Ísï eska Pedru, seguirii je marhuakuni Tata Diosï Jeobani

1. ¿Néna pʼikuarheraspi Pedru jiáni enga xáni uánikua kurucheechani pʼitamaapka milagru ma jimbo?

PEDRU erantskutaspti ánchikuarhini ka no ma kurucha pʼitamaspti. Peru Jesúsi i ambe arhispti: “Jimeesïsï pá barkuni enga sánderu jauameka ka jatsimaa je kurucha pʼitamatarakuechani parajtsï kurucheechani pʼitamaani” (Luk. 5:4). Nájkiruka Pedru no jakajkuenga eska úpiringa kurucha pʼitamaani, úspti ambe enga Jesúsi arhipka. Xánksï uaani kurucheechani pʼitamaaspti engaksï jamberi rediicha karukurhipka. Jiáni engaksï kuenta íntskukuarhepka eska inde ambe milagru máespka, Pedru ka ístu máteruecha engaksï imani jingoni japka “ískuksï pakareeraspti”. Ka Pedru uandaspti: “Tata, méntkuni no sáni jukanchaska tʼungini jingoni jarhani, jimbokani ji pekadoriiska” (Luk. 5:​6-9). Péringa Pedru ísï pʼikuarhereenga eska no jukanchaspka Jesúsiiri orhepatini jimbo jarhani.

2. ¿Nénajtsïni jarhuatasïni Pedrueri ejempluni jorhenguarhini?

² Ambe enga Pedru uandapka ísïispti, ima pekadori máespti. Biblia uánikua xanhari uandasïndi eska ima uandaspka ka úni ambe ma enga jimbo tátsekua pʼamondakuarhiengia. ¿Chá májkueni pʼikuarherasïni eska Pedru? ¿Ióntsï páxakiia engajtsï no úni jaka jurajkuni ambe ma? Enga ísïika, asï chkétakuarhi je. Pedrueri ejempluksïni uaati kánikua jarhuatani. Eratsenta je ini ambe: Tata Diosï úpirindi no kararkuarhini Bibliarhu iámindu ambe enga Pedru no sési úpka, peru kararkuarhisti parajtsïni jorhendani ambakiti ambe (2 Tim. 3:​16, 17). Engachi arhintani jarhajka Bibliarhu Pedrueri ambe, achamasï ma enga májkueni nitamakuarhipka ka pʼikuarherani eska jucha, exesïngachi eska Tata Diosï Jeoba no erokuarhisïnga eskachi perfektueuaka. Ambe enga ima uéjka, jindeesti eskachi no kuatantaaka sino eskachi seguiriuaka jánguarhintani nájkirukachi imperfektueka.

3. ¿Andisï xáni jukaparhakue eskachi seguiriuaka jánguarhintani?

³ ¿Andisï xáni jukaparhakue eskachi seguiriuaka jánguarhintani? Engachi jucha no kuatantajka úni ambe ma ka seguiriinchi jorhenguarhini, tátsekuachi sánderu sési úsïnga indeni ambe. Ju je exeni ejemplu ma, músiku ma uaati ióni páni jorhenguarhini paraka niáraaka sési kústani instrumentu ma. Iámindu i tiempu jimbo, jamberi uánikua xanhari niáraati no sési kústani, peru enga no kuatantaska ka seguiriini jorhenguarhini, niáraati sési kústani. Ka nájkiruka tátsekua jorhentpiri máeuakia, ménichani uaati no sési kústaaka, peru no indeni ambe jimbo nóteru kústaatia. Sánderu sési seguiriuati jorhenguarhini. Ka májkueni úkuarhisïndi juchantsïni jingoni. Nájkirukachi eratseaka eskachi jurajkuskia ambe ma enga no sési jaka, jamberichi ménderu ueenaka indeni ambe úni. Peruchi seguiriisïnga jánguarhintani jurajkuni indeni ambe. Iáminduechachi úsïnga o uandani ambe ma engachi jimbo tátsekua no sési pʼikuarherani jarhajkia. Joperu engachi no kuatantaska, Tata Diosï Jeobajtsïni jarhuataati parachi seguiriini sánderu sési úni ambe ma (1 Ped. 5:10). Ju je exeni Pedrueri ejempluni enga méntkisï jánguarhintapka. Jesúsi pʼamojkuspti Pedruni nájkiruka ima no sési ambe ueenga, inde ambejtsïni jarhuataati parachi seguiriini marhuakuni Tata Diosï Jeobani.

AMBE ENGA PEDRU ÚKUA JUKANCHEENGA JURAJKUNI KA KÓNTPERATEECHA ENGA INTSÏNHAAPKA

4. ¿Néna niáraspi exekuarhini Pedru ka néna sési pʼikuastantaspi Jesúsi? (Lukasï 5:​5-10).

⁴ Biblia no uandasïndi andisï Pedru uandapi eska pekadori máespka ni náki pekaduechani eratseantani japi (arhinta je Lukasï 5:​5-10). Jamberi ima niárapti no sési ambe niátani. Jesúsi exespti eska Pedru chésïreenga, jamberi jimboka no mintsinharhikuarhisïnga. Peru ístu mítespti eska Pedru úpiringa sési marhuakuani Tata Diosï Jeobani. Jimbosï uékperakua jingoni arhipti: “Ásteru chéia”. Enga Pedru exepka eska Jesúsi mintsikasïreenga, kánikua sési pʼikuastaspti. Sánderu tátsekua, Pedru ka imeeri ermanu jémba Andrési, jurajkusptiksï imeecheeri ánchikuarhitani enga jindeepka kurucha pʼitamaani paraksï Mesíasini chúxapani. Engaksï ísï úpka, kʼérati kóntperateechanksï intsïnhaaspti (Mar. 1:​16-18).

5. ¿Náki kóntperateechani intsïnhaaspi Pedru enga ísï nóteru chépkia ka enga uékapka Jesúsiiri chúxapatiini?

⁵ Jiáni enga Pedru Kristueri chúxapati úkuarhipka, kánikua ambakiti ambe exespti, úspti exeni enga Jesúsi ambakeraantapka pʼamenchatiichani, enga demoniuechani petarhitantaapka, ka asta na enga Jesúsi tsítaantapka uarhiriichani (Mat. 8:​14-17; Mar. 5:​37, 41, 42).b Ístu exespti jánhaskua ma jimbo na enga kʼéri ambeepiringa Jesúsi Tata Diosïiri Reinurhu ka Pedru no méni mirikurhispti indeni ambe (Mar. 9:​1-8; 2 Ped. 1:​16-18). Jo, Pedru niáraspti exeni imani ambe enga no méni eranhaskapka. ¡Pedru kánikua sési pʼikuarherapti enga no jurajkupka eska ójkutapiringa ima ambe enga no sési pʼikuasteenga! Enga jurajkutakuarhepiringa, tsïtakuarhiapirindi iámindu indeni kóntperateechani.

6. ¿Pedru úspi sóntku mójtakurhini?

⁶ Ísïisti, Pedru exespti iámindu ambe enga Jesúsi úpka ka ístu ambe enga uandapka, peru útasï jatsispti para seguiriini mójtakurhini. Ju je exeani máru ejempluechani. Enga Jesúsi aianguani japka eska jatsispka para kómu nitamakuarhini ka uarhini parakaksï kumplirikuarhipiringa Biblieri profesiecha, Pedru xukaspti (Mar. 8:​31-33). Ka someni, Pedru ka máteru apostoliichaksï arhirperani jarhasïreendi né jindeespi sánderu kʼéri ambe (Mar. 9:​33, 34). Ka ima chúrikua ante de Jesúsi uarhini, Pedru xáni ikiaspti enga kutsïkua pʼikupka acheetini ma (Juanu 18:10). Ístu ima mismu chúrikua, kánikua chéspti ka tanimu xanhari uandaspti eska no mítespka Jesúsini, imeeri amigu (Mar. 14:​66-72). Pedru jurajkutakuarhispti uerani xáni no sési pʼikuarherani inde ambe jimbo (Mat. 26:75).

7. Enga Jesúsi na tsíntapkia, ¿ambe jurajkuspi eska úpiringa Pedru?

⁷ Enga Pedru no sési pʼikuarherani japka, Jesúsi no arhispti eska nóteru úpiringia imani marhuakuni. Enga na tsíntapkia, jurajkuspti eska Pedru xarhatakupiringa na enga xáni xéncheenga. Jesúsi arhispti Pedruni eska kaxumbikua jingoni eranguapiringa imeeri karichiichani (Juanu 21:​15-17). Ka Pedru kánikua tsípikua jingoni jiókuarhispti indeni ánchikuarhitani, jimbosï Jerusaléni japti jiáni enga kʼuínchikua úkuarhipka Pentekostesi ka ima jindeespti ma imeecheeri engaksï orhetku erakunhapka espiritu santu jimbo.

8. ¿Pedru ambe no sési ambe úspi Antiokía?

⁸ Ísï tátsekua enga Pedru na erakunhapkia espiritu santu jimbo, ima útasï jatsispti para seguiriini jánguarhintani mójtakurhini. Uéxurhini 36 jimbo, Pedru exespti na enga Korneliu, enga insirkunsisuepka, espiritu santu intsïnhapka. I ambe xarhatakuspti eska “Tata Diosï iáminduechani májkueni kaasïnga” ka eska máteru nasionirhu anapuechajtuksï úpiringa jarhani imeeri kúnguarhikuarhu (Úku. 10:​34, 44, 45). Jiáni uératini Pedru ueenaspti tʼireni imeecha jingoni engaksï no judiuepka, ambe ma enga antesi no méni úpiringa (Gal. 2:12). Joperuksï máru kristianuecha engaksï judiuepka, eratsesïreendiksï eska no sési jarhaspka májku kʼéri tʼireni imeecha jingoni engaksï no judiuepka. Engaksï máru kristianuecha engaksï májkueni eratseenga eska imeecha niárapka Antiokía, Pedru nóteru uékasptia tʼireni imeecha jingoni engaksï no judiuepka, jamberi ísï úpti jimboka chésïreenga no sési pʼikuastaani imani kristianuechani engaksï judiuepka. Enga apostoli Pablu ini ambe exepka, ima iáminduechani japarini xukaspti Pedruni (Gal. 2:​13, 14). Nájkiruka ini ambe úpka, Pedru no chkétakuarhispti; seguiriispti jánguarhintani mójtakurhini. ¿Ambe jarhuataspi?

¿AMBE JARHUATASPI PEDRUNI PARA SEGUIRIINI JÁNGUARHINTANI?

9. Eska na uandajka Juanu 6:​68, 69, ¿néna xarhataspi Pedru eska no méni jurajkupiringa Jesúsini?

⁹ Pedru no méni jurajkuspti Jesúsini. Ima no jurajkuspti eska ambe ma ójkutapiringa para nóteru chúxapania Jesúsini. Pori ejemplu, Pedru xarhataspti eska ima no méni jurajkupiringa Jesúsi jiáni enga Jesúsi arhiapka imeeri chúxapatiichani ambe ma engaksï imeecha no kurhangupka (arhinta je Juanu 6:​68, 69). Jiáni uánikuechaksï jurajkuspti Jesúsini, nóksï jamberi kurhamarhispti ima ambeeri enga uandapka oksï erokuarhini eska ima sési aianguapiringa ambe enga arhikuekani japka. Joperu Pedru no ísï úspti. Ima iáminduechani japarini uandaspti eska Jesúsiiri uandakuechajkuksïsï íntspijka “tsípikua para méntkisï”.

10. ¿Néna xarhataspi Jesúsi eska mintsikasïreenga Pedruni? (Ístu exe je imajenini).

¹⁰ Jesúsi no méni jurajkuspti Pedruni. Últimu chúrikua enga Jesúsi ixú Echerirhu japka, ima mítesptia eska Pedru ka máteru apostoliichaksï jurajkupiringa. Peru Jesúsi arhispti Pedruni eska ima mintsikasïreenga eska Pedru ménderu niárapiringa sési marhuakuani (Luk. 22:​31, 32). Jesúsi mítespti eska ‘mintsita uékasïnga úni ambe enga sési jaka, joperu kuerpu no úsïndi pʼíngukuarhini’ (Mar. 14:38). Ísï jimbo, nájkiruka Pedru uandapka eska no mítespka Jesúsini, ima no uandaspti eska Pedru nóteru úpiringia marhuakuni. Ísï tátsekua enga Jesúsi tsíntapka, xarhakuspti Pedruni enga jandiajku japka (Mar. 16:7; Luk. 24:34; 1 Kor. 15:5). Seguru eska i ambe kánikua jarhuatapka apostoli Pedruni paraka ima sési pʼikuarherantapiringa.

11. ¿Jesúsi néna xarhatakuspi Pedruni eska Tata Diosï Jeoba méntkisï kuidaripiringa?

¹¹ Jesúsi aiakuspti Pedruni eska Tata Diosï Jeoba méntkisï kuidaripiringa. Jiáni enga Jesúsi na tsíntapkia, úspti eska Pedru ka ístu máteru apostoliicha, uánikua kurucheechani pʼitamaapiringa milagru ma jimbo (Juanu 21:​4-6). I milagru xarhatakuspti Pedruni eska Tata Diosï íntskupiringa iámindu ambe enga uétarhinchapiringa. Jamberi Pedru miántapti ambe enga Jesúsi aiakuapka jiáni enga arhiapka eska Tata Diosï Jeoba kuidariuapiringa engaksï orheta peerapiringa Tata Diosïiri Reinuni (Mat. 6:33). Ini ambe míteparini, Pedru sánderu jánguarhintaspti para aianhpini ka eska imeeri ánchikuarhita úni enga jindeepka kurucha pʼitamaani. Ísï jimbo, kʼuínchikua Pentekostesiiri uéxurhini 33 jimbo, Pedru balori jingoni aianhpispti ka jarhuataasti uánikua kʼuiripuechani jiókuarhini ambakiti aianhperakuani (Úku. 2:​14, 37-41). Ka sánderu orhepatini, jarhuataaspti uánikua samaritanuechani ka ístu imeechani engaksï no judiuepka paraksï Kristueri chúxapatiini (Úku. 8:​14-17; 10:​44-48). Úsïngachi exeni eska Tata Diosï Jeoba, Pedruni úraspka paraka na uéjki jásï kʼuiripu janopiringa kúnguarhikuarhu.

AMBE ENGACHI UAAKA JORHENGUARHINI

12. ¿Nénajtsïni jarhuatasïni Pedrueri ejemplu engachi ióni páni jakaia uékani jurajkuni ambe ma?

¹² Jeoba ístujtsïni uaati jarhuatani juchantsïni parachi no chkétakuarhini. Ménichanisï i ambe uaati kánikua difisiliini, ka sánderia engachi ióni páni jakaia jurajkuni ambe ma enga no sési jaka. Ka jamberichi eratsejka eska inde ambe, sánderu kʼéri ambeeska ka eska ima ambe enga Pedru úpka. Perujtsïni Tata Diosï Jeoba uaati íntskuni imeeri uinhapikuani parachi úni orhepani uérani (Sal. 94:​17-19). Ju je ejemplu ma exeni erachiiri ma enga antesi de Tata Diosï Jeobaeri ambe míteni omoseksualiipka. Nájkiruka tátsekua ima nóteru niáteengia indeni ambe, ménichanisï eratsesïreendi no sési jásï ambe. ¿Ambe jarhuataspi para seguiriini jánguarhintani jurajkuni indeni ambe? Ima uandasïndi: “Tata Diosïjtsïni íntskusïndi uinhapikua”. Ka ístu ini ambe uandasïndi: “Tata Diosï Jeobaeri espiritu jingoni jorhenguarhiska eska ma úsïnga ísï irekani eska Tata Diosï na uéjka”. Ka ístu uandasïndi: “Tata Diosï Jeobareni jurajkusti marhuakuni [...], ka nájkirukani no perfektueka, imarini seguiriixati imeeri uinhapikua íntskuni”.

13. ¿Nénachi uaa májkueni úni eska Pedru? (Úkuecha 4:​13, 29, 31; ístu exe je imajenini).

¹³ Eskachi na exekia, Pedru uánikua xanhari chérhiaspti kʼuiripuechani. Peru ima kurhakuspti Tata Diosï Jeobani eska jarhuatapiringa ka úspti balori jukani (arhinta je Úkuecha 4:​13, 29, 31). Juchajtuchi uaaka orhepani uérakuni imani ambe engachi chérhijka. Ju je exeni ambe enga úkuarhinchapka Horst, Alemania anapu tumbi ma enga Jeobaeri testiguepka. Jiáni engaksï nasiicha juramuni japka, eskuelarhu uánikua xanhari chérhiaspti kʼuiripuechani ka niáraspti uandaspti saluduni Heil Hitler. Enbesi deksï xukani, imeeri taatiichaksï imani jingoni kómarhispti Tata Diosïni ka kurhakusptiksï eska balori íntskupiringa. Imeeri taatiicheeri jarhuajperata jingoni, ka ístu jimboka kurhakuspka Tata Diosï Jeobani eska jarhuatapiringa, Horst tiempu jingoni balori jukaspti para nóteru chérhiania kʼuiripuechani ka sánderu tátsekua ima uandaspti: “Tata Diosï Jeobareni no méni jurajkuspti”.c

14. ¿Nénaksï uaa orhejtsïkutiicha uinhaperaantani uékperakua jingoni imeechani engaksï nóteru xáni jánguarhintajkia?

¹⁴ Tata Diosï Jeoba ka Jesúsi nójtsïni méni ísï exeati eskachi nóteru uaakia marhuakuani. Jiáni enga Pedru uandapka eska no mítespka Kristuni, jatsispti para sési eratsentani ambe úpirini. ¿Nóteru jánguarhintapirinia? ¿O seguiriipirini Jesúsiiri chúxapatiini? Jesúsi kurhakuspti Tata Diosï Jeobani eska jarhuatapiringa Pedruni paraka seguiriipiringa mintsikani imani ka no chkétakuarhini. Tátsekua Jesúsi arhispti Pedruni eska kómarhijpikuspka ka eska seguru jarhaspka eska ima sánderu orhepatini úpiringa uinhaperaantani imeeri erachiichani (Luk. 22:​31, 32). ¡Kánikua uinhaperantapti Pedruni miántani ambe enga Jesúsi arhipka! Juchajtuchi jatsiaka para jukaparhakua ambe erakuni, enga ísï úkuarhini jauaka, jamberi Tata Diosï Jeoba orhejtsïkutiichani úrauati engajtsïni uékperakua jingoni uinhaperantaaka parachi no méni jurajkuni imani (Éfes. 4:​8, 11). Paul, enga ióni páni jakaia enga orhejtsïkutiika, jánguarhintasïndi uinhaperaantani máteruechani. Enga exejka eska erachi ma nóteru xáni jánguarhintaxakaia, ima pʼímarhisïndi paraka miántaaka na enga Tata Diosï juaka imeeri kúnguarhikuarhu. Ístu, arhisïndi eska jimboka Tata Diosï Jeoba xáni xénchasïnga, no méni ísï exeaka eska nóteru uaakia marhuakuni. I orhejtsïkuti exesti eska uánikua erachiicha engaksï nóteru xáni jánguarhintani japkia, úspkaksï orhepani uérani Tata Diosï Jeobaeri jarhuajperatani jingoni.

15. ¿Néna xarhatasïni Pedrueri eksperiensia ka ístu Horstiiri eska Mateu 6:33 méntkisï kumpliriikuarhisïnga?

¹⁵ Eskachi na exekia, Tata Diosï Jeoba íntskuspti Pedruni ka ístu máteru apostoliichani ambe engaksï xáni uétarhincheenga ka májkueni uaati juchantsïni jingoni engachi orheta peeraska aianhpikuani (Mat. 6:33). Enga na kʼamarapkia Segunda Guerra Mundiali, Horst, engachi máteru párrafurhu uandaka, uékasïreendi prekursoriini. Peru ima kánikua pobriispti ka no seguru jarhaspti sini úpirini jatsini ambe enga uétarhinchapiringa para úni marhuakuni Tata Diosï tiempu kompletueri. ¿Ambe úspi? Tsʼéjkuspti Tata Diosï Jeobani ka uéraspti aianhpini iámu imani semanani enga sirkuitueri orhejtsïkuti pʼorhembiapka. Enga kʼamarapkia semana, Horst ísku pakareraspti enga sirkuitueri orhejtsïkuti sobri ma íntskupka enga máteru nema axakupka sentabu jingoni. Imani sentabu jingoni, úpirindi prekursoriini uánikua kutsïicha jimbo. Inde regalu úspti eska Horst seguru japiringa eska Tata Diosï Jeoba méntkisï kuidariipiringa. Ka desde jiáni uératini, orheta peeraspti Tata Diosïiri Reinuni imeeri tsípikuarhu (Mal. 3:10).

16. ¿Andisï xáni jukaparhakue eskachi estudiariuaka Pedrueri ejempluni ka ístu imeeri tsimani karteechani?

¹⁶ ¡Pedru kánikua sési pʼikuarherapti enga Jesúsi no kasu úkupka enga ima arhipka: “Tata, méntkuni no sáni jukanchaska tʼungini jingoni jarhani”! Kristu seguiriispti jorhendani Pedruni para mintsinharhikueni ka para ambakiti ejemplu máeni para kristianuecha. Ambe enga Pedru jorhenguarhipka, ístujtsïni ambakiti ambe jorhendasïndi juchantsïni. Pedru karaspti máru ambe enga jorhenguarhipka ka ístu máteru ambe, imani tsimani karteecharhu enga karaapka Tata Diosïiri jarhuajperata jimbo ka enga ísï tátsekua primeru siglurhu anapu kúnguarhikuechani axakuapka. Máteru jorhenguarhikua jimbo, exenchi jauaka máru jukaparhakueka ambe enga jimini uandajka ka na engajtsïni iásï uaaka marhuacheni.