¿Sési jarhaski ima ambe engachi jingoni tsípikuarhijka?
“Jánguarhinta je exeni ambesï jaiapanhentajki Tata” (EFE. 5:10).
1, 2. a) ¿Náki tekstuecha xarhatasïni eska Jeoba uékasïnga eskachi tsípikua jingoni irekaaka? b) Jimboka tiempu engachi újka mámaru ambe úni “Tata Diosïiri intsïmperata máeska”, ¿ambechi uaa imani jingoni?
MÉMINDU uandasïndi Bibliarhu eska Jeoba no uékasïnga eskachi xántkisï irekani jauaka, ima uékasïndi eskachi tsípikua jingoni irekaaka. Pori ejemplu, Salmo 104:14, 15 uandasïndi eska ima “úsïnga eska [...] echeri íntspiaka t’irekua ambe, binu enga sési pʼikuastajka kʼuiripueri mintsitani, aseiti enga újka eska ma sési xarhanharhiaka ka t’irekua enga sési pʼikuastajka kʼuiripueri mintsitani”. Ísïisti, Tata Diosï úsïndi eska echeri íntspiaka t’irekua ambe parachi úni jatsini semiia, aseiti ka binu. Peru ju je exeni eska binu no solu jindeeska ambe ma engajtsïni sési úchijka, sino ístu “tsíperasïndi mintsitani” (Ecl. 9:7; 10:19). Jiájkani xarharasïndi eska Jeoba uékasïnga eskaksï kʼuiripuecha tsípikua jingoni irekaaka, jimboka ‘kánikua sési pʼikuastantaxaka imeecheeri mintsita’ (Úku. 14:16, 17).
2 Ísï jimbo, Tata Diosïiri marhuariicha nóksï jatsisti para no sési pʼikuarherani engaksï ménisï tiempu arhutaaka paraksï tsípikuarhini. Jimboka engaksï exeajka “pájaruechani engaksï auandarhisï jámajka” ka “imani tsïtsïkiichani engaksï juátarhisï andarajka”, úsïndi úni eskachi sési pʼikuarheraaka ka únchi sánderu míteni ambe ma (Mat. 6:26, 28; Sal. 8:3, 4). Ísï jimbo, tsípikua jingoni irekani “Tata Diosïiri intsïmperata máesti” (Ecl. 3:12, 13). Míteskachi eska inde tiempu engachi mámaru ambe újka Tata Diosïiri regalu máeska, jimbochisï uéjka ísï úrani eska ima na jaiapanhintajka.
Ambakiti ambe eraku je parajtsï tsípikuarhini
3. ¿Andisï sési jaki parachi jiókuarhini eska jarhaska mámaru ambe engachi jimbo uaaka tsípikuarhini?
3 Eskachi na exeni jauaka, kristianu enga sési eratsejka exesïndi eska mándani kʼuiripu jatsiska para erakukuarhini ambe jingoni tsípikuarhia. Ka májkueni úkuarhisïndi tsípekuarhitechani jingoni eska arhani ambe ma, máru lugarichani jimbo ambe ma kánikua áspesïndi ka máteruechani jimbo ima ambe no áspiti ambeesïndi. Máru erachiichaksï erakusïndi tsípikuarhini máru ambe jingoni engaksï máteru lugari jimbo no sáni tsitijka tsípikuarhini imani ambe jingoni. Ka i ambe niárasïndi úkuarhini asta jimeesïsï engaksï májku lugari jimbo irekanhaka. Pori ejemplu, máruksï sési pʼikuarherasïndi engaksï siionirhu uaxakajka libru ma arhintani, peru máteruecha no sáni tsitisïndi ini ambe úni; máruksï tsitisïndi bisikleta jatani, peru para máteruechaksï ini ambe úni kánikuaksï kuatarasïndi. Jatsiskachi para jiókuarhini ísï eska na úkuarhijka tʼirekuani jingoni, uaati jarhani uánikua ambe engachi jimbo uaaka tsípikuarhini (Rom. 14:2-4).
4. ¿Andisï uétarhijki imani ambe erakuni engajtsïni sési úchiaka? Uanda je ejemplu ma.
4 Ísïisti, engachi újka erakukuarhini ambe jingonchi uaa tsípikuarhini no jindeesti parachi úni imani ambe enga no sési jaka. Ju je ménderu ejempluni enga tʼirekueri ambeeka. Nájkirukachi tsitijka mámaru ambe úmantani, ¿a no eskachi no méni uékapiringa ima ambe enga terekia? No solu no sési japirindi, sino ístuchi úpiringa pʼamenchakua ambe pʼirani. Májkueni úkuarhisïndi nájkiruka uánikua ambe jaka engachi jimbo uaaka tsípikuarhini, nóchi tsípikuarhisïnga imani ambe jingoni enga ísku jándikueri ambeeka, atajperakueri o no sési ambeeka, jimbokaksï no terukuntasïnga Tata Diosïiri Karakatani jingoni, i ambe uaatijtsïni no sési úchini ka nóteruchi sési jarhani Tata Diosï Jeoba jingoni. Ísï jimbo, nóchi jatsiska para imani ambe erakuni engajtsïni uaaka no sési úchini. Sánderu sésisti eskachi exeaka na jásï tsípikuarhiteski ima engachi jingoni uéjka tsípikuarhini, sési jarhaski o no sési jarhaski (Efe. 5:10). Exeni jauakachi néna úni ini ambe.
5. ¿Nénachi uaa míteni eska Jeoba jaiapanhentaxaka ambe engachi jingoni tsípikuarhijka?
5 Imajku tsípekuarhitechajtsïni marhuacheati enga Jeoba jaiapanheantajka. ¿Nénachi mítesïni eska tsípikuarhita ma terukuntaxaka prinsipiuechani jingoni engaksï Bibliarhu jaka? (Sal. 86:11.) I tanimu kurhamarhikuechani exepariani. “Ambe, káni ka néni jingoni”. Ju je mándani exeani.
¿Ambe ka ambeeski?
6. ¿Ambe tsípekuarhitechanchi no jiókuarhiasïni, ka andi?
6 Parachi erakuni ambe jingoni tsípikuarhini orhetachi jatsiska para kurhamarhikuarhini: “¿Ambe ka ambe jarhaski engani jingoni uéjka tsípikuarhini?”. Sési jarhasti eskachi exeaka eska para Tata Diosïiri marhuariicha, tsimopurhu jásï tsípekuarhitecha jarhaska: primeru, ima ambe engaksï jingoni no jatsika para tsípikuarhini, ka segundu, ima ambe enga imeecheeri konsiensia arhiajka eska sési jarhaska. ¿Nákiiskiksï engaksï meru no jatsika para jingoni tsípikuarhini? Imeestiksï engaksï xarharajka o engaksï únhajka ambe ma enga nómindu terukuntajka Tata Diosïiri prinsipiuechani jingoni o imeeri juramukuechani jingoni (1 Juanu 5:19). Nájkiruka i parhakpinirhu, kʼuiripuecha tsípikuarhini jaka imani ambe jingoni enga kánikua no sési jaka, komu sïkuamikua ambe, omoseksualidadiri ambe, pornografia ambe exeni ka atajperakueri ambe o máteru ambe enga Tata Diosïiri Karakata uandajka eska no sési jarhaska, juchachi kristianuecha nómindu tsípikuarhisïnga ini ambe jingoni (1 Kor. 6:9, 10; arhinta je Apokalipsisi 21:8). No arhiparini nani engachi jauaka, nóchi tsípikuarhisïnga ini ambe jingoni, ini ambe úparini xarhatakuni jarhasïngachi Jeobani eskachi kurhajchasïnga imeeri juramukuani enga uandajka: “Ikicha je imani ambe enga no sési jaka” (Rom. 12:9; 1 Juanu 1:5, 6).
7, 8. ¿Néna uaa míteni kristianu ma eska ambe enga jingoni uékani jaka tsípikuarhini jaiapanhentasïnga Tata Diosï Jeoba? Uanda je ejemplu ma.
7 Iásï ju je exeani máteru jásï tsípekuarhitechani: imeechani enga Biblia no uandajka eskaksï sési jarhaska o eskaksï no sési jarhaska. ¿Néna mítesïni kristianu ma eska ima ambe enga jingoni uéjka tsípikuarhini jaiapanhentaxaka Tata Diosï Jeoba? Exeparini ambe enga uandajka Biblieri prinsipiuecha (Pro. 4:10, 11). Ísï uaati ambakiti ambe erakuni enga sési pʼikuastaaka imeeri konsiensiani (Gal. 6:5; 1 Tim. 1:19). ¿Ambe jarhuataa para ambakiti ambe erakuni úni? Ju je ménderu tʼirekueri ejempluni exeni. Ante de ueenani tsʼémuni tʼirekua ma, kurhamarpisïngachi ambe ka ambe jukaski. Májkueni úkuarhisïndi, ante de erakunchi ambe jingoni tsípikuarhini, jatsiskachi para exeni ambe ka ambe jaua ini tsípikuarhita jingoni (Efe. 5:17).
8 Ju je exeni ejemplu ma. Sáno iáminduechachi tsitisïnga deporti jimbokachi kánikua sési pʼikuarherasïnga imani ambe úni. Ka inde ambe sési jarhasti. Joperu, ¿úpirini jarhani máteru ambe ini tsípikuarhiteri engachi tsitiaka, komu no sési jámani para andani máteruechani, pʼajchakuani o kʼuínchikuechani uaantani o uandani eska juchaari paisi sánderu jukaparhakueska? Ísï jimbo, ju je exekuarhini . Engachi ísï úska, jamberichi exeaka eska juchaari jángua no terukuntaxaka na enga Jeoba uéjka ni imani pínandikua ni uékperakua jingoni engachi aianhpijka ka erakunchi nóteru tsípikuarhinia ini ambe jingoni (Isa. 61:1; Gal. 5:19-21). Peru engachi niáraska exeni eska máru ambe tsípikuarhiteri ma terukuntasïnga Tata Diosïiri Karakatani jingoni, uaati eskachi sési pʼikuarheraaka imani tsípikuarhitani jingoni (Gal. 5:22, 23; arhinta je Filipusï 4:8).
¿Káni uaa tsípikuarhini?
9. Uanda je ambechi niárasïni míteni engachi kurhamarhikuarhijka: “¿Káni uaa i ambe?”.
9 Máteru ambe engachi jatsipiringa para kurhamarhikuarhini jindeesti: “¿Káni uaa i ambe?”. Jatsiskachi para exeni na jatinchi uaa inde ambe ka na xánchi tiempu úraa parachi inde ambe úni. Kurhamarhikua ambe jingoni, xarhatasïndi ambe engachi jingoni sánderu tsitijka tsípikuarhini ka kurhamarhikua káni xarhatasïndi ambe engachi sánderu jukaparharajka. Jiájkani, ¿nénachi uaa exeni eskachi no xáni jukaparharaxaka tsípekuarhitechani?
10, 11. ¿Nénajtsïni jarhuatasïni Mateu 6:33 parachi exeni na xánchi tiempu úraa parachi tsípikuarhini?
10 Ju je miántani eska Jesukristu uandaspka: “Xéncha chiiti Tata Diosï Jeobani iámu chiiti mintsita jingoni, iámu chiiti alma jingoni, iámu chiiti eratsekua jingoni ka iámu chiiti uinhapikua jingoni” (Mar. 12:30). ¿Nénachi uaa xarhatani eska ambe enga sánderu jukaparhakueka para jucha jindeeska xénchani Jeobani? Kurhajchaparini ambe enga Jesúsi uandapka: “Seguirii je orhetku peerani Tata Diosïiri Reinuni ka ístu imani ambe enga ima uandajka eska sési jarhaska. Ka ísï úparini, ístujtsï intsïnhaaka iámindu ini ambe” (Mat. 6:33). Eskachi na exeni jauaka, i uandakuechajtsïni jarhuatasïndi parachi exeni na xánchi tiempu úraa parachi tsípikuarhini ka na xánchi jukaparhakueua tsípekuarhitechani.
11 Jesúsi no kurhajkuarhisïndi eskachi jirinhaaka “solu Reinujku”. Ambe engajtsïni juramuchijka jindeesti eskachi “orheta peeraaka Tata Diosïiri Reinuni”. Ima mítesti eskachi uétarhinchasïnga tiempu ka uinhapikua parachi uánikua máteru ambe úni, jimbokachi uétarhinchasïnga kʼumanchikua ma, tʼirekua, xukuparhakua, jorhenguarhini, ánchikuarhini ka tsípikuarhini, ka ístu máteru ambe. Peru Tata Diosïiri Reinueri ambe inde jindeesti sánderu jukaparhakua ambe (1 Kor. 7:29-31). Engachi méntkisï újka ini ambe, nóchi jurajkuaka eskajtsïni ójkutaaka ambe ma parachi úni ambe enga sánderu jukaparhakueka: enga jindeeka Tata Diosï Jeobani marhuakuni. Engachi úraaka ini prinsipiuni tsípekuarhitecharhu, nóchi uaaka imani ambe enga no sési jauaka ka kánikuajtsïni sési nicheati.
12. ¿Nénajtsïni uaa jarhuatani ambe enga uandajka Lukasï 14:28 parachi úni tsípikuarhini?
12 ¿Na xánchi tiempu úraa parachi tsípikuarhini? Parachi úni sési erakuni, ma jatsisti para uaxakani ka “kuenta pʼikuni” (Luk. 14:28). Ísïisti, jatsiskachi para exeni na xánchi tiempu úraua parachi tsípikuarhini ka exeni sini sési jaua parachi ini ambe úni. Engachi exeaka eskajtsïni i ambe uaaka ójkutani para jandiajku jorhenguarhini, familieri jorhenguarhikua jingoni, nirani tánguarhikuecharhu ka aianhpini, jiájkani i jindeesti ambe ma enga no jukaparhakueka (Mar. 8:36). Peru engachi exeaka eska jindeeska tsípikuarhita ma engajtsïni uinhaperantaaka ka engajtsïni jurajkuaka orheta peeraani Tata Diosïiri Reinuni, jiájkani sésichi úrani jauaka tiempuni.
¿Nérini pámbetaa?
13. ¿Andisï sési jaki exeni nénchi jingoni tsípikuarhia?
13 Máteru kurhamarhikua engachi jatsika para kurhamarhikuarhini jindeesti: “¿Nérini pámbetaa parani tsípikuarhini?”. Kánikua jukaparhakuesti míteni né jingonchi kúnguarhia, jimbokajtsïni tsípekuarhitecha uinhaperantaaka engajtsïni ístu juchaari amiguecha uinhaperantaaka. Jimboka ísïiska eska tʼirekua ma engachi máteruecha jingoni tʼirejka sánderu áspemuntasïnga, ka tsípikuarhita sáno májkueniisti, ma kánikua sési pʼikuarherasïndi enga ambarhati amiguecha jingoni jarhajka. Jimbosï iáminduecha tsitijti ka sánderia tumbiicha, máteruecha jingoni tsípikuarhini. Para ma úni tsípikuarhini jatsisti para ambarhati amiguechani erakukuarhini ka no kúrhiani imeechani jingoni engajtsïni no kánikua jarhuataaka (2 Cró. 19:2; arhinta je Proverbios 13:20; Sant. 4:4).
14, 15. a) ¿Ambe ambakiti ejemplu íntskuspi Jesúsi para erakuani amiguechani? b) ¿Ambe kurhamarhikuecha jatsiski para úkuarhiani engachi uékaaka erakuani juchaari amiguechani?
14 Parachi erakuani juchaari amiguechani sési jauati eskachi májkueni uaaka eska Jesúsi. Desde enga ueenaka kueraani iámindu ambe, ima méntkisï xénchauasïndi kʼuiripuechani (Pro. 8:31). Ka enga Echerirhu jámani japka, méntkisï sési kaaspti iámindu kʼuiripuechani (Mat. 15:29-37). Peru ima sési mítespti ambeespi sési kaani máteruechani ka ambeespi meru sési pájperani máteruecha jingoni. Iáminduecha jingoni sési pájperasïreendi peru sánderu sési pájperasïreendi imeecha jingoni engaksï ambe ma ueenga. ¿Ambeespi? Ima ambe enga arhiapka imeeri onse apostoliicha engaksï no méni jurajkuapka: “Engajtsï úska ambe engaksïni ji arhijka, chájtsï juchiiti amigueuaka” (Juanu 15:14; ístu exe je Juanu 13:27, 30). Xarharasïndi eska Jesúsi imeechantkusï jiókuarhienga komueska imeeri amiguecha engaksï imeeri chúxapatichepka ka engaksï Jeobani marhuakuenga.
15 Indeni ambesï jindeeti engachi jucha jatsika para úni. Parachi exeni sini nema uaa juchaari amigueni ju je kurhamarhikuarhini: “¿Xarhatasïni imeeri uandakuecha ka úkuecha jingoni eska kurhajchasïnga Jeobaeri ka Jesúsiiri juramukuechani? ¿Jakajkusïni ambe enga Biblia jorhentpijka ísï eskani ji? ¿Uaarini jarhuatani parani no méni jurajkuni Jeobani ka orheta peerani Tata Diosïiri Reinuni?”. Engachi mókuntaska ini kurhamarhikuechani eska jo, uaakachi seguru jarhani eska i kʼuiripu ambakiti amigueuaka engachi uékaaka tsípikuarhini (arhinta je Salmo 119:63; 2 Kor. 6:14; 2 Tim. 2:22).
Ju je exeni sini sési jarhaski juchaari tsípekuarhitechani
16. ¿Nénachi uaa míteni sini sési jarhaski tsípekuarhitechani engachi uaajka engachi tiempu jatsiaka?
16 Exeskachia tanimu ambe engachi újka úni engachi tiempu jatsijka: náki tsípekuarhitechanchi erakuasïni, kánchi uaasïni ka néni jingonchi uaasïni. Parajtsïni marhuacheni tsípikuarhitani jatsisti para sési terukuntani Biblieri juramukuechani jingoni ka ístu tanimu puntuechani engachi exeakia. Ante dechi erakuni úni ambe ma jatsiskachi para ini ambe exeni: ¿Ambe ka ambeeski? Jatsiskachi para exeni eska no jauaka ambe ma enga no sési jaka para kristianu ma (Pro. 4:20-27). ¿Kánchi uaua? Nóchi uaaka jurajkuni eskajtsïni kánikua tiempu euaka (1 Tim. 4:8). ¿Néjtsïni pámbetaa? Nóchi jatsiska para kúrhiani imeecha jingoni engajtsïni no jarhuataaka (Ecl. 9:18; 1 Kor. 15:33).
17, 18. a) ¿Nénachi uaa míteni sini sési terukuntasïni Biblieri juramukuecha jingoni imani ambe jingoni engachi tsípikuarhijka? b) ¿Ambe jatsiski para úni mándani kristianu enga uékaaka tsípikuarhini?
17 Engachi exeaka eska tsípikuarhita ma no terukuntasïnga ini ambe jingoni ambe, káni ka né jingoni, jiájkani no sési jauati. Peru engachi exeaka eska sési terukuntasïnga tanimu ambe jingoni engachi exeakia, uaakachi seguru jarhani eskajtsïni ima tsípikuarhita marhuacheaka ka eska kʼéri ambe arhinhaaka Jeobani (Sal. 119:33-35).
18 Ísïisti, engachi uékaaka tsípikuarhini, ju je méntkisï asegurarikuarhini ambe engachi jatsika para úni, kánchi jatsika para úni ka nénchi jingoni. Ju je méntkisï mintsita jingoni úni i ambe enga Biblia arhijka: “Engajtsï tʼireni jámaaka, engajtsï itsïmani jámaaka o ambe uéjkijtsï úni jarhani, ú je iámindu ambe paraka Tata Diosï kʼéri ambe arhinhaaka” (1 Kor. 10:31).
¿Ambejtsï mókuntapirini?
Engachi uékaaka tsípikuarhini, ¿nénachi uaa úrani prinsipiuechani engaksï ini tekstuechani jimbo jaka?
• Proverbios 13:20
[Ilustrasioni]
✔Ambe
[Ilustrasioni]
✔Káni
[Ilustrasioni]
✔Né
[Imajeni]
¿Nénajtsïni jarhuatasïni Jesúsiiri ejempluni parachi erakuani juchaari amiguechani ka tsípekuarhitechani?