JORHENGUARHIKUA 10
¿Nénaksïni marhuachia tánguarhini Jeobaeri testiguecha jingoni?
¿Ménisïksïni pʼímarhiskia parajtsï Jeobaeri testiguecha jingoni tánguarhini? Engajtsï no méni tánguarhini jaka, jamberijtsï sánisï chéni pʼikuarherajka nirani tánguarhikuecharhu. Ka jamberijtsï kurhamarhikuarhijka: “¿Ambeksï úsïni Jeobaeri testiguecha engaksï tánguarhijka? ¿Andiksïsï xáni jukaparharajki tánguarhini? ¿Jatsipirini parani jíjtuni nirani?”. Ini jorhenguarhikua jimbojtsï jorhenguarhiaka eskaksïni tánguarhikuecha kánikua jarhuataaka ka eskaksï uaaka úni eskajtsï sánderu sési pájperaaka Jeoba jingoni.
1. ¿Andiksïsï tánguarhijki Jeobaeri testiguecha?
Biblieri karari ma uandaspti andisï xáni jukaparhakue tánguarhini: “K’éri kúnguarhikua jimbo ji k’éri ambe arhiaka Jeobani” (Salmo 26:12). Májkueni, Jeobaeri testiguechajtuksï iásï tánguarhisïndi ka i ambe kánikua sési pʼikuastaasïndi. Interu parhakpinirhu mándani semanaksï tánguarhisïndi paraksï kʼéri ambe arhini Tata Diosïni, paraksï pirekuni ka paraksï májku kómarhini. Ístuksï mándani uéxurhini jatsiasïndi kʼérati tánguarhikuechani.
2. ¿Ambejtsï jorhenguarhia juchaari tánguarhikuecharhu?
Tánguarhikuecharhu, Biblieri ambechi jorhenguarhisïnga ka ini tánguarhikuecha jimbojtsïni sési aiangusïndi ambesï arhikuekajki Tata Diosïri Karakata (arhinta je Nehemías 8:8). Engajtsï chá niraska tánguarhikuecharhu, jimajtsï jorhenguarhiaka sánderu Jeobaeri ambe ka na enga xáni ambakiti ambe xarhatajka. Engajtsï sánderu jorhenguarhiska na engaksïni ima xénchajka, sánderujtsï uékaaka imeeri amigueni. Ístujtsï exeaka na engaksïni jarhuataaka parajtsï sési irekuarhini (Isaías 48:17, 18).
3. ¿Nénaksïni jarhuataa imeecha engajtsï tánguarhikuarhu míteauaka?
Jeobajtsïni arhisïni eskachi ‘jarhuajperaaka parachi úni uékperani ka ambakiti ambe úni, ka [...] no kueratani siemprini tánguarhini’ (Ebreu 10:24, 25). Tánguarhikuarhu, chájtsï míteauaka kʼuiripuechani engaksï xénchperajka ka engaksï uéjka sánderu ambe míteni Tata Diosïri ambe ísï eska chá. Kurhauakajtsï eska uánikua ambe uandontskuarhenhasïnga Biblieri ambe (arhinta je Roma 1:11, 12). Ístujtsï uaaka uandontskuarhini imeecha jingoni engaksï úka orhepani uérani mámaru járhati uandanhiatecha jingoni, no arhiparhini engaksï tembuchatini jauaka o nómbe. I jindeesti máru ambe enga jimbo Jeoba uéjka eskachi pʼindeaka tánguarhini.
JORHENGUARHI JE SÁNDERU AMBE
Jorhenguarhi je nénaksï úkuarhisïni Jeobaeri testiguecheri tánguarhikuecha ka andisï xáni jukaparhakue eskachi jánguarhintaaka nirani.
4. Jeobaeri testiguecheri tánguarhikuecha
Primeru siglurhu anapu kristianuechaksï pʼindesïrendi tánguarhini paraksï Jeobani kʼéri ambe arhini (Roma 16:3-5). Arhinta je Kolosasi 3:16 ka uandontskuarhi je íri ambe:
¿Nénaksï kómarhisïreni Jeobani primeru siglurhu anapu kristianuecha?
Iásï, Jeobaeri testiguechajtuksï pʼindesïndi májku tánguarhini. Parajtsï úni míteni, nénaksï úkuarhisïni tánguarhikuecha, Exe je BIDEUNI. Tátsekua, exe je dibujuni enga tánguarhikuani ma xarhatajka ka uandontskuarhi je íri ambe.
¿Néna sáno májkueniski ambe enga Kolosasi 3:16 uandajka ka ambe enga úkuarhijka Kʼumanchikua Reinueri ma jimbo?
Engajtsï exeakia bideuni o dibujuni, ¿jarhaski ambe ma engajtsï tsitika juchaari tánguarhikuecheri?
Arhinta je 2 Korintu 9:7 ka uandontskuarhi je íri ambe:
¿Andisï no kurhajkuarhinhajki sentabu Jeobaeri testiguecheri tánguarhikuecha jimbo?
Exe je chaari jorhentpiri jingoni, ambe engachi exeaka i semana juchaari tánguarhikuecha jimbo.
¿Ambejtsï exesïni chá i tánguarhikueri eskaksïni sánderu marhuacheaka?
¿Mítespijtsï ini ambe?
Pájinarhu jw.org exeakajtsï nani ka na jandoraksï úkuarhisïni tánguarhikuecha interu parhakpinirhu.
Juchaari tánguarhikuecharhuksï nitamataranhaasïndi arhijtsïkperatecha ka exenhaasïndiksï bideuechani, tángurhikuechaksï uénasïndi ka kʼamarhani pirekua ka kómarhikua ma jingoni.
Máru particha jimbo tánguarhikuecharhu, kʼuiripuechaksï úsïndi komentariuechani íntspiani.
Iáminduechaksï úsïndi nirani, familiecha, kʼératicha, sapirhaticha ka tumbiicha...
Nójtsï ma maiampiaka parajtsï inchani Jeobaeri testiguecheri tánguarhikuecharhu ka nójtuksïni kurhacheati engajtsï incharhini jauakia.
5. Uétarhisïndi kánikua jánguarhintani para nirani tánguarhikuecharhu
Ju je eratsentani Jesúsiri familiani, imaksï Nasareti irekaspti ka paraksï úni nirani templurhu mándani uéxurhini jini Jerusaléni, jatsisïrendiksï para tanimu jurhiatikisï xanharani juátecharisï. Arhinta je Lukasʌ 2:39-42 ka uandontskuarhi je íri ambe:
¿Exesïntsï chá eska uétarhisïrenga eskaksï jánguarhintapiringa paraksï úni Jerusaléni nirani?
Ka chá, ¿ambejtsï exesïni eskajtsï jatsiska para úni parajtsï úni nirani tánguarhikuecharhu?
¿Exesïntsï eskaksïni marhuacheaka nirani tánguarhikuecharhu nájkiruka úkua jukaaka? ¿Andi?
Bibliajtsïni arhisïndi eska kánikua jukaparhakueska tánguarhini parachi kʼéri ambe arhini Jeobani. Arhinta je Ebreu 10:24, 25 ka uandontskuarhi je íri ambe:
¿Andichisï jatsi para méntkisï nirani tánguarhikuecharhu?
MÁRUKSÏ I AMBE UANDASÏNDI: “No uétarhisïndi relijioni ma jingoni jarhani parachi úni kómarhini Tata Diosïni, ji uaaka jandiajku jorhenguarhini Biblieri ambe”.
¿Náki tekstujtsï úrapirini o ejemplu, parajtsï xarhatani ambesï uéjki Jeoba eskachi uaaka?
AMBE ENGACHI JORHENGUARHIKA
Nirani tánguarhikuecharhu jarhuataatiksïni parajtsï sánderu jorhenguarhini Jeobaeri ambe, parajtsï úni imeeri amigueni ka parajtsï úni kómarhini máteruecha jingoni.
Ambejtsï jorhenguarhiski
¿Andijtsïnisï Jeoba pʼímarhijki parachi nirani tánguarhikuecharhu?
¿Ambejtsï jorhenguarhia engajtsï tánguarhiaka Jeobaeri testiguecha jingoni?
¿Para ambeksïni máteru ambe jarhuataa tánguarhikuecha?
ÍSTU EXE JE INI AMBE
¿Chésïntsï sáni nirani tánguarhikuecharhu? Acheeti ma enga ísï pʼikuarherenga, niáraspti kánikua tsitiani tánguarhikuechani. Exe je andi.
Míti je tumbini ma enga kánikua tsitiauenga tánguarhikuechani ka exe je ambe jatsispi para úni paraka seguiripiringa nirani tánguarhikuecharhu.
Arhinta je na engaksï exeajka máteruecha tánguarhikuechani.
Exe je na enga kʼuiripu ma enga pandiia ma jingoni jámeenga mójtarhipka enga uénapka nirani tánguarhikuecharhu Jeobaeri testiguecha jingoni.
“No nani nirasïrenga engani no peenga juchiiti armani” (Aianhpiri, 1 de juliu de 2014)