Jeoiadá no chésïndi

Jesabeli kánguarhispti uájpani ma enga Atalía arhinhaenga ka enga májkueni no ambakipka eska ima. Atalía Juda anapu rei jingoni uambuchaspti. Enga Atalíaueri uámba uarhipkia, imeri uájpa uénaspti juramuni. Ka enga uájpajtu uarhipkia, Atalía pakatakuarhispti Juda anapu reinuni. Paraka no nema euantapiringa, jánguarhispti uándikuani reiri uájpechani ka iámindu engaksï úpiringa juramuni enbesi de ima. ¡Asta imeri nimakuechani uándikuaspti! Jimboksïsï iáminduecha chérhiendi.

Kʼéri saserdoti Jeoiadá ka imeri témba Jeoseba, mítisptiksï eska ambe enga Atalía úni japka kánikua no sési jarhaspka. Ka nájkirukaksï úpiringa uándikunhani, jískasptiksï Atalíaueri nimakuani ma, charhakuni ma enga arhinhaenga Jeoási. Templurhuksï kʼuiriperaspti.

Jiáni enga Jeoási sieti uéxurhini jatiripkia, Jeoiadá tánantaaspti iámindu guardiecheri jefechani ka lebitechani. Ka arhiaspti: “Kuidariua je templurhu anapu puertechani. Asï jurajku je eska nema inchaaka”. Tátsekua, Jeoiadá jatsijtsïkuspti korona Jeoásini paraka Juda anapu reipiringa. Jimajkani, Juda anapu kʼuiripu uinhachaspti: “¡Eska ióni jamberi irekaaka juchari rei!”.

Enga reina Atalía kurhaapka na enga kʼuiripu uinhachani japka, uiriispti templurhu. Enga exepka jimbanhi reini, uinhachaspti: “¡Traisioni! ¡Traisioni!”. Guardiauecheri jefechaksï jupikaspti no ambakiti reinani ka uándikusptiksï. Reina, no ambakiti ejemplu máespti para ireta. ¿Ka iásï ambe úkuarhipirinia?

Jeoiadá jarhuataspti iretani pakatperakua ma úni Jeoba jingoni paraksï aiakuni imantku kómarhini. Jeoiadá úspti eskaksï kuaskupiringa Baaliri templuni ka kʼamajkuani idoluechani. Saserdotichani péraaspti ka lebitechani paraksï ánchikuarhini Jeobaeri templurhu, paraka kʼuiripu úpiringa ménderu jima kómarhini. Ka guardiechani paraksï kuidarini templuni para no nema inchani enga no limpiu japiringa. Tátsekua, Jeoiadá ka guardiecheri jefecha, pásptiksï Jeoásini palasiurhu ka tronurhuksï uaxastaspti. Kánikuaksï tsípispti Juda anapuecha. Iásï kʼóruksï úpirindia marhuakuni Jeobani, jimboka Atalía uarhispkia ka nóteruksï kómarhipirindia Baalini. ¿Exesïniri eska Jeoiadá uánikua kʼuiripuni jarhuataspka enga ísï no chénga?