Ju je sési úrani libruni, ¿Ambemindusï jorhentpejki Biblia?

Seguni eska estudianti ma na jorhenguarhipani jarhajka Bibliaeri ambe ka úrani imeri irekuarhu, uénasïndi xarhatani eska kʼuiripexaka Jeobaeri ambe jingoni (Sal. 1:1-3). Engachi sési úraska ambe enga xáni jukaka libru, ¿Ambemindusï jorhentpejki Biblia?, uákachi jarhuatani para sánderu kʼuiripeni.

Uénakuarhu anapu kurhamarhikuecha. Mándani kapitulu, uénasïndi kurhamarhikuecha jingoni engaksï jorhenguarhikuarhu mókukuarhintajka. Uákachi uáni kurhamarhikuechani, peru no paraka estudiu mókuntauaka, sino paraka uékaka mítini informasioni. Máteru ambe engachi uáka úni, jindesti kurhakuni eska uandaaka máru ambe kurhamarhikuecheri. Jamberi uandaati ambe ma enga no sési jauaka, peru no uétarhisïndi seguirini arhini eska no sési jarhaska, jimbokajtsïni i ambe jarhuataaka exeni ambe uétarhia sánderu explikarini estudiurhu (Prov. 16:23; 18:13).

Apendisi. Enga estudianti kurhangukia informasioni kapitulueri, uákachi arhini eska jandiajku arhintaaka apendisini. Ka engachi niuaka pʼorhembintani, uákachi úkuani máru kurhamarhikuechani para exeni abersieka kurhanguka iámu ambe. Peru enga uétarhiaka, ju je arhutani máru minutuechani estudiurhu parachi exeni imani jingoni iámu apendisini o ma parti. Uákachi arhiantani párrafuechani ka uáni máru kurhamarhikuechani engachi preparariuakia.

Rekuadru miántskueri. Mándani kapitulu kʼamarasïndi rekuadru ma jingoni para miántani, nani engaksï jaka mókuntskuecha uénakuarhu anapu kurhamarhikuecheri. Engachi repasariska estudianti jingoni, exeakachi sini kurhanguskia imani ambe enga sánderu jukaparhakueka ka sini uá explikarini. Engachi na márku exeauakia mókuntskuechani ka textuechani rekuadrueri, pʼímarhiakachi eska úrauaka ini textuechani para explikarini andisï ima ambe enga rekuadrurhu jaka ísïi (Uku. 17:2, 3).