Ménderu exe je ambe enga sánderu jukaparhakueka

¿Sóntkujtsï mirikurhisïni ambe engajtsï jorhenguarhijka? Iáminduechachi ménisï ísï úkuarhinchasïnga. Joperu uaakachi ménderu exeni imani ambe enga sánderu jukaparhakueka parachi no mirikurhini.

Engajtsï estudiarini jauaka, erokuarhi je sáni ka eratsenta je imani ambe engajtsï jorhenguarhini jauaka. Ini ambesï arhiapti apostoli Pablu erachiicha ka pirenchiicha engaksï arhintani japka imeeri kartani, arhiaspti: “Jucha arini ambechisï uéjka eska kurhangunhaaka” (Ebr. 8:1). Indeni uandakuecha jingoni jarhuataaspti sánderu sési kurhanguni ambe enga ima uandani japka ka eska iámindu ambe terukuntasïreenga.

Méni engajtsï estudiariuaka, erokuarhi je sáni, jamberi ma 10 minutisï parajtsï eratsentani imani ambe enga sánderu jukaparhakueka. Ka engajtsï no uaaka miántani, ménderu arhianta je subtituluechani o ambe enga ueenajka uandani párrafuecharhu. Ka engajtsï jimbanhi ambe jorhenguarhiaka, jánguarhinta je aianguni nemani ambe engajtsï jorhenguarhika. Engajtsï exeni jauaka ambe engajtsï jorhenguarhika, fasilijtsï miántaaka ka ístujtsï exeaka nénaksïni marhuachea.