1921 Sieni uéxurhini nitamastia

REBISTARHU La Atalaya 1 de enerueri enga 1921 jimbo uérapka inglesi jimbo, ini kurhamarhikua úkuaspti imeechani engaksï arhintenga ini rebistani: “¿Náki jindeeski jiájkani ánchikuarhita engachi jatsika para úni ini uéxurhini?”. Para mókuntani, uandasti ambe enga arhijka Isaías 61:1, 2, para miátantaani eskaksï jatsispka para aianhpini: “Jeoba jíndeni erakus[ti] parani ambakiti ambe aianguani kaxumbitichani; [...] parani uandantani uéxurhini enga Jeoba jaiapanhentaka ka jurhiatikuani enga juchaari Tata Diosï no sési útspintaaka”.

AIANHPIRICHA ENGAKSÏ NO SÁNI CHÉENGA

Para úni ini ánchikuarhitani, Biblieri Jorhenguarhirichaksï jatsipirindi para no chéni. Aianguapirindiksï ‘ambakiti aianhperakuani kaxumbitichani’, ka ístu eska Tata Diosï ‘no sési úkuapiringa no sési úrichani’.

Erachi ma enga Canadá irekapka enga John Hoskin arhinheenga, no sáni chéparini aianhpispti nájkiruka no sési kánhenga. Enga na ueenapka uéxurhini 1921, uandontskuarhespti kʼuiripu ma jingoni enga metodistepka ka ueenaspti arhini: “Jatsipiringachi para iatsitakuarhu uandontskuarheni Biblieri ambe, engachi ambe ma jimbo no terukutaska, úpiringachi jima jamberi jurajkuni no ikiaparini ka ísïchi pakatperani komueska amiguecha”. Joperu no ísï úkuarhispti. Erachi Hoskin uandantaspti: “Apenasichi ma ratu uandontskuarhespka enga ima xáni uinhamu míkantapka puertani, engani ji eratsepka eska kʼependurhipiringa puerteri bidriuni”.

Ima kʼuiripu uinhachaparini arhispti: “¿Andirisï no nirajki uandontskuarhekuani imeechani engaksï no jakajkujka tata Jesukristuni?”. Erachi Hoskin, no ma ambe uandaspti. Joperu enga na níntani japkia, eratsespti: “¡Ji uandaspka eskani indeni ambesïni úni japka!”.

Joperu no jimini kʼamakurhispti, ísï pauandikua enga ima kʼuiripu arhijtsïkpini japka, no sési jásï ambe uandaspti erachi Hoskiniri ambe. Erachi miásïndi: “No sési jásï ambe arhiaspti juchiiti ambe imeechani engaksï imeeri iglesiarhu tánguarhienga. Arhiaspti eskani ji kʼéri chkuandera máespka imani ireta jimbo ka eskani jukanchaspka parajtsïni uándikuni”. Joperu erachi no no sési pʼikuarheraspti ini ambe jimbo. Ima seguirispti aianhpini ka uánikua kʼuiripuecha jingoni uandontskuarhespti. Ka ístu erachi uandantaspti: “No méni xáni sési pʼikuarheraxapka aianhpini. Máru kʼuiripuechajtsïni niáraspti jamberi arhini: ‘Míteskachi eskari Tata Diosïni marhuakusïnga’ ka kurhamarhisptijtsïni nénajtsïni úpirini jarhuatani parani ji no ma ambe uétarhinchani”.

MÁERI JORHENGUARHIKUA KA FAMILIERI JORHENGUARHIKUA

Para jarhuataani kʼuiripuechani sánderu sési kurhanguni Bibliani, Biblieri Jorhenguarhirichaksï petaspti programa ma enga kurhamarhikuechani uáuenga Biblieri ka enga mókuantauenga indeni kurhamarhikuechani rebistarhu enga iásï ísï mítekateka komu ¡Tsínharhi! Íksï kurhamarhikuecha jindeesïreendi paraksï tumbiicha imeecheri taaticha jingoni exeani. Taatichaksï jatsispti para ini kurhamarhikuechani úkuani ka jarhuataani exeantani mókuntskuechani Bibliarhu. Ari járhati kurhamarhikuechani komu, “¿Namuni libruechaksï jataski Bibliarhu?”, jorhendasïreendi ambe ma enga no úkua jukaka kurhanguni. Ka máteru kurhamarhikuecha komu “¿Iámindu kristianuechachi jatsiski para no sési kánhani?”, jarhuatasïreendi tumbiichani paraksï balori jingoni aianhpini.

Ístuksï jarhaspti kurhamarhikuecha Biblieri ambe ka mókuntskuecha inde kurhamarhikuecheri para imeecha engaksï sánderu mítepkia Biblieri ambe. Mókuntskuechaksï primeru librurhu jarhasti enga arhinhajka Estudios de las Escrituras. Uánikua kʼuiripuechaksï uánikua ambe jorhenguarhispti ini kurhamarhikuecha jingoni. Joperu ísï tátsekua, uandanhaspti eskaksï nóteru uérapiringia. ¿Andisï ísï únhapi?

JIMBANHI LIBRU MA

Libru *El Arpa de Dios* inglesi jimbo.

Tarjeta enga uandeenga nani enga arhikuarhintapiringa libru.

Tarjetecha kurhamarhikuecha jingoni.

Erachicha engaksï orhejtsïkuenga kúnguarhikuani, kuentaksï íntskukuarhespti eskaksï kʼuiripuecha engaksï apenasi ueenani japka jorhenguarhini, uétarhinchasïrengaksï temecha jimbo jorhenguarhini Bibliani. Ísï jimbo, nobiembrini 1921 jimbo, petasptiksï libruni The Harp of God (uéxurhini 1925 jimbo petanhaspti turhisï jimbo ka arhinhasïndi El Arpa de Dios). Ima kʼuiripuecha engaksï jiókuarhienga ini libruni, apuntarinhasïrendiksï para jorhendaani Biblieri ambe ka i jorhenguarhikua arhinhasïreendi The Harp Bible Study Course. Ini jorhenguarhikua jingoni enga kʼuiripu ueenga jandiajku jorhenguarhini, jarhuatasïreendi paraksï kurhanguni ambe enga “Tata Diosï eratsetini jaka para újchakurani kʼuiripuechani tsípikua jingoni para méntkisï”. ¿Néna úkuarhisïreni?

Enga kʼuiripu ma jiókuarhienga libruni, ístu intsïnhasïreendi tarjeta ma enga arhienga nani enga ueenapiringa arhintani libruni. Máteru semana jimbo intsïnhasïreendi máteru tarjeta, máru kurhamarhikuecha jingoni engaksï ima amberi uandeenga enga kʼuiripu arhintengia ka ístu, ima tarjeta arhisïreendi náki pájinechani arhiantapirini máteru semana.

Kúnguarhikua ma enga no xáni iauani jarhenga, mándani semana axakusïreendi jimbanhi tarjeta ma jorhenguarhirini korreu jimbo astaka na andangutenga 12 semana. Sáno méntkisï, ini tarjetechanksï ima erachicha axasïreendi engaksï jatiriengia o engaksï no ueenga uérani aianhpini. Pori ejemplu, Anna Garner enga Millvale (Pensilvania, Estados Unidos) anapueka, miántasti: “Enga uérapka i libru, jarhuataspti juchiiti jingonikua Thayleni enga no ueenga xanharani paraka úpiringa sánderu aianhpini, jimboka iásï úsïrengia axaani mándani semana tarjetechani kurhamarhikuecha jingoni”. Enga jorhenguarhiri kʼamarengia ini jorhenguarhikuani, erachichaksï nirasïreendi pʼorhembini paraksï sánderu ambe jorhendani Biblieri ambe.

Thayle Gardner siia de ruedasi ma jimbo jarhasti.

ÚTASÏ KÁNIKUA ÁNCHIKUARHITA JARHASTI PARA ÚNI

Enga na kʼamarapkia uéxurhini, erachi Joseph Rutherford karta ma axakuaspti iámindu kúnguarhikuechani. Ini karta jimbo erachi uandaspti: “Reinueri aianhpikua enga úkuarhika ini uéxurhini, sánderu kánikua aianhpinhasti ka sánderu uánikua kʼuiripuechanchi jarhuataska eska náki uéjki uéxurhini jimbo engachi aianhpikia”. Ka eratseparini ambe enga úkuarhipiringa sánderu orhepatini uandaspti: “Útasï kánikua ánchikuarhita jarhasti para úni. Pʼímarhia je máteruechani parakaksï ístu uaaka ini xáni ambakiti ánchikuarhitani”. Xarharasïndi eskaksï Biblieri Jorhenguarhiricha kurhajchaspka erachini, jimboka 1922 jimbo, sánderuksï aianhpispti Tata Diosïri Reinueri ambe no sáni chéparini.

Amiguecha máru engaksï no sáni chépka

Biblieri Jorhenguarhirichaksï xarhataspti uékperakua engaksï jarhuajperapka. Balori jingonksï jarhuajperaspti “jiáni enga uandanhiata japka”, ísï eska na xarhatajka ari eksperiensia (Prov. 17:17).

Martesï 31 de maiu 1921 jimbo, tataka ma enga turhipitipka enga ireta Tulsa (Oklahoma, Estados Unidos) irekapka, ónhanhaspti jimboka arhinhaspka eska no sési kámaspka nanaka urapitini ma. Ísï tátsekua, jukari 1,000 kʼuiripuecha engaksï urapitipka, ueenasptiksï uarhiperani sánderu namunitu kʼuiripuecha jingoni engaksï turhipika, uarhiperata niáraspti Greenwood jima engaksï sánderu ima kʼuiripuecha irekapka engaksï turhipipka. Jimini, jukari 1,400 kʼumanchikuecha ka negosiecha jimboksï inchatspispti ka kurhiraasptiksï. Uandanhaspti eska ini uarhiperakua jimbo 36 kʼuiripuecha uarhispka, joperu jamberiksï sáno 300 kʼuiripuechepti engaksï uarhipka. Tátsekua i uarhiperakua niáraspti ísï mítekateni komueska Masacre Racial de Tulsa.

Erachi Richard Hill, Biblieri Jorhenguarhiri ma enga turhipitipka ka enga Greenwood irekapka, uandantaspti ambe enga úkuarhipka: “Ima chúrikua enga ueenapka uarhiperanhani, jucha tánguarhikua jatsispka kúnguarhikua jingoni ísï eska méntkisï. Enga kʼamarapkia tánguarhikua, ueenaspkachi kurhaani eska pistola chararanhaxapka iretarhu sentrurhisï, ka iauani chúrikua jamberi ísï kurhakuarhispti. Pauandikua 1 de juniuni, útasï sánderu no sési jánhaskuarhispti. Máru kʼuiripuechaksï jurhaspti juchiniu ka arhisptijtsïni eska engachi uékapiringa kuájchakukata jarhani, jatsipiringachi para sóntku nirani auditoriurhu enga gobiernu jatsipka”. Ísï jimbo, erachi Hill, témba ka imeeri sinko uájpeecha, nirasptiksï sïpakuarhini imani auditoriu jimbo enga Tulsa japka. Jima Guardia Nacional, enga gobiernu axapka paraka nóteru uarhiperanhapiringia, jiókaaspti sáno 300 kʼuiripuechani engaksï turhipitipka para kuájchakuani.

Sáno ima mismu tiempu jimbo, erachi Arthur Claus enga urapepka, no sáni chéparini úspti ambe ma. Uandantasïndi: “Engani kurhaapka eskaksï máru kʼuiripuecha inchaakutspixapka ka kurhiraani kʼumanchikuechani jini Greenwood, eratsespka nirani parani exeni néna jarhaspi juchiiti amigu, erachi Hill”.

Arthur Claus jorhendaaspti Biblieri ambe jukari 14 tumbi sapirhatichani úraparini libruni El Arpa de Dios.

Engani niárapka imeeri kʼumanchikuarhu, jima jarhaspti erachiri besinu ma enga urapepka ka enga karabina ma kámani japka. Ima besinu enga ístu erachi Hilliiri amiguepka, eratsespti eska Arthur ístu inchatspini jámaxapka ka kʼumanchikuechani kurhiraani ka uinhachakuspti: “¡¿Amberi úxaki jimini?!”.

Arthur miásïndi: “Engani ji arhipiringa ambe ma enga ima no tsitipiringa, seguru jarhaspka eskarini karabina jingoni kʼuanirapiringa. Arhispka eskani jíjtuni erachi Hilliiri amigu jémbeespka ka eskani mémindu niraspkia pʼorhembini”. Arthur ka ima besinu úsptiksï kuájchakuni erachi Hilliiri kʼumanchikuani paraka no nema inchaakupiringa sïpani.

Arthur kuenta íntskukuarhespti eska erachi Hill ka imeeri familia auditoriurhu jarhaspka. Arhisptiksï eskaksï kʼuiripuecha engaksï turhipipka, noksï úpiringa jima uératini uéntani engaksï no kámani japiringa sïranda ma enga generali Barret firmaripiringa, ofisiali ma enga sánderu juramukua jatsipka. Arthur uandantaspti: “Úkua jukaspti uandontskuarheni imani generali jingoni. Engani arhipka ambe engani eratseni japka úni, kurhamarhisptirini: ‘¿Tʼuri exea ini familiani ka ambe enga uétarhinchaaka?’ Ji kánikua tsípikua jingoni arhispka eska jo”.

Imani sïranda jingoni Arthur sóntku niraspti auditoriurhu. Enga na niárapkia jima exeraspti ofisialini ma ka ima uandaspti: “¡I sïrandani generali firmaristi! ¿Míteskijtsï eskajtsï chá ueenaka pántani nemani?”. Arthur ka ima ofisiali nóksï ióndaspti exentani erachi Hilliini ka imeeri familiani. Iáminduechaksï jataspti Arthurueri karrurhu ka nirasptiksï erachi Hilliiri kʼumanchikuarhu.

Erachi Claus jingontku jarhasïreendi paraka erachi Hill ka imeeri familia kuájchakutaka japiringa. Enga erachi Claus ísï no sáni chépka ka xarhatani uékperakua, úspti eskaksï máteruecha ambakiti ambe uandapiringa. Arthur uandaspti: “Ima besinu enga jarhuajpepka paraka no nema inchapiringa erachi Hilliiri kʼumanchikuarhu, sánderu sési exeasïreendia Biblieri Jorhenguarhirichani. Ka uánikua kʼuiripuechaksï uékasïreendi míteni Tata Diosïri Reinueri ambe, jimbokaksï kuenta íntskukuarhespka eskachi jucha sési kámberasïnga na uéjki jásï kolorenchi ka eska Tata Diosïri ireta jimbo iáminduechachi májkueniska”.