Nénachi uaa jarhuajpeni enga no sési ambe úkuarhijka

Iásïksï sánderu uánikua desastre naturaliicha úkuarhisïndia. Jiáni enga desastre naturali ma úkuarhijka, uétarhisïndi eska sési organisadu jauaka ambe enga úkuarhiaka para jarhuajpeni ka eskaksï iáminduecha májku kʼéri ánchikuarhiaka. Jimbosï Grupu enga Orhejtsïkuajka iámindu kúnguarhikuechani uandati eska iámindu Beteliicharhu jauaka Departamentu ma para Jarhuajpeni enga desastre naturali ambe úkuarhiaka.

Engaksï erachiicha engaksï ini departamentu jimbo jaka mítejka eska desastre ma úkuarhiska, sóntkuksï uandajpaasïndi jima anapu orhejtsïkutiichani nani enga no sési úkuarhika paraksï míteni ambeksï uétarhinchaxaki aianhpiriicha. Enga kánikua no sési ambe úkuarhijka engaksï jamberi aianhpiriicha no uaaka jandiajku orhepani uérani, Beteli jirinhauati máru erachiichani engaksï sési jorhendakata jaka paraksï ini ánchikuarhitani úni, paraksï orhejtsïkuni ambe enga xáni únhaaka para jarhuajpinhani. Jamberiksï i erachiicha kurhajkuarhiati eskaksï máteru erachiicha jarhuatauaka o eskaksï íntspiaka máru ambe enga meru uétarhini jauaka o jamberi piánksï ka etsakuni máru ambe enga uétarhini jauaka.

Uánikua ambe jimbo sánderu sési jarhasti ísï organisarini ini ambe. Jimboka engaksï erachiicha imeecheeri kuenta jimbo uékapiringa jarhuajpeni, jamberi inde ambe úpirindi úni eska sánderu kánikua ánchikuarhita japiringa, eskaksï no mítepiringa ambe engaksï jatsika para úni ka eska ísku ambendurhikuarhipiringa sentabu ka materiali ambe.

Erachiicha enga Beteli erakuauaka uaatiksï uandani na xáni sentabu uétarhia ka namunksï erachiicha uaa nirani jarhuajpeni. Ístuksï uaati uandajpaani jima anapu autoridadiichani enga desastre naturali ambe úkuarhika, jimboka sáno méntkisï jarhuatasïndijtsïni parachi úni sánderu kókuani jarhuajpeni. Ísï jimbo, engajtsï no ma ambe arhinhaaka, kurhachesïngaksïni eskajtsï no jámaaka chaari kuenta jimbo sentabu ambe tánani, axani ambe ma, níjtu nirani jima enga no sési ambe úkuarhika.

Ísïisti, kánikuachi xénchaasïnga juchaari erachiichani, ísï jimbo enga no sési ambe úkuarhijka, uékasïngachi úni ambe ma para jarhuataani (Eb 13:16). Jiájkani, ¿ambechi uaa úni? Ambe enga sánderu jukaparhakueka, jindeesti kómarhijpikuani imeechani engaksï no sési ambe úkuarhinchaka ka ístu imeechani engaksï jarhuajpeni jaka nani enga no sési úkuarhika. Ístuchi uaaka donasioniichani íntspiani para ánchikuarhita enga iámu parhakpinirhu úkuarhijka. Grupueri jarhuajperata jingoni enga Orhejtsïkuajka iámindu kúnguarhikuechani, Beteliichaksï sánderu sési mítesti nani ka néna úrani sentabu ka máteru ambe engaksï erachiicha íntspijka para jarhuajpeni. Ka engachi jucha uéjka aiakukuarheni parachi jarhuajpeni uaakachi uininharhitani Solicitud de voluntario local de diseño y construcción (DC-50).

ENGAJTSÏ EXEAKIA BIDEUNI KʼÉRI IORHENTPERAKUA MA ÚKUARHISTI BRASIL, MÓKUNTA JE INI KURHAMARHIKUANI:

¿Ambejtsï sánderu tsitiski ima ambeeri engaksï Jeobaeri testiguecha úka paraksï jarhuajpeni ísï tátsekua enga iorhentpepkia Brasil?