¿Ambechi jatsiski para úni parachi úni irekani jimbanhi parhakpinirhu?

Máteru jorhenguarhikuarhuchi jorhenguarhiska eska nóteru ióni jimbo Tata Diosï kʼamajkuaka kʼuiripu no sési úrichani ka iámindu uandanhiatechani. ¿Andichisï seguru jaki eska ísï uaaka? Jimboka Tata Diosïri Karakata aiatspesïnga:

“Parhakpini kʼamaraati” (1 JUANU 2:17).

Joperu ístuchi seguru jarhaska eskaksï jauaka kʼuiripuecha engaksï tsípiti pakaraaka, jimboka i mismu karakata uandasïnga:

“Ima enga újka eska [Tata] Diosï na uékajka méntkisï irekaati”.

Parachi úni tsípiti pakarani jatsiskachi para kurhajchani Tata Diosïni. Joperu, parachi úni kurhajchani orhetachi jatsiska para míteni.

PARACHI ÚNI TSÍPITI PAKARANI JATSISKACHI PARA MÍTENI TATA DIOSÏNI

Uánikua imajenicha: 1. Enfermera ma enga kánikua kuátaratini jaka, ospitalirhu jarhasti uaxanditini. 2. Enga jamberi mintsikuarheni jaka, exesïndi imeeri kompanierani enga rebista ma arhintani jaka ka enga tsípini jaka. 3. Imeeri kompaniera arhikuntasïndi Biblieri bersikulu ma ka tarjeta ma íntskusïndi para jw.org jimbo inchani.

Tata Jesukristu uandaspti: “I jindeesti tsípikua para méntkisï, eskaksïni míteaka tʼun[gini] engari tʼujku jindeeka Diosï engari sési jimboeka” (Juanu 17:3). Parachi úni tsípiti pakarani enga kʼamajkunhaaka i parhakpini ka irekanchi para méntkisï, jatsiskachi para míteni Tata Diosïni. No nomasi uétarhisïni míteni eska ima jarhaska ka máru ambejku míteni imeeri ambe. Jatsiskachi para imeeri amigueni. Ka engachi jucha uéjka amigu úkuarhini nema jingoni, jatsiskachi para tiempu úrani para imani jingoni jarhani. Májkuenisti Tata Diosï jingoni. Ju je exeni máru ambe enga Biblia jorhentpijka engajtsïni jarhuataaka ambakiti pájperakua ma jatsini Tata Diosï jingoni.

Ambe enga Biblia jorhentpijka

Tata Diosï méntkisï uékasti eskachi jucha paraisurhu ma irekaaka.

Tata Diosï kueraauasti orheta kʼuiripuechani, Adáni ka Ebani ka sési jásï lugari ma jimbo ireraaspti enga arhinhenga jardini de Edéni. Nóksï ma pekadu jukaraspti ka Tata Diosï íntskuaspti ambe engaksï xáni uétarhinchapiringa paraksï tsípikua jingoni irekani. Úpirindiksï irekani para méntkisï engaksï seguiripiringa Tata Diosïri amigueni. Joperu nóksï ísï úspti, nóksï kurhajchaspti ambe enga Tata Diosï arhiapka eskaksï úpiringa.

Andichisï jatsiajki problemechani ka kómu nitamakuarhini.

Enga Adáni no kurhajchapka Tata Diosïni, tsïtakuarhispti kánikua ambakiti ambe: irekani para méntkisï, ima ka iámindu kʼuiripuecha. Biblia uandasïndi: “Ísï jimbo, eska pekadu na juka parhakpinirhu máechakua kʼuiripuni jimbo ka pekaduni jimbo uarhikua ka ísï uarhikua pakarani para iámindu kʼuiripuecha” (Roma 5:12). Májkueni eska taati ma na újka kéritaani pʼamenchakua ma imeeri uájpeechani, Adániri uájpeechajtuchi kérikuarhiska pekaduni. Ísï jimbochisï iáminduecha tʼarhepijka ka uarhini.

Tata Diosï ústia ambe ma parajtsïni jarhuatani.

Biblia uandasïndi: Tata “Diosï xáni uéasti parhakpini anapuechani, ísï jimbosï íntspiti imeeri máechakua Uájpani paraka nákinterku nema enga imani jakajkuaka, no tsïnchiaka sino jatsini tsípikua para méntkisï” (Juanu 3:16). Tata Diosï axasti tata Jesukristuni para uarhini juchantsïni jimbo. Prabhakari India anapu ma acheeti enga 86 jatirikia, eratsentasïndi ambe enga Tata Diosï úka ka uandasïndi: “I amberini xarhatachesïndi eskarini Tata Diosï Jeobaa kánikua xénchasïnga. Imeeri uékperakua úsïndi eskani ji uaaka irekani para méntkisï”.

Uaakachi xarhatakuni eskachi agradeserikusïnga Tata Diosïni ambe enga xáni úkua juchantsïni jimbo.

Biblia uandasïndi eskachi uaaka xarhatakuni Tata Diosïni eskachi agradeserikusïnga ambe enga ima úka juchantsïni jimbo “engachi újka eska imajtsïni na juramuchijka” (1 Juanu 2:3). Tata Diosï Jeoba uékperakua jingontsïni jorhendasïndi ambe engachi jatsika para úni parachi úni sési irekuarhini iásï (Isaías 48:17, 18, nota). Tata Diosï no uékasïndi eskachi kómu nitamakurhiaka ka jimbojtsïnisï aiachijti eskachi uaaka sési irekani iásï ka irekani para méntkisï engachi ísï uaaka eskajtsïni ima na juramuchijka.

JU JE PAUANI PAUANI ARHINTANI BIBLIANI

Enfermera auandarhu eranchesïndi enga na arhintajkia Biblia jiáni enga mintsikuarhini jarhajka. — Uaakachi tsípiti pakarani enga kʼamajkunhaaka i parhakpini engachi jarhuajperata kurhakuska Tata Diosïni ka engachi úska ambe enga ima tsitijka.

Parachi úni irekani, jatsiskachi para pauani pauani tʼireni. Joperu tata Jesukristu uandaspti: “No solu kurhinda jimbojku uaati irekani ma kʼuiripu, sino iámindu uandakua jimbo enga [Tata] Diosï uandaka” (Mateu 4:4).

Ambe enga Tata Diosï Jeoba uandajka Bibliarhu karakata jarhasti. Engachi na jorhenguarhipani jarhajka i pímbinhasï libruni, jorhenguarhisïngachi ambe enga Tata Diosï úpka ióntki, ambe enga úni jaka iásï ka ambe enga uaaka sánderu orhepani.

JU JE JARHUAJPERATA KURHAKUNI TATA DIOSÏNI

¿Ambechi uaa úni engachi uéjka kurhajchani Tata Diosïni joperuchi úkua jukanchani jurajkuni imani ambe enga ima no jaiapanhentajka? Enga ísïika, kánikuajtsïni jarhuataati sési míteni Tata Diosïni.

Ju je exeni ambe enga úkuarhinchapka uarhiiti ma engachi Sakura arhiraaka. Ima ísku jándikua ambe niátasïreendi, joperu enga ueenapka jorhenguarhini Bibliani, jorhenguarhispti eska Tata Diosï juramusïnga: “Késtakuku je ísku jánguani” (1 Korintu 6:18). Sakura kurhakuspti Tata Diosïni eska uinhapikua íntskupiringa ka úspti mójtakuni imeeri irekuani. Joperu útasï jánguarhintasïndi para úni orhepani uérakuni ini tsʼéjkukuani. Ima uandasïndi: “Engani ísku jándikua ambe eratseni jarhajka, aiangukuarhisïnga Tata Diosï Jeobani ambe engani pʼikuarherani jarhajka, jimbokani míteska eskani ji no uaaka jandiajku orhepani uérakuni ini tsʼéjkukuani. Kómarhikuarini jarhuatasti sánderu andarhierani Tata Diosï Jeobani”. Májkueni eska Sakura, uánikua kʼuiripuechaksï mítexati Tata Diosïni ka ima uinhapikua íntskuaxati parakaksï imeecha uaaka mójtakuni imeecheri irekuani ka paraksï ísï irekani eska ima na uandajka (2 Korintu 4:7).

Engachi sánderu sési míteska Tata Diosïni imajtujtsïni sánderu sési míteati juchantsïni ka ísïjtsïni exeati eska imeeri ambakiti amigu ma (Galasia 4:9; Salmo 25:14). Ísïchi uaaka tsípiti pakarani enga i parhakpini kʼamajkunhaaka ka uaakachi irekani jimbanhi parhakpinirhu enga Tata Diosï aiatspeni jaka. ¿Ka néna irekanhaa jimbanhi parhakpinirhu? Máteru jorhenguarhikua jimbochi exeaka i ambe.

a Biblia uandasïndi eska Tata Diosï arhinhasïnga Jeoba.