“Jíndeni jingondi jauaka Paraisurhu”

1. ¿Ambe arhispi Jesúsi ante de uarhini imani no sési úrini enga imeeri máekandu japka? (Lucas 23:39-43, TNM).

JESÚSI ka tsimani no sési úriicha engaksï imeeri máekandu japka sánhanksï arhixapti uarhini (Luk. 23:32, 33). I tsimani kʼuiripuechaksï teresmarhuxapti Jesúsini ísï jimbo, xarhatasptiksï eskaksï no Jesúsiiri chúxapatiispka (Mat. 27:44; Mar. 15:32). Peru máechakua mójtakukuarhispti. Ka arhispti Jesúsini: “Jesúsi, miántarini sáni engari chiiti Reinurhu jauakia”. Ka Jesúsi mókukuspti: “Iásï, jíkeni sési jimbo arhisïnga: jíndeni jingondi jauaka Paraisurhu” (arhinta je Lucas 23:39-43, TNM). No ma ambe jarhasti enga xarhatajka eska i no sési úri jiókuarhispka ambe enga Jesúsi aianhpini jámapka ʻauandarhu anapu Juramukueriʼ ambe. Ka Jesúsi no méni uandaspti eska i kʼuiripu inchapiringa Tata Diosïiri Reinurhu (Mat. 4:17). Jesúsi Paraisueri uandaxapti enga sánderu orhepatini japiringa ixú Echerirhu. ¿Andichisï ísï uandajki?

2. ¿Ambe xarhatasïni eska ima no sési úri enga móantapka judiuespka?

² Jamberi ima no sési úri enga móantapka judiuepti. I kʼuiripu kurhamarhispti máteru no sési úrini: “¿Andi nóri sáni chénharhisïni Tata Diosïni iásï engari tʼujtu ísï no sési nitamakuarhini jaka?” (Luc. 23:40, TNM). Judiuechaksï májku Tata Diosïni kómarhisïreendi, joperu máteru nasionirhu anapu kʼuiripuechaksï uánikua diosïichani kómarhiasïreendi (Éx. 20:2, 3; 1 Kor. 8:5, 6). Engaksï i no sési úriicha no judiuepiringa, ísï kurhamarhipirindi: “¿Andi nóri sáni chénharhiasïni diosïichani?”. Ístu, Jesúsi no axanhaspti para nasionirhu anapu kʼuiripuechani jirinhantaani “sino solu Israeli anapu karichiichani engaksï tsïnchetini ja[p]ka” (Mat. 15:24). Ka Tata Diosï aianguaspti israeliteechani eska ima tsítantaapiringa uarhiriichani. Ísï jimbo, ima no sési úri enga móantapka mítepti indeni ambe ka ambe enga uandapka xarhataspti eska kurhangusïreenga eska Tata Diosï Jeoba tsítantapiringa Jesúsini para juramuni Tata Diosïiri Reinurhu. Péringa inde acheeti ístu mintsikeenga eska Tata Diosï imantu tsítantapiringa.

3. ¿Ambe eratsepi ima no sési úri enga móantapka enga Jesúsi Paraisueri ambe arhipka? (Génesis 2:15).

³ Enga ima no sési úri enga móantapka judiuepka, mítespti Paraisueri ambe, nani enga Tata Diosï Jeoba irestaapka Adáni ka Ebani. Ísï jimbo, ima eratsepti eska Paraisu enga Jesúsi uandapka sési jásï jardini máepiringa ixú Echerirhu (arhinta je Génesis 2:15).

4. Ambe enga Jesúsi arhipka no sési úrini, ¿ambejtsïni jatsipirini para eratsetarantani?

⁴ Ambe enga Jesúsi arhipka imani no sési úrini, jatsipirindi parajtsïni eratsetarantani néna enga irekanhaaka Paraisurhu. Ma ambe engajtsïni jarhuataaka ísï úni, jindeesti miántani na enga pínandikua jingoni irekanhapka jiáni enga Salomóni juramuni japka. Biblia uandasïndi eska Jesúsi “sánderu kʼéri ambeeska ka eska Salomóni”. Ísï jimbo, uaakachi seguru jarhani eska Jesúsi ka imeecha engaksï imani jingoni juramuaka uaakaksï eska Echerirhu kánikua sési jándeaka (Mat. 12:42, TNM). Ka ístu ʻmáteru karichiichaksïʼ jatsisti para míteni ambe engaksï jatsika para úni paraksï úni irekani para méntkisï Paraisurhu (Juanu 10:16).

¿NÉNA IREKANHAA PARAISURHU?

5. ¿Nénajtsï eranhaskasïni eska irekanhaka Paraisurhu?

⁵ ¿Nénajtsï eranhaskasïni eska irekanhaka Paraisurhu? Jamberijtsï sési jásï parkeni ma eranhaskajka komueska jardini de Edéni (Gén. 2:7-9). O jamberijtsï miájka ambe enga uandajka Mikeasïiri profesia enga arhijka eskaksï Tata Diosïiri marhuariicha uaxandukuaka “jima enga ubasï jukajka ka jima enga jigusï jukajka” (Miq. 4:3, 4). O jamberijtsï miántaajka uánikua tekstuechani engaksï uandajka eska kánikua tʼirekua jauaka (Sal. 72:16; Is. 65:21, 22). Ísï jimbo, jamberijtsï eranhaskajka mesarhu ma jarhani nani enga kánikua tʼirekua jaka ka enga kánikua áspitiika sési jásï jardinirhu ma. ¿Eranhaskasïntsï sïpiruni jarhari na engaksï xáni sési jájkundejka tsïtsïkiicha ka plantecha? ¿Ka eranhaskasïntsï kurhaani jarhani na engaksï tsípikuarhini jaka chaari amiguecha ka familiarhu anapuecha? Jamberiksï máru imeeti engaksï tsíntaka. I ambe no tsánharhikua máesti, meru ísï úkuarhiati Echerirhu. Peru ístu, Paraisurhu ambakiti ánchikuarhita jauati para úni.

6. ¿Ambe ka ambechi xáni uaa Paraisurhu? (Exe je dibujuni).

⁶ Tata Diosï Jeobajtsïni kueraasti parakachi tsitiaka imani ambe engachi ánchikuarhijka (Ecl. 2:24). Enga tata Jesukristu Juramuni jauaka Mili Uéxurhini kánikua úkua jauati. Imeecha engaksï tsípiti pakaraaka kʼéri mískuarhitarhu ka ístu xáni uánikua kʼuiripuecha engaksï tsíntaaka, uétarhinchaatiksï takusï ambe, tʼirekua ka nani engaksï uaaka irekani. Para íni ambe jatsini uétarhiati kánikua ánchikuarhini peruchi kánikua sési pʼikuarheraaka ísï úni. Ísï eskaksï Adáni ka Eba na jatsipka para kuidarini jardini de Edénini, juchajtuchi kʼéri kóntperata jatsiaka para Echerini Paraisu ma úntani. Ístu eranhaska je na engachi tsípini pʼikuarheraaka, jorhendani xáni uánikua kʼuiripuechani engaksï tsíntaaka engaksï sántku jorhenguarhipka Tata Diosï Jeobaeri ambe ka ambe enga ima eratseni jaka úni. Ístuchi uaaka jarhuataani ambakiti Tata Diosïiri marhuariichani engaksï uarhika ante de enga Jesúsi Echerirhu jupiringa parakaksï sánderu ambe jorhenguarhiaka.

7. ¿Ambeerichi uaa seguru jarhani ka andi?

⁷ Uaakachi seguru jarhani eska Paraisurhu pínandikua jauaka, eskachi jatsiaka ambe engachi uétarhinchajka ka eska iámindu ambe sési organisadu jauaka. ¿Andi? Jimboka Biblia uandantasïnga eska sési irekanhaspka jiáni enga Salomóni juramuni japka ka indeni ambe jingontsïni Tata Diosï Jeoba jarhuatasïndi eranhaskani na engachi irekaaka enga imeeri Uájpa juramuni jauakia Echerirhu.

SALOMÓNIIRI JURAMUKUAJTSÏNI XARHATACHESÏNDI NA ENGA IREKANHAAKA PARAISURHU

8. Ióntki, ¿néna niáraspi úkuarhini ambe enga Salmo 37:10, 11, 29 uandajka? (Exe je partini “Ambe enga kurhanguarhijka ima enga arhintajka” enga ini rebista jimbo jaka).

⁸ Tata Diosï Jeoba úspti eska Dabidi karapiringa néna enga irekanhapiringa sánderu orhepatini, jiáni enga ambakiti rei ma juramuni japiringia ka enga kánikua jánhastiika (arhinta je Salmo 37:10, 11, 29). Sáno méntkisï engachi uandontskuarhejka Paraisueri ambe máteru kʼuiripuecha jingoni, arhikuantasïngachi Salmo 37:11. Ka sési jarhasti ísï úni, jimboka Jesúsi indeni karakatani úraspka enga Juátarhu Arhijtsïkpipka. Ísï, xarhataspti eskaksï i uandakuecha sánderu orhepatini úkuarhiaka (Mat. 5:5, TNM). Ambe enga rei Dabidi karapka, ístu xarhataspti na enga irenhapiringa jiáni enga Salomóni juramuni japiringa. Imani tiempu jimbo, israeliteechaksï pínandikua jingonksï irekaspti ka iámindu ambeksï jatsispti engaksï xáni uétarhincheenga imani echeri jimbo enga ʻlechi ka tekolmena japkaʼ. Tata Diosï uandaspti: “Engajtsï seguiriska ísï jámani eskaksï juchiiti juramukuecha na uandajka […], ji uaaka eska pínandikua jauaka paisirhu, ka chájtsï apondiaka ka no ma ambe jauati engajtsï jimbo chéaka” (Lev. 20:24; 26:3, 6). I ambe niáraspti ísï úkuarhini jiáni enga Salomóni juramuni japka (1 Crón. 22:9; 29:26-28). Ka Tata Diosï Jeoba aiakuaspti eska ima kʼuiripuecha engaksï no sési úriipka nóteruksï japiringia (Sal. 37:10). Ísï jimbo, uandakuecha engaksï Salmo 37:10, 11, 29 jimbo jaka, niárasptiksï ísï úkuarhini ióntki ka ístuksï niárati ísï úkuarhini sánderu orhepani.

9. ¿Ambe uandaspi Saba anapu reina Salomóniiri juramukueri ambe?

⁹ Saba anapu reina niáraspti kurhaani na engaksï xáni pínandikua jingoni irekapka israeliteecha ka eskaksï jatsispka iámindu ambe engaksï xáni uétarhincheenga jiáni enga Salomóni juramuni japka. Ima kánikua biajarispti asta Jerusaléni jamberi para ima mismu exekuarhini indeni ambe (1 Rey. 10:1). Enga na exepkia na enga japka Salomóniiri juramukua ima arhispti reini: “Nójtsïni aiangusti ni terujkani jamberi. […] ¡Tsípieksï chiiti achamasïicha ka tsípieksï chiiti marhuariicha, engaksï méntkisï tʼungini jingoni jarhajka ka kurhaasïndiksï chiiti jánhaskakuani!” (1 Rey. 10:6-8). Joperu na enga irekanhapka jiáni enga Salomóni juramuni japka, ejemplujku máespti ima ambeeri enga Tata Diosï Jeoba uaaka kʼuiripuecha jimbo, jiáni enga imeeri Uájpa Jesúsi juramuni jauakia Echerirhu.

10. ¿Andisï Jesúsi sánderu kʼéri ambee eska Salomóni?

¹⁰ Iámindu ambe jimbo, Jesúsi sánderu kʼéri ambeesti ka eska Salomóni. Salomóni no perfektuespti ka kánikua no sési jásï ambe úspti enga niárapka no sési úkuni Tata Diosïiri iretani. Joperu Jesúsi juramuti máesti enga perfektueka enga no méni no sési ambe újka (Luk. 1:32; Ebr. 4:14, 15). Ístu, Jesúsi orhepani uérakuaspti kʼérati tsʼéjkukuechani enga Satanási jatsikukuapka. Tata Jesukristu xarhatasti eska no méni pekadu uaaka ka eska no méni uaaka ambe ma para no sési úkuani imeechani enga ima juramukuauaka. ¿A no eska kʼéri kóntperata máeska enga Jesúsi jindeuaka juchaari juramuti?

11. ¿Neechaksï jarhuataa Jesúsini juramuni?

¹¹ Jesúsi, 144,000 reiichani jatsiauati engaksï jarhuataaka kʼuiripuni kuidarini ka paraka ísï úkuarhiaka eska Tata Diosï Jeoba na uékeenga ixú Echerirhu (Jaŋ. 14:1-3). I juramutiichaksï uánikua uandanhiateechani orhepani uérakuaspti engaksï Echerirhu japka. Ísï jimbo, uaatijtsïni sési kurhanguchini. ¿Nákiua indeecheeri ánchikuarhita?

¿NÁKI ÁNCHIKUARHITANKSÏ UAA ERAKUKATEECHA?

12. ¿Náki ánchikuarhita íntsaua Tata Diosï Jeoba ini 144,000 erakukateechani?

¹² Jesúsi ka 144,000 sánderu ánchikuarhitaksï jatsisti para úni ka eska ima enga Salomóni úpka. I juramuti Israeli anapu namunitku miioni kʼuiripuechankusï juramukuapti ka ma paisi jimbojku. Joperu imeecha engaksï Tata Diosïiri Reinurhu juramuni jauaka, iauani sánderu uánikua kʼuiripuechanksï juramukuauati iámu parhakpinirhu. ¡Tata Diosï Jeoba kʼéri kóntperata ma íntsaasti ini 144,000 erakukateechani!

13. ¿Náki ambakiti ánchikuarhitaksï jatsia imeecha engaksï Jesúsini jingoni juramuaka?

¹³ Májkueni eska Jesúsi, 144,000 erakukateechaksï reiuati ka saserdotiicha (Jaŋ. 5:10). Moisésiiri Lei jimbo, saserdotiicheri ánchikuarhita enga sánderu jukaparhakuepka, jindeespti kuájchakuani kʼuiripuechani paraksï no pʼamenchani ka paraksï sési pájperani Tata Diosï jingoni. Jimboka Lei xarhatasïreenga “sánderu ambakiti ambe enga sánderu orhepani juuaka”, uaakachi uandani eska imeecha engaksï Jesúsi jingoni juramuaka, jarhuatauakaksï kʼuiripuechani paraksï ambakiti ambe jatsini: nóteru pʼamenchania ka sési jarhani Tata Diosïni jingoni (Heb. 10:1, TNM). Ísïisti, útasïchi nótki míteska néna engaksï i reiicha ka saserdotiicha arhiauaka ambe engaksï jatsiaka para úni imeechani enga Tata Diosïiri Reinu juramukuauaka. Joperu néna uéjki enga Tata Diosï Jeoba uaaka ini ambe, uaakachi seguru jarhani eskaksï imeecha engaksï Paraisurhu irekaka arhistaminhaaka ambe engaksï jatsiaka para úni (Jaŋ. 21:3, 4).

¿AMBEKSÏ JATSISKI PARA ÚNI ʻMÁTERU KARICHIICHAʼ ENGAKSÏ UÉJKA PARAISURHU IREKANI?

14. ¿Nénaksï májku k’éri jarhaski ʻmáteru karichiichaʼ namunitu karichiicha jingoni?

¹⁴ Jesúsi uandaspti eska ima grupu enga jingoni juramuaka jindeeskaksï namunitu karichiicha (Luk. 12:32). Ka jarhaspti máteru grupu enga arhiapka eskaksï jindeeska ʻmáteru karichiichaʼ. I tsimani grupuechaksï májku k’éri úkuarhintasïndi (Juanu 10:16). Ka májku kʼériksï ánchikuarhixatia ka seguiriuatiksï ísï úni enga Echeri Paraisu máeuakia. Para jiánisï namunitu karichiichaksï auandarhu jauatia ka ʻmáteru karichiichaksïʼ uaati irekani para méntkisï ixú Echerirhu. Joperu jarhasti máteru ambe engaksï jatsika para úni máteru karichicha paraksï úni irekani Paraisurhu.

15. a) ¿Ambechi úsïni ʻmáteru karichiichaʼ para jarhuataani namunitu karichichani? b) ¿Nénajtsï uaa májkueni úni eska i erachi enga foturhu xarharajka?

¹⁵ Ima no sési úri enga móantapka no úspti xarhatani eska agradesidu jarhaspka ambe enga Jesúsi úpka imani jimbo. Joperu ʻmáteru karichiichaʼ úsïngachi ísï úni. Pori ejemplu, xarhatasïngachi eskachi xénchasïnga Jesúsini imani ambe jimbo engachi újka imeeri ermanu jémbeecha jimbo engaksï erakukateeka. Jesúsi uandaspti eska indeni ambe úraaka para míteni néksï jindeeski karichicha (Mat. 25:31-40). Uaakachi jarhuataani erakukateechani engachi tsípikua jingoni aianhpiska ka uaani Jesúsiiri chúxapatiichani (Mat. 28:18-20). Ísï jimbo, uékasïngachi úraani erramienteechani engajtsïni imeecha íntsaajka komueska libruni tsípikua jingoni ireka je. Engajtsï chá nótki jorhendani jaka nemani Biblieri ambe, ¿andijtsïsï no jánguarhintajki aiakuni nemani Biblieri jorhenguarhikua ma?

16. ¿Ambechi uaa úni iásï engachi uéjka prepararikuarhini parachi Paraisurhu irekani?

¹⁶ Nóchi jatsiska para erokuarhini astakachi Paraisurhu irekaaka parachi ima járhati kʼuiripueni enga Tata Diosï Jeoba jaiapanheantajka. Iásïchisï jatsika para jánguarhintani jurhimbitku uandani, sési úni ambe ma ka sési jámani. Ka ístu, nóchi jatsiska para jurajkuni Tata Diosï Jeobani, juchaari acheetini, uarhiitini o juchaari erachiichani. Engachi iásï jánguarhintaska ísï úni eskaksï Tata Diosïiri juramukuecha na uandajka nájkiruka parhakpinirhu xáni no sési jánhaskuarhini jaka, sánderu fásiliuati kurhajchaani ini juramukuechani Paraisurhu. Ístuchi uaaka sánderu sési úni imani ambe engachi jorhenakia úni ka jánguarhintani ambakiti kualidadiichani jatsiani engaksï xarhataaka eskachi prepararikuarhixakaia parachi Paraisurhu irekani. Indeeri ambe uandasïndi jorhenguarhikua “¿Preparadujtsï jarhaskia parajtsï ʻintsïnhani Echeriniʼ?” enga i rebista jimbo jaka.

17. ¿Andichisï no jatsipirini para jurajkuni eskajtsïni pekaduecha engachi ióntki uaaka no sési pʼikuastaaka?

¹⁷ Ístuchi jatsiska para jánguarhintani nóteru no sési pʼikuarherania kʼérati pekaduechani jimbo engachi úka. Ísïisti, i ambe no arhikuekasïndi eskachi ʻuékaparini pekaduʼ ambe uaaka, uandaparini eska tata Jesukristu uarhiska juchantsïni jimbo (Ebr. 10:26-31). Joperu engachi meru móantakia kʼéri pekadueri ma engachi úka, engachi arhikia Tata Diosï Jeobani ka orhejtsïkutiichani eskajtsïni jarhuataaka ka engachi mójtakukuarhikia, uaakachi seguru jarhani eskajtsïni Tata Diosï mintsita jingoni puáchentaskia (Is. 55:7; Uku. 3:19). Ju je miántani ambe enga Jesúsi arhiapka fariseuechani: “No jurhaska ióarhiani ambarhatiichani, sino pekadoriichani” (Mat. 9:13). Ísïisti, iámindu juchaari pekaduechani uaakachi puáminhantaani jimboka tata Jesukristu uarhiska juchantsïni jimbo.

CHÁJTSÏ UAAKA IREKANI PARA MÉNTKISÏ PARAISURHU

18. ¿Ambe ka ambeerijtsï tsitipirini uandontskuarheni no sési úri jingoni enga Jesúsiiri máekandu jimbo uarhika?

¹⁸ Eranhaska je eskajtsï Paraisurhu jarhaska uandontskuarheni imani no sési úri jingoni enga Jesúsini jingoni uandontskuarhepka. Seguru eskajtsï tsimarhani uandapiringa na engajtsï xáni agradesidu pʼikuarherajka enga tata Jesukristu uarhika chánksïni jimbo. Jamberijtsï chá arhiaka eskaksïni aianguaka ambe enga úkuarhipka sánitu antesi de Jesúsi uarhini ka na enga pʼikuastapka ambe enga Jesúsi mókukuntapka ima ambeeri enga no sési úri kurhakupka. Ka jamberiksïni imajtu kurhamarhiati na jánhaskuarhispi últimu jurhiatikuecha jimbo ante de kʼamajkunhani Satanásiiri parhakpini. ¡Kʼéri kóntperata máeuati jorhendaani i járhati kʼuiripuechani ambe enga arhijka Tata Diosïiri Karakata! (Efes. 4:22-24).

19. ¿Andichisï no kuatantaa Paraisurhu irekani? (Exe je dibujuni enga ueenakuarhu jaka i rebistarhu).

¹⁹ Paraisurhu nóchi méni kuatantaaka. Méntkisïchi jatsiaka né jingoni uandontskuarheni ka ambakiti ánchikuarhita ma engajtsïni kánikua sési pʼikuastaaka. Ka sánderu ambakiti ambe, jindeesti eskachi pauani pauani uaaka sánderu sési míteni juchaari Taati auandarhu anapuni ka sésichi pʼikuarheraaka imani ambe jingoni engajtsïni ima íntskuaka. Nóchi méni kʼamaraaka jorhenguarhini imeeri ambe ka imeeri kueraakateeri ambe. Pauani pauani sánderuchi xénchaaka Tata Diosïni. ¡Kánikuachi agradesidu jarhaska Tata Diosï Jeoba jingoni ka Jesúsi jingoni engajtsïni aiachika eskachi uaaka irekani para méntkisï Paraisurhu!