunali uandapka, jarhuajpespti paraksï Canadá anapuecha ka Comunidad Británica de Naciones (Commonwealth), úpiringaksï libriini paraksï uandani na engaksï exeenga ambe enga gobiernu ueenga. Joperu sánderu jukaparhakua ambe, Iglesia ka Quebec anapu gobiernu, nóteru ambeksï úsptia úni paraksï ójkutaani ánchikuarhitani engaksï Jeobaeri testiguecha ueenga.e

¿Íntspikuarhinksï jámasïni oksï tsípikua jingoni jámasïni uandantani Tata Diosïiri Reinueri ambe?

17. ¿Ambeksï úsïni máru gobiernuecha parajtsïni nóteru jurajkuni aianhpini?

¹⁷ Májkueni eska primeru kristianuecha, iásï anapu Tata Diosïiri marhuarichajtuchi ʻno atarantani jámasïnga Tata Diosïiri uandakuaniʼ (arhinta je 2 Corintios 2:17, La Biblia. Traducción del nuevo Mundo, [TNM]). Nájkiruka ísïika, máru gobiernuechaksï úraasïndi leiichani engaksï komersiueri ambe uandajka parajtsïni nóteru jurajkunia aianhpini. Ju je exeani tsimani juisiuechani nani enga exenhapka sinchi Jeobaeri testiguecha íntspikuarhini jámasïni ochi Tata Diosïiri ambe jámasïni uandantani.

18, 19. ¿Ambeksï úspi Dinamarca anapu juramutiicha paraksï nóteru jurajpinia aianhpini?

¹⁸ Dinamarca. Jurhiatikua 1 de oktubrini 1932 jimbo, uaxastanhaspti lei ma enga uandeenga eska no nema úpiringa publikasionichani atarantani jámani enga no kámapiringa permisu ma. Ísïisti, juchaari erachichaksï no ma permisu petaspti. Ísï pauandikua, sinko erachichaksï Roskilde aianhpini jámaxapti enga ma 30 kilometrisï (20 millas) oesterhisï jaka Copenhague enga kapitaliika. Joperu enga chúripkia, ima erachicheeri, erachi August Lehmann no niántaxapti. Jupikasptiksï erachini jimbokaksï arhispka eska íntspikuarhini jámaxapka no ma permisu jingoni.

¹⁹ Jurhiatikua 19 de disiembrini 1932 jimbo, August Lehmann tribunalirhu pánhaspti. Erachi uandantaspti eska pʼorhembiaspka kʼuiripuechani para Biblieri publikasionichani íntsaani ka eska no atarantani jámaxapka. Orheta tribunali enga ini kasuni exeni japka, kuájpispti ka uandaspti: “I acheeti [...] úsïndi kéndakuarhini ka no ma sentabu pʼiraxati indeni ambe jimbo ka nijtu uéjki andakuekani. Sánderu sési, inde ambe úsïndi eska tsïtani uéraaka”. Tribunali úspti eskaksï Jeobaeri testiguecha andapiringa, ka uandaspti eska erachi Lehmann no úpiringa arhinhani eska íntspikuarhini jámaxapka. Joperu imeecha engaksï ikiakuenga Tata Diosïiri iretani, méntkuksï uékaxapti eska iámu paisirhu nóteru aianhpinhapiringia ambakiti ambe (Sal. 94:20). Fiskali jenerali páspti ini kasuni asta Tribunal Supremo de la nación jingoni. ¿Ambeksï úspi erachicha?

20. ¿Ambe úspi Tribunal Supremo Dinamarca anapu, ka ambeksï úspi juchaari erachicha?

²⁰ Imani semanani jimbo enga Tribunal Supremo, jusgariuapiringa iámindu Dinamarca anapu Testiguechani, erachichaksï ueenaspti sánderu aianhpini. Ka martesï 3 de oktubrini 1933 jimbo, Tribunal Supremo aianhpispti ambe enga úkuarhipiringa erachi jingoni: májkueni uandaspti eska primeru tribunal enga exepka kasuni, eska August Lehmann no ma lei no kurhajchaxapka. Ísï jimbo, Jeobaeri testiguechaksï úpirindi seguirini aianhpini ka nóteru nema arhiapirindia ambe ma. Paraksï xarhatani eskaksï agradesidu jarhaspka Tata Diosï Jeobani jingoni enga jarhuataapka paraksï erachicha andani ini juisiuni, imeechaksï ueenaspti sánderu ánchikuarhikuni Tata Diosïni. Jiáni uératini enga Tribunali ísï uandapka, juchaari erachicha Dinamarca anapuecha, úsïndiksïa agustu aianhpini ka gobiernu nóteru ambe ma arhiasïndi.

21, 22. ¿Ambe uandaspi Tribunal Supremo Estados Unidos anapu erachi Murdockiiri kasu jingoni?

²¹ Estados Unidos. Domingu 25 de febreruni 1940 jimbo, erachi Robert Murdock enga prekursoriipka ka máteru siete Testiguechaksï jupikanhaspti engaksï aianhpini jámani japka kʼéri iretarhu Jeannette, enga Pittsburgh no iauani jaka, jini Pensilvania. Arhinhasptiksï eskaksï no sési úxapka jimbokaksï no ma permisu maianhpespka paraksï publikasionichani etsakuani. Erachichaksï uandaspti eska inde kasuni Tribunal Supremo de los Estados Unidos exepiringa, ka inde Tribunali uékaspti.

²² Jurhiatikua 3 de maiuni 1943 jimbo, Tribunal Supremo úspti eskaksï Jeobaeri testiguecha andapiringa. Uandaspti eska maianhpeni permisu ma jimbo no sési jarhaspka, jimboka ísïipiringa komu “maianhpeni jarhani ambe ma jimbo enga Constitución Federal no kurhajkuarhijka”. Ístu, Tribunal Supremo uandaspti eska munisipiurhu anapu lei nóteru marhuapiringia, jimboka enga seguriipiringa jarhani inde lei, nóteru nema úpiringia publikasionichani imprimiriuani ka ístu nóteru nema úpirindia uandani náki relijioni jimbo jarhani. Enga majistradu William Orville Douglas aianhpini japka ambe engaksï sáno iámindu Tribunalirhu anapuecha uandapka, uandaspti eska Jeobaeri Testiguecheri ánchikuarhita ʻsánderu ambeeska eska aianhpini ka publikasionichani etsakuani, úsïndiksï ini tsimani ambeʼ. Ka ístu uandaspti: “Inde ánchikuarhita engaksï Jeobaeri testiguecha újka, jatsisti para májkueni jukaparhakua ambeeni eska ima ambe enga iglesiecharhu únhajka ka eska ima ambe engaksï saserdoticha arhijtsïkpijka”.

23. ¿Andisï xáni jukaparhakue para jucha engaksï úpka andaani juisiuechani uéxurhini 1943 jimbo?

²³ Ambe enga Tribunal Supremo uandapka, kʼéri jarhuajperata máespti paraka Tata Diosïiri ireta úpiringa andani juisiuni, i ambe xarhataspti eskaksï Tata Diosïiri marhuaricheeska ka no atarantstiicha. Nóchi méni mirikurhiaka uéxurhini 1943 engachi Jeobaeri testiguecha andaapka Tribunal Supremurhu 12 ima 13 juisiuecheeri engaksï japka ka ístu jima kuenta úkuarhisïreendi kasu enga erachi Murdock úminhapka. Ambe engaksï Tribunalicha uandakia kánikua marhuaxati iásï para máteru juisiuecha engaksï Jeobaeri testiguecha úminhani jaka, engaksï juchaari enemiguecha uandajka eskachi no sésikua jatsiska para aianhpini Tata Diosïiri Reinuni xanharu jimbo ka kʼumanchikuecha jimbo.

“Uétarhisïndi eska jucha sánderu janhanharhiaka Diosïni ka eska kʼuiripuechani”

24. ¿Ambechi úsïni engajtsïni gobiernu ma nóteru jurajkujkia aianhpini?

²⁴ Tata Diosï Jeobaeri marhuarichachi kánikua agradeserisïnga engaksï gobiernuecha uaajka leichani engaksï uandajka eskachi sésikua jatsiska parachi Tata Diosïiri Reinueri ambe uandantani ka no nemajtsïni arhini ambe ma indeni ambe jimbo. Joperu engachi nóteru jurajkunhajkia para aianhpini, jánguarhintasïngachi úni ambe ma parachi seguirini aianhpini xáni eskachi xáni uaaka. Májkueni eska apostoliicha uétarhisïndi eskachi jucha “sánderu janhanharhika Diosïni ka eska kʼuiripuechani” (Uku. 5:29; Mat. 28:​19, 20). Ístuchi nirasïnga tribunalicharhu parajtsïni ménderu jurajkuni úni juchaari ánchikuarhika. Ju je exeani tsimani ejempluechani.

25, 26. ¿Ambe úkuarhispi Nicaragua enga jimbo juisiu ma úkuarhipka Corte Suprema de Justicia de la nación jimbo, ka ambe úkuarhispi?

²⁵ Nicaragua. Jurhiatikua 19 de nobiembri 1952 jimbo, Donovan Munsterman enga misioneruepka ka sierbo de sukursali, niraspti ofisinarhu enga inmigrasioniri ambe exenhajka enga Managua jaka. Arhinhaspti eska nipiringa exeni kapitanini Arnoldo Garcíani enga orhejtsïkuenga imani Ofisinani. Kapitani arhispti erachi Donovanini eskaksï Jeobaeri testiguecha no sésikua jatsipka paraksï seguirini aianhpini iámindu Nicaragua ambe engaksï jakajkujka, ni pʼímarhiani máteruechani paraksï úni imani ambe engaksï imeecha újka. Engaksï kurhamarhipka kapitanini andi, ima arhiaspti eska gobiernu no sésikua íntskuaspka Jeobaeri testiguechani paraksï úni imeecheri ánchikuarhitani. Peru ístuksï arhinhaspti eskaksï Testiguecha jandiajku uékasïreenga juramukuarhini. ¿Neechaksï úxapi ini ambe? Saserdoti katolikuecha.

²⁶ Erachi Munsterman sóntku niraspti jarhuajperata kurhajkuarhini Ofisinarhu enga Relijionichani permisu íntsaajka ka ístu niraspti exeni presidentini Anastasio Somoza Garcíani, peru no nema uékaspti jarhuatani. Ísï jimbo, erachichaksï máteru ambe úspti. Míkasptiksï kʼumanchikua Reinuni, grupu sapirhatichani jimboksï tánguarhisïreendi ka nóteruksï aianhpisïreendi xanharuecharhisï. Peruksï seguiriispti aianhpini Reinueri ambe. Ístuksï niraspti Corte Suprema de Justicia de Nicaragua jingoni paraksï kurhakuni eska jarhutaapiringa paraksï imeecha seguirini úni imeecheri ánchikuarhitani. Uánikua periodikuechaksï uandasïreendi eskaksï Jeobaeri testiguecha nóteru jurajkunhaxanhapkia paraksï úni imeecheri ánchikuarhitani ka eskaksï jarhuajperata kurhakuspka Corte Supremani. Ini ambe jimbo Corte Suprema uékaspti exeni ini kasuni. ¿Ambe úkuarhispi? Jurhiatikua 19 de juniu 1953 jimbo, Corte Suprema aianhpispti eska jarhuataapiringa Jeobaeri testiguechani. Uandaspti eska ísï eskaksï na no jurajkuani japka Jeobaeri testiguechani paraksï úni imeecheri ánchikuarhitani, eskaksï no janhanharhiaxapka imani leichani engaksï uandajka eskaksï kʼuiripuecha sésikua jatsiska paraksï uandani ambe engaksï eratsejka, ambe engaksï jakajkujka ka paraksï máteruechani aianguani ambe engachi jakajkujka. Ístu juramuspti eska gobiernu Nicaragua anapu ka Jeobaeri testiguechaksï jatsipka para ménderu sési pájperantani.

27. ¿Andisï ísku pakaranhapi ambe enga Corte Suprema úpka, ka nénaksï exespi erachicha engaksï úpka andani ini juisiuni?

²⁷ Nicaragua anapuechaksï ístu pakaraspti enga Corte Suprema Jeobaeri testiguechani jarhuatapka. Jiánisï, ambe engaksï saserdoticha uandeenga kánikua jukaparhakuespti. Indeni ambe jimbo, Corte no uékasïreendi arhirperata ambe jatsini imeechani jingoni. Ka ístu, méntkisï ima ambe úkurhisïreendi ambe enga gobiernu uandeenga, jimbosï Corte sáno méntkisï imani ambe ueendi ambe enga gobiernu uandeenga. Juchaari erachichaksï seguru jarhaspti eskaksï úspka andani jimboka imeecheri Rei kuájchakuaxapka ka jimbokaksï seguirispka aianhpini.

28, 29. ¿Ambe úkuarhispi Zaire 1980 jimbo ísï enga mójtakupka ambe ma?

²⁸ Zaire. Uéxurhini 1980 jimbo ísï, ma 35,000 Jeobaeri testiguechaksï jarhaspti jini Zaire, enga iásï jindeeka República Democrática del Congo. Jimboka sánderu ánchikuarhita ambe jarhaspka Reinueri ambe, Beteli máteru edifisiuechani uaaxapti. Disiembrini 1985 jimbo, k’éri tánguarhikua internasionali ma úkuarhispti estadiurhu ma enga kapitali Kinsasa jaka, ka 32,000 kʼuiripuechaksï jarhaspti ka máteru paisirhu anapuechaksï niraspti. Peru ueenaspti mójtakurhini ambe ma Jeobaeri testiguecha jingoni. ¿Ambe úkuarhispi?

²⁹ Erachi Marcel Filteau enga misioneruepka ka enga Quebec (Canadá) anapuepka ka enga kánikua no sési kánhapka jiáni enga Duplessis juramuni japka, marhuaxapti jini Zaire ka uandantasïndi ambe enga úkuarhipka: “Jurhiatikua 12 de marsuni 1986 jimbo, erachicha engaksï orhejtsïkuenga juchaari ánchikuarhitani, intsïnhasptiksï karta ma enga uandeenga eskaksï Jeobaeri testiguecha Zaire anapuecha nóksï sésikua jatsipka paraksï kúnguarhikua ma jatsini”. Paisirhu anapu presidenti Mobutu Sese Seko firmarispti ima sïrandani.

30. ¿Ambe jatsispi para exeni Grupu enga Betelini Orhejtsïkuenga, ka ambe úspi?

³⁰ Pauandikua paisirhu anapu radiu i ambe aianhpispti: “Nóteruchi méni kurhauaka Jeobaeri testiguecheri ambe [ixú Zaire]”. Ka erachichaksï jirejiresï ueenanhaspti no sési kánhani. Xereantasptiksï Kʼumanchikua Reinuerichani ka erachichanksï sïpakuaspti ambe ma, jupikasptiksï, ónhasptiksï ka ataasptiksï. Astaksï sapiichani jamberi engaksï Testiguepka ónhaspti. Jurhiatikua 12 de oktubrini 1988 jimbo, gobiernu mínguarhispti iámindu ambe enga Jeobaeri kúnguarhikua jatsipka ka grupu ma sondaduecheri Beteliksï pakarasti irekani. Erachicha engaksï orhejtsïkuenga juchaari ánchikuarhitani, nirasptiksï presidenti Mobutu jarhuajperata kurhakuni, joperu i no jarhuataaspti. Grupu enga Betelini Orhejtsïkuenga, jatsispti para exeni ambe engaksï úpiringa: Tribunal Supremo jarhuajperata kurhakuni o erokuarhini aberi ambe úkuarhipirini. Erachi Timothy Holmes, misioneru ma enga imani tiempu jimbo orhejtsïkuenga Grupuni enga Betelini Orhejtsïkuenga, uandaspti: “Kurhakuspkachi Tata Diosï Jeobani eskajtsïni jánhastapiringa parachi míteni ambe úni”. Engachi na kómarhipkia ka exeni ambe engachi úpiringa, erachicha Grupueri engaksï Betelini Orhejtsïkuenga uandasptiksï eska nótki tiempuespka paraksï juisiu ma kurhajkuarhini. Sánderu sési, jánguarhintasptiksï paraksï erachicha sési japiringa ka parakaksï seguiripiringa aianhpini.

31, 32. ¿Ambe úspi Tribunal Supremo Zaire anapu enga kánikua jukaparhakua ambeepka ka néna jarhuataaspi i ambe erachichani?

³¹ Uánikua uéxurhini tátsekua, erachichaksï nóteru xáni no sési kánhasïreendia ka paisirhuksï sánderu janhanharhiasïreendia kʼuiripuecheri derechuechani. Grupu enga Betelini Orhejtsïkuenga, uandaspti eska iásï kʼóru tiempuespkia para juisiu ma kurhakuni Tribunal Supremo de Justicia Zaire anapuni. Ka ískuksï pakaraspti enga Tribunali uékapka exeni ini kasuni. Jurhiatikua 8 de eneruni 1993 jimbo, sáno siete uéxurhini tátsekua enga presidenti firmaripka sïrandani enga uandeenga eskachi no sésikua jatsispka parachi úni juchaari ánchikuarhitani, Tribunali uandaspti eska gobiernu no jurhimbikua jingoni kaaspka Jeobaeri testiguechani, ka úspti eska ima sïranda enga presidenti firmaripka nóteru marhuapiringia. ¡Eratsenta je ambe enga úkuarhipiringa indeni ambe jimbo! Nájkirukaksï úpiringa uándikunhani, juesichaksï uandaspti eska ambe enga presidenti firmaripka, nóteru marhuapiringia. Erachi Holmes uandantasïndi: “Iámindu indeni tiempu jimbo enga i juisiu úkuarhini japka, exespkachi na enga Tata Diosï Jeoba újka eska mójtakurhiaka ambe ma” (Dan. 2:21). Engaksï erachicha juisiuni andapka, sánderuksï mintsikaspti Tata Diosïni jimbokaksï exespka eska Jesúsi enga Reiika, arhispka imeeri irekani káni ka néna úni ambe ma.

³² Engaksï na jurajkunhapkia paraksï úni juchaari ánchikuarhitani, Beteli úspti iámindu ambe parakaksï misioneruecha úpiringa niárani paisirhu, uaasptiksï jimbanhi konstruksionichani ka parakajtsïni máteru Beteliicha úpiringa publikasionichani axacheani.f ¡Kánikuachi sési pʼikuarherasïnga iámindu Tata Diosïiri marhuaricha engachi exejka na enga Tata Diosï Jeoba újka iámindu ambe parachi sési jarhani imani jingoni! (Is. 52:10.)

Jeoba jindeesti juchiiti jarhuajpiri

33. ¿Ambejtsïni jorhendasïni ambe enga úkuarhika máru juisiuecha jimbo?

³³ Eskachi na exekia ambe enga xáni úkuarhikia máru juisiuecharhu, xarhatasïndi eska Jesúsi úxaka ambe enga aiatspeka: Jíksïni “arhistachiaka uandakuechani, ka mámaru ambeksïni mítetarani para eskaksïni iámindu chaari ikiatspitiicha no uaaka andani ka nijtuksï ambe arhini” (arhinta je Lukasʌ 21:​12-15). Ménichani Tata Diosï Jeoba úrasti nemani enga ísïika eska Gamalieli para kuájchakuni imeeri iretani, o ístu ústi engaksï juesicha ka abogaduecha uékaaka no sáni chéparini kuájpini jurhimbikuani. Tata Diosï Jeoba úxati eskaksï juchaari enemiguecheri armecha no sáni marhuauaka (arhinta je Isaías 54:17). Ambe engaksï újka, nóksï úsïndi pʼínguni Tata Diosïiri ánchikuarhitani.

34. ¿Andisï xáni ísku pakaranhajki engachi andaajka juisiuechani, ka ambeksï xarhatasïni? (Exe je rekuadruni “Kʼérati tribunalichaksï jarhuajpisïndi para seguirinhani aianhpinhani”).

³⁴ ¿Andiksïsï xáni ísku pakatpijka juisiuecha engachi andaajka? Eratsenta je ini ambe: Jeobaeri testiguechachi no kʼéri ambe exenhasïnga, nijtuksï uánikuecha uéjki úni ambe engachi jucha újka. Nóchi botarisïnga, nijtuchi nirajki kambaniecharhisï engaksï politikuecha uaajka, nijtuchi jámajki fabori ambe kurhakuani politikuechani. Ístu, erachicha engaksï kʼéri Tribunalirhu pánhajka, sáno méntkisïksï ísï exeasïndi komueska nema enga no káni ʻmítekukaʼ nijtu “xáni jorhenani” (Uku. 4:13). Ísï jimbo, kʼuiripuechaksï úpirindi eratseni eskajtsïni tribunalicha no jatsipiringa para jarhuatani parachi juchaari enemiguechani andaani relijioniiri anapuechani o politikuechani. Nájkiruka ísïika, tribunalichajtsïni uánikua xanhari jarhuatasti. Ísï jimbo, juisiuechani engachi andaakia xarhatasïndi eskachi “Kristueri chúxapatiiska” ka eskajtsïni “Tata Diosïsï axaka juchantsïni” (2 Cor. 2:17, TNM). Ísï jimbo, úsïngachi májkueni uandani eska apostoli Pablu: “Diosï [Jeoba, TNM] jindeesti juchiiti jarhuajpiri ísï jimbo ji no sáni chéaka” (Ebr. 13:⁠6).