“Eraku je iásï néntsï marhuakua”

1. ¿Parachi sési irekani ambechi jatsiski para úni ka andi? (Isaías 48:​17, 18).

JUCHAARI Taati auandarhu anapu, kánikuajtsïni xénchasïndi ka uékasïndi eskachi tsípikua jingoni irekaaka iásï ka sánderu orhepani (Ecl. 3:​12, 13). Imajtsïni ísï kueraasti parachi mámaru ambe jorhenani úni, joperu no parachi jandiajku juramukuarhini ni erakukuarhini ambesï sési jaki ka ambe nómbe (Ecl. 8:9; Jer. 10:23). Ima mítesti eskachi jatsiska para marhuakuni ka kurhajchani parachi úni sési irekani (arhinta je Isaías 48:​17, 18).

2. ¿Ambe uékasïni Satanási eskachi eratseaka ka ambe úski Tata Diosï Jeoba para xarhatani eska Satanási chkuandera máeska?

² Satanási uékasïndi eskachi eratseaka eskachi no uétarhinchasïnga Tata Diosï Jeobani parachi tsípikua jingoni irekani ka eskachi uaaka juchajkumindu juramukuarhini (Gén. 3:​4, 5). Para xarhatani eska Satanási chkuandera máeska, Tata Diosï Jeoba jurajkuxati eska kʼuiripu juramuaka ka exexakachi eskaksï kʼuiripuecha no úsïnga sési juramuni. Joperuksï Bibliarhu jarhasti uánikua ejempluecha tataka ka nanakeecheeri engaksï tsípikua jingoni irekapka jimbokaksï Tata Diosïni marhuakusïreenga ka enga sánderu tsípikua jingoni irekapka eska iáminduecha, jindeesti tata Jesukristu. Orhetachi exeni jauaka andisï Jesúsi erakupi marhuakuni Tata Diosï. Tátsekua andisï juchaari Taati auandarhu anapu jukancha eskachi kómarhiaka. Ka últimu, miántanchi jauaka andichisï eraku marhuakuni Tata Diosï Jeobani.

¿ANDISÏ JESÚSI ERAKUPI MARHUAKUNI TATA DIOSÏ JEOBANI?

3. ¿Ambe aiakuspi Satanási Jesúsini ka ambe erakuspi Jesúsi?

³ Enga Jesúsi Echerirhu jámani japka, jatsispti para erakuni néni marhuakupirini. Ka ísï tátsekua enga na itsï atakuarhipka, Satanási aiakuspti eska íntsaapiringa iámu parhakpini anapu juramukuechani enga ma xanharijku kómarhipiringa. Joperu Jesúsi arhispti: “¡Kéndikucherini Satanási! Jimboka karakata jarhaska: ‘Kómarhi chiiti Tata Diosï Jeobani ka imantku marhuaku’” (Mat. 4:​8-10). ¿Andisï Jesúsi indeni ambe erakupi? Ju je exeni máru ambe.

4, 5. ¿Andisï Jesúsi erakupi marhuakuni Tata Diosï Jeobani?

⁴ Jesúsi erakuspti marhuakuni imeeri Taatini, Tata Diosï Jeobani, jimboka mintsita jingoni xénchasïnga (Juanu 14:31). Ístu marhuakusïndi Tata Diosï Jeobani jimboka míteska eska ísïsï sési jaka (Juanu 8:​28, 29; Apok. 4:11). Ka mítesti eskajtsïni Tata Diosï Jeoba íntskuska tsípikua, eska intsïmpitiiska ka eskachi uaaka mintsikani (Sal. 33:4; 36:9; Sant. 1:17). Tata Diosï Jeoba méntkisï jurhimbitku ambe aiangusïreendi Jesúsini ka iámu ambe enga ima jatsipka Taati jémba íntskuspi (Juanu 1:14). Joperu Satanási uarhikuajkusï juakuti kʼuiripuni, ima chkuandera máesti ka méntku no sáni pʼamojpesïndi (Juanu 8:44). Jesúsi sési sési mítesti Tata Diosï Jeobani ka ístu Satanásini, jimbosï no méni eratsepti ísïini komueska Satanási sino kurhajchani Tata Diosï Jeobani (Filip. 2:​5-8).

⁵ Máteru ambe jimbo enga Jesúsi erakupka marhuakuni Tata Diosï Jeobani, jindeespti jimboka mítespka eska ambakiti ambe úkuarhipiringa enga no méni jurajkupiringa Tata Diosï Jeobani (Ebr. 12:2). Mítespti eska pímbinhajkuntapirindi Tata Diosïiri nombrini enga no méni jurajkupiringa ka eska ístu kénditapiringa pekaduni ka uarhikuani enga Satanási juaka.

¿ANDISÏ TATA DIOSÏ JEOBA JUKANCHA ESKACHI MARHUAKUAKA?

6, 7. ¿Andiksïsï uánikua kʼuiripuecha no marhuakujki Tata Diosï Jeobani? ¿Andisï Tata Diosï Jeobani jukancha eskachi kómarhiaka?

⁶ Iásï, uánikua k’uiripuechaksï no marhuakusïndi Tata Diosï Jeobani jimbokaksï no míteska. Nóksï míteasti imeeri kualidadiichani ni ambe enga xáni újka kʼuiripuecha jimbo. Ísïksï jarhaspti máru Atenasi anapuecha enga apostoli Pablu aianguapka Tata Diosïiri ambe (Úku. 17:​19, 20, 30, 34).

⁷ Apostoli Pablu arhiaspti eska Tata Diosï jurhimbitisï íntskuajka tsípikua “iámindu kʼuiripuechani ka tarhiata paraksï jirejtani ka iámindu ambe”. Ístu arhispti “imani jimbochisï tsípikua jatsika ka jámanchi jarhani ka jindeenchi”. Tata Diosï Jeoba jindeesti juchaari Kuerajpiri enga “ma achamasïni jimbojku, uánikua ireteechani” kuerauaka. Ísï jimbo, imajkusï jukanchati parachi kómarhini (Úku. 17:​25, 26, 28).

8. ¿Ambe no méni uaa Tata Diosï Jeoba?

⁸ Jimboka Tata Diosï Jeoba jindeeska Kuerajpiri ka sánderu k’éri Juramuti, ima úpirindi uandani eskaksï kʼuiripuecha afuersa marhuakuaka. Joperu ima no méni uaati indeni ambe jimbokajtsïni mámaru ambe exeraskia parajtsïni xarhatacheni eska ima jarhaska ka eskajtsïni kánikua xénchasïnga. Ima uékasïndi eskaksï uánikua kʼuiripuecha imeeri amigueuaka para méntkisï (1 Tim. 2:​3, 4). Ísï jimbo, Tata Diosï Jeobajtsïni arhistachisïndi parachi jorhendaani kʼuiripuechani ambe enga uaaka imeecha jimbo ka na enga uaaka indeni ambe (Mat. 10:​11-13; 28:​19, 20). Ístu jatsiasti kúnguarhikuechani ka orhejtsïkutiichani engajtsïni xénchperakua jingoni kuájchakujka (Úku. 20:28).

9. ¿Néna xarhatasïni Tata Diosï Jeoba eska xénchpesïnga?

⁹ Tata Diosï Jeoba imeechani jamberi xénchaasïndi engaksï eratsejka eska Tata Diosï no jarhaska. Desde iónisïa, uánikua k’uiripuechaksï jandiajku exesïndi ambesï sési jaki ka ambe nómbe ka nóksï uékasïndi kurhajchani Tata Diosï Jeobani. Joperu Tata Diosï Jeoba xáni xénchpesïndi enga íntsaajka iámindu ambe engaksï uétarhinchajka paraksï úni sési irekani ka tsípikua jingoni (Mat. 5:​44, 45; Úku. 14:​16, 17). Tata Diosïiri jarhuajperata jimboksï úsïndi familia ma jatsini, kánguarhiani sapiichani, jatsiani amiguechani ka sésiksï p’ikuarherani imeecheeri ánchikuarhita jimbo (Sal. 127:3; Ecl. 2:24). I ambe xarhatasïndi eska juchaari Taati auandarhu anapu iáminduechani xénchaasïnga (Éx. 34:6). Iásï ju je exeni andichisï eraku marhuakuni Tata Diosï Jeobani ka nénajtsïni újchakurasïni ima.

¿ANDICHISÏ ERAKU MARHUAKUNI TATA DIOSÏ JEOBANI?

10. a) ¿Andichisï marhuakujki Tata Diosï Jeobani? (Mateu 22:37). b) ¿Chánksïni néna jarhuataskia míteni eska Tata Diosï Jeoba tekaantasïnga? (Salmo 103:​13, 14).

¹⁰ Juchajtuchi marhuakusïnga Tata Diosï Jeobani jimbokachi iámu mintsita jingoni xénchasïnga ísï eska Jesúsi (arhinta je Mateu 22:37). Engachi sánderu mítejka Tata Diosï Jeobani, sánderuchi tsitiasïnga imeeri kualidadiichani. Pori ejemplu, engaksï israeliteecha no kurhajcheenga, ima arhiasïreendi: “Kurhajchajtsïni je, ásteru no sési ambe uia je”. Jo, imajtsïni kánikua tekaachintasïndi (Jer. 18:11). Tata Diosï Jeoba miásïndi eskachi tʼupuriiska (arhinta je Salmo 103:​13, 14). Enga chá eratsentajka na enga Tata Diosï Jeoba tekaantajka ka xarhataani máteru kualidadiichani, inde ambejtsïni jarhuatasïndi méntkisï uékani marhuakuni.

11. ¿Ambe máteru ambe jimbochi marhuakusïni juchaari Taati auandarhu anapuni?

¹¹ Máteru ambe jimbo engachi marhuakujka Tata Diosï Jeobani jindeesti jimbokachi míteska eska sési jarhaska (Mat. 4:10). Ístu engachi no méni jurajkujka Tata Diosï Jeobani kánikua marhuasïndi jimbokachi jarhuajpesïnga pímbinhajkuntani imeeri nombrini, xarhatasïngachi eska Satanási chkuandera máeska ka tsíperasïngachi juchaari Taatiiri mintsitani. Engachi iásï erakuska marhuakuni Tata Diosï Jeobani, uaakachi marhuakuni para méntkisï (Juanu 17:3).

12, 13. ¿Ambechi jorhenguarhisïni Jaeliiri ka Pameleeri ambe?

¹² Desde enga ma sapichuejka úsïndi kánikua xénchani Tata Diosï Jeobani ka nájkiruka nitamajka tiempu, seguiriini jarhasïngachi májkueni pʼikuarherani. Ju je exeni Jaeliiri ka Pameleeri ejempluni,a imeechaksï jingonikua jémbeesti. Jiánksï ueenaspti jorhenguarhini Jeobaeri testiguecha jingoni enga Jaeli 11 jatiriipka ka Pamela 10. Nájkirukaksï taati jémbeecha no uékapka jorhenguarhini Biblieri ambe, jurajkusptiksï Jaelini ka Pamelani eskaksï jorhenguarhipiringa, joperu eskaksï seguiriipiringa nirani iglesiarhu familia jingoni fini de semaneecha jimbo. Jaeli uandantasïndi: “Ambe engajtsïni Jeobaeri testiguecha jorhendapka Biblieri ambe, jarhuatasptirini parani no imani ambe úni engaksï juchiiti kompanieruecha uékeenga, ni droga ambe úrani ni ísku jándikua ambe niátani”.

¹³ Ka máru uéxurhini tátsekua, niárasptiksï aianhpiriini. Ka ísï tátsekuaksï prekursoreesptia ka ístuksï kuidariuasïreendi taati jémbeechani engaksï jatiripkia. Jaeli uandantasïndi ambe enga xáni úkia Tata Diosï Jeoba imeecha jimbo: “Ji exekuarhiskia eska Tata Diosï Jeoba no méni jurajkuasïnga imeeri amiguechani, ísï eska na arhijka 2 Timoteu 2:19: ‘Tata Diosï Jeoba sési míteasti imeechani engaksï imeeriika’”. Ísïisti Tata Diosï Jeoba kuidariuasïndi imeechani engaksï xénchajka ka marhuakuni.

14. ¿Nénachi uaa kuájpini Tata Diosï Jeobaeri nombrini? (Ístu exea je imajeniichani).

¹⁴ Uékasïngachi jarhuajpeni paraka pímbinhasïntaaka Tata Diosï Jeobaeri nombri. Pori ejemplu, eranhaska je eskajtsï amiguni ma jatsiska enga sési kámpijka, intsïmpitiini ka kurhangutspini. Joperu ma jurhiatikua kurhaasïngachi na enga kʼuiripu ma uandani jaka eska juchaari amigu no sési kámpisïnga ka eska chkuandera máeska. ¿A no eskachi kuájpepiringa? Sáno májkueni, engachi kurhaajka eska nema chkuanderakua ambe uandaxaka Tata Diosï Jeobaeri ambe, juchachi uékasïnga uandantani imani ambe enga ísïika ka kuájpini (Sal. 34:1; Is. 43:10). Juchaari úkuecha ka uandakuecha jingonchi xarhatasïnga eskachi uékasïnga marhuakuni Tata Diosï Jeobani iámu mintsita jingoni.

15. ¿Náki kóntperata jatsispi apostoli Pablu enga mójtakupka imeeri irekuani? (Filipusï 3:​7, 8).

¹⁵ Tsípikua jingonchi mójtakusïnga ambe enga uétarhijka parachi jaiapanherantani Tata Diosï Jeobani ka parachi sánderu marhuakuni. Nema enga ísï úpka jindeespti apostoli Pablu, ima kʼéri ambeespti judiuecheeri relijionirhu joperu jurajkuspti imani ambe para Jesúsiiri chúxapatiini ka Tata Diosïni marhuakuni (Gal. 1:14). Ka indeni ambe jimbo enga úpka, kánikua sési irekaspti ka asta intsïnhasti sésikua para Kristuni jingoni juramuni auandarhu. Pablu no méni pʼamondakuarhispti enga erakupka marhuakuni Tata Diosï Jeobani ka juchajtuchi no méni pʼamondakuarhiaka (arhinta je Filipusï 3:​7, 8).

16. ¿Ambejtsïni jorhendasïni Julieri eksperiensia? (Ístu exea je imajeniichani).

¹⁶ Engachi sánderu jukaparharaaka Tata Diosï Jeobani marhuakuni imajtsïni kóndentaati iásï ka sánderu orhepani. Ju je exesïni pirenchi Julieri eksperiensiani. Ima, iglesiarhu ma piresïreendi enga nanaka sapichuepka. Ka kʼuiripu ma enga jorhenapka ópera pireni, exespti eska Julia kánikua sési piresïreenga jimbosï arhipti eska jorhendapiringa. Julia sontku uápurisï mitekateesptia ka uánikua lugaricharhisï niraspti pireni. Ma xanhari, k’éri eskuela ma jimbo jorhenguarhixapti músika ka imeeri kompanieru jémba ma aianguspti eska Tata Diosï arhinhasïnga Jeoba. Ísï tátsekua, Julia ueenaspti jorhenguarhini Biblieri ambe, tsimani xanhari jorhenguarhisïreendi ma semana jimbo. Ka tátsekua nóteru uékasptia pireni jimboka erakuspka marhuakuni Tata Diosï Jeobani. Joperu no fasiliispti. Ima uandantasïndi: “Uánikuechajtsïni arhisïreendi eskani sési piresïreenga ka eskani no sési úxapka engani nóteru pirepiringia nomasi parani Tata Diosï Jeobani marhuakuni”. Iásï enga Julia jukari 30 uéxurhini marhuakukia Tata Diosï Jeobani, ¿néna p’ikuarherasïni? Ima uandantasïndi: “Kánikua sési pʼikuarherasïnga ka seguru jarhaska eskarini Tata Diosï Jeoba íntskuaka sánderu orhepani ambe engani uétarhinchaaka” (Sal. 145:16).

SEGUIRII JE MARHUAKUNI TATA DIOSÏ JEOBANI

17. ¿Ambe arhikuekasïni para jucha últimu jurhiatikuecha jimbo irekani jarhani? ¿Ka ambe arhikuekasïni para imeecha engaksï nótki marhuakuni jaka Tata Diosï Jeobani?

¹⁷ No ióni jimbo kʼamajkunhaati iámu ambe enga parhakpinirhu jaka. Apostoli Pablu karaspti: “Jimboka no ‘ióni jimbo’, ‘ima enga jurhani jaka, janoati ka no ióndaati’” (Ebr. 10:37). ¿Ambe arhikuekasïni i ambe? Eskaksï kʼuiripuecha sánderkusï tiempu jatsikia paraksï erakuni marhuakuni Tata Diosï Jeobani (1 Kor. 7:29). Ka jucha engachi erakukia marhuakuni Tata Diosï Jeobani, míteskachi eskachi jatsiauaka máru tsʼéjkukuechani joperu nóksï jindeuati para méntkisï.

18. ¿Ambejtsïni arhisïni Tata Diosï Jeoba ka Jesúsi eskachi uaaka?

¹⁸ Jesúsi arhiaspti kʼuiripuechani eskaksï chúxapapiringa ka eskaksï méntkisï ísï úpiringa (Mat. 16:24). Ísï jimbo, ju je no kuatantani na uéjkichi ióni páni jarhania Tata Diosï Jeobani marhuakuni. Ísïisti, no méntkisï fásiliisïndi jánguarhintani Tata Diosï Jeobani marhuakuni, joperu exeskachia eskachi niárasïnga tsípikua jingoni irekani. Ka Tata Diosï Jeobajtsïni uánikua kóntperateechani íntsaasïndi, jimbokachi seguiriini jarhasïnga imani marhuakuni nájkirukachi ménisï úkua jukanchajka (Sal. 35:27).

19. ¿Ambechi jorhenguarhisïni Jairoeri ambe?

¹⁹ Máruksï uandasïndi eskachi Testiguecha no tsípikuarhisïnga. Ísï jimbo, engari tʼu tumbiika o uátsïini, ¿tʼu exesïni eskari no uaaka tsípikuarhini engari Tata Diosïni marhuakuska? Exe ambe enga uandajka tumbi ma enga Jairo arhinhajka, ima uandantasïndi: “Ji uandasïreenga eskachi Jeobaeri testiguecha uánikua ambe no úsïreenga úni. Ji exesïreenga eskaksï máteru tumbiicha nirasïreenga kʼuínchikuecharhu, nanakeecha jingoni uérani, imani ambe jingoni chʼanani enga jindeeka para atajpini, ka ji méntku nómbe. Ji solu tánguarhikuecharhu nirasïreenga ka uérani aianhpini. Eratsesïreenga eskani no sáni tsípikuarhisïreenga”. Ísï eratseni úspti eska Jairo no sési ambe úpiringa. Ima uandantasïndi: “Ueenaspka sïpatikuarku imani ambe úni engaksï máteru tumbiicha ueenga, ka ma tiempu kʼóruni kánikua no sési ambe niátaspka. Joperu tátsekua ueenaspka exeni eskani méntkuni no sáni tsípikua jingoni irekaxapka, ueenaspka eratsentani Biblieri ambe ka ambe engani no úni japka. Ístuni eratsentaspka na engareni xáni sési nichepiringa engani ísï úpiringa eska Biblia na uandajka. Ísï jimbo, eratsespka iámu mintsika jingoni marhuakuni Tata Diosï Jeobani ka jiáni uératini exeska na engareni Tata Diosï Jeoba méntkisï mókuchiantajka kómarhikuechani”.

20. ¿Ambechi uékasïni úni?

²⁰ Ma xanhari, salmista ma ísï pirekuspti Tata Diosï Jeobani: “Tsípisïndi ima achamasï engari t’u erakujka ka engari újka eskakeni andarhieraaka paraka irekaaka chiiti ekuaruechani jimbo” (Sal. 65:4). Ka ísï eska Josué, ju je juchajtu májkueni uandani: “Ji ka juchiiti kʼumanchikuarhu anapuecha, jucha Jeobani marhuakuaka” (Jos. 24:15).